ޔާމީން ރަޝީދުގެ އާއިލާއިން ހުށަހެޅި މައްސަލައިގެ އިސްތިއުނާފު އަޑުއެހުންތައް އާދިއްތާ ދުވަހު ފަށަނީ

ތޫނު އެއްޗަކުން ހަމަލާދީ، އަނިޔާވެރި ގޮތެއްގައި މަރާލާފައި އޮއްވާ ފެނުނު ބްލޮގަރ ޔާމީން ރަޝީދުގެ އާއިލާއިން ހުށަހެޅި މައްސަލައިގެ އިސްތިއުނާފު އަޑުއެހުންތައް އާދިއްތަ ދުވަހު ފެށުމަށް ހައި ކޯޓުގައި ތާވަލްކޮށްފި އެވެ.

ޔާމީންގެ އާއިލާގެ ފަރާތުން، އޭނާގެ ބައްޕަ ހުސެއިން ރަޝީދު ހުށައަޅާފައިވާ އިސްތިއުނާފުގެ މައްސަލަ ތާވަލް ކޮށްފައިވަނީ އާދިއްތަ ދުވަހުގެ ހެނދުނު 11:15 އަށެވެ.

އެ މައްސަލާގައި ޔާމީން ރަޝީދުގެ ބައްޕަ ދައުވާކުރަނީ ފުލުހުންގެ އިދާރާއާއި ދެކޮޅަށެވެ. އެއީ އަނިޔާވެރިގޮތެއްގައި މަރާލުމުގެ ކުރިން ހިމާޔަތް ދިނުމަށް އެދުމުން ފުލުހުން އެކަމަށް އިހުމާލްވެ، ހިމާޔަތް ދީފައިނުވާތީވެ ޔާމީން ރަޝީދުގެ އާއިލާއިން ފުލުހުންނާއި ދެކޮޅަށް ކޮށްފައިވާ ދައުވާއެކެވެ. އެ ދައުވާގައި ޔާމީން ރަޝީދުގެ އާއިލާއިން އެދިފައިވަނީ އިހުމާލްވެފައިވާކަން ސާބިތުކޮށްދިނުމަށެވެ.

އެ މައްސަލަ ފުރަތަމަ ޔާމީން ރަޝީދުގެ އާއިލާއިން ހުށައެޅީ ސިވިލް ކޯޓަށެވެ. ނަމަވެސް އެ ކޯޓުން ނިންމީ އެ މައްސަލަ ބެލެން ނެތް ކަމަށެވެ. ސަބަބެއް ކަމަށް އެ ކޯޓުން ބުނެފައިވަނީ ފުލުހުން އަމަލުކުރި ގޮތާއިމެދު ޝަކުވާއެއް އޮތް ނަމަ އެ މައްސަލައެއް ބެލުމަކީ ނޭޝަނަލް އިންޓަގްރިޓީ ކޮމިޝަން (އެންއައިސީ) ގެ ގާނޫނުުގެ ދަށުން އެ ކޮމިޝަނަށް އޮތް ބާރެއް ކަމަށެވެ. އެހެންކަމުން އެ މައްސަލަ އެންއައިސީ އަށް ހުށައަޅާފައިނުވާއިރު، އެ މައްސަލަ ސިވިލް ކޯޓުން ބެލުމަކީ އެންއައިސީގެ ގާނޫނުގެ މަގްސަދު ހާސިލް ނުވެދާނެ ކަމެއް ކަމަށް ނިންމުމުގައި ބުނެފައިވެއެވެ.

ޔާމީން ރަޝީދު މަރާލި މައްސަލައާ ގުޅިގެން ޖުމްލަ ހަތް މީހެއްގެ ދައުލަތުން ވަނީ ދައުވާކޮށްފަ އެވެ. އަދި އޭގެތެރެއިން 4 މީހަކު ވަނީ ދައުވާއަށް އިންކާރުކޮށްފަ އެވެ.

ޔާމީން މަރާލި މައްސަލައިގައި، ތޫނު އެއްޗެއް ބޭނުން ކޮށްގެން ގަސްދުގައި މީހަކު މެރުމުގެ ކުށުގެ ދައުވާ އުފުލައިފައިވަނީ މ. އަންނާރުމާގޭ އިސްމާއިލް ހައިޝަމް ރަޝީދާއި، މ. ކޮޅުފުށީ އީސްޓް ހުސައިން ޒިޔާދާއި، މ. ތާއިފް އިސްމާއިލް ރަޝީދާއި، މ. ކުދެހިގެ ހަސަން ޝިފާޒާއި، ގދ. ގައްދޫ ސިންދުބާދުގޭ މުހައްމަދު ދިފްރާނުގެ އިތުރުން މ. އިރާސްމިކުގެ އަހުމަދު ޒިހާން އިސްމާއިލްގެ މައްޗަށެވެ.

ޔާމީން ރަޝީދު މަރާލާފައި އޮއްވާ ފެނުނީ މިދިޔަ އަހަރުގެ އޭޕްރީލް މަހުގެ 23 ވަނަ ދުވަހުގެ ރޭ ދަންވަރުގެ ވަގުތެއްގައެވެ. އޭނާ މަރާލާފައި އޮއްވާ ފެނުނީ އޭނާ ދިރިއުޅެމުންދިޔަ މ. ސްޕެޓިއުލާގޭގެ ސިޑި ގޮޅި ކައިރިންނެވެ.