ވިނީ މަންޑޭލާއަށް އެންމެ ފަހުގެ އިހުތިރާމް އަދާކޮށްފި

މި މަހުގެ ދެވަނަ ދުވަހު އަވަހާރަވި ދެކުނު އެފްރިކާގައި ނަސްލީ ތަފާތުކުރުމާއި ދެކޮޅަށް މަސައްކަތްކުރެއްވި އަދި ކުރީގެ ފަސްޓް ލޭޑީ ވިނީ މަޑިކިޒެލާ-މަންޑޭލާއަށް އެންމެ ފަހުގެ އިހުތިރާމް އަދާކުރުމާއި ޖަނާޒާ ބުދަ ދުވަހު ބާއްވައިފިއެވެ.

އުމުުރުފުޅުން 81 އަހަރުގައި އަވަހާރަވި ވިނީއަށް އެންމެ ފަހުގެ އިހުތިރާމް އަދާކުރުން އޮތީ ޖޮހަނެސްބަރގްގެ އޯލާންޑޯ ސްޓޭޑިއަމްގައެވެ.

ސިޔާސީ ގޮތުން ޚިޔާލުތަފާތު ފަރާތްތަކާއި އެކި ޖަމްއިއްޔާތަކުގެ މެމްބަރުންނާއި އާއްމުން ހިމެނޭ ގޮތުން އެތައް ހާސް ބަޔަކު އެކަމަނާއަށް އެންމެފަހުގެ އިހުތިރާމް އަދާކުރުމަށް ގޮސްފައިވެއެވެ

ނާއިބު ރައީސް ޑޭވިޑް މަބޫޒާ ވެސް ވަޑައިގެންފައިވާއިރު އެ މަނިކުފާނުވަނީ ގައުމުގެ މަންމަ އަވަހާރަވުކީ ދުނިޔެ ހިތާމަކުރާ ކަމެއް ކަމަށް ވިދާޅުވެފައެވެ. އަދި މަބޫޒާ ވަނީ ނަސްލީ އިމްތިޔާޒާ ދެކޮޅަށް އެކަމަނާ ކުރެއްވި ހިތްވަރަށް ތައުރީފް ކުރައްވާފައެވެ.

ވިނީ އާއި އެކަމަނާގެ ކުރީގެ ފިރިކަލުން ނެލްސަން މަންޑޭލާއާ ދެ ބޭފުޅުން ވެސް ޖަލުބަންދުގައި އުޅުއްވާފައިވާއިރު އެ ދެބޭފުޅުންނަކީ ދެކުނު އެފްރިކާ އިން ނަސްލީ އިމްތިޔާޒާ ދެކޮޅަށް ކުރި ހަނގުރާމައިގެ ރަމްޒެކެވެ.

ވިނީ އަވަހާރަވީ މި މަހުގެ 2 ވަަނަ ދުވަހުގެ މެންދުރުގެ ވަގުތެއްގައިި، އާއިލާ އާއި ގާތް މީހުންގެ ހާޒިރުގައި ކަމަށް އާއިލާގެ ތަރުޖަމާނު ވިކްޓަރ ލަމީނީ ބުނެފައި ވެއެވެ. މި އަހަރު ފެށުނު ފަހުން އެކަމަނާގެ ބަލިހާލަތު ހުރި ގޮތުން ދޭތެރެ ދޭތެރެއިން ހޮސްޕިޓަލަށް ގެންގޮސް ފަރުވާ ދީފައި ވެއެވެ.

ވިނީ އަވަހާރަވި ޚަބަރާ އެކު އެކަމަނާއަށް ތާއީދުކުރާ އެތައް ބަޔަކު ބަނީ ޖޮހަނެސްބަރގްގައި ހުންނަ އެކަމަނާގެ ގެކޮޅަށް ޖަމާވެފައެވެ

ވިނީ އުފަންވެ ވަޑައިގެންފައި ވަނީ 1936 ވަނަ އަހަަރު އީސްޓަރން ކޭޕްގައެވެ.

އެކަމަނާއަކީ ތަމްރީނު ލިބިވަޑައިގެން ހުންނެވި އިޖުތިމާއީ ޚިދުމަތްތެރިއެކެވެ. މަންޑޭލާއާ 1950 ގައި ކައިވެނި ބައްލަވައިގެންފައިވާއިރު ދެ ބޭފުޅުންނަށް ދެ އަންހެން ބޭފުޅުން ލިބިވަޑައިގެންފައި ވެއެވެ.

މަންޑޭލާއާ ކައިވެނި ބައްލަވައިގެން 38 އަަހަރު ހޭދަކުރެއްވިއިރު މަންޑޭލާ ޖަލު ބަންދުގައި ހުންނަވަން ޖެހިވަޑައިގަތުމުން އޭގެ ތެރެއިން 30 އަކަށް އަހަރު އެކަމަނާ ހޭދަކުރެއްވީ ފިރިކަލުންނާ ވަކިންނެވެ.

މަންޑޭލާ އުމުރަށް ޖަލަށް ލެވުމުން، ނަސްލީ އިމްތިޔާޒާ ދެކޮޅަށް ކުރެވުނު މަސައްކަތުގައި ބެޓަން ހިއްޕެވީ އެކަމަނާއެވެ. އިންސާފާއި ހަމަހަމަކަމަށް ގޮވާލައި ކުރެވުނު މަސައްކަތާ ގުޅިގެން އެކަމަނާ ވެސް ޖަލަށް ގެންދެވުނެވެ.

އެކަަމަނާއަށް ތާއީދުކުރާ ފަރާތްތަކުން ސިފަކުރާ ގޮތުގައި އެކަމަނާއަކީ "ގައުމުގެ މަންމަ" އެވެ.

ގާނޫނީ މައްސަލަތަކާއި ސިިޔާސީ ކަންކަމާ ގުޅިގެން ފަހަކަށް އައިސް ވަނީ އެކަމަނާއާ މެދު ދެކޭ ގޮތް ބަދަލުވެފައެވެ.