ސީރިއާގެ ރައްޤާ ހިފުމުގެ އެންމެ ފަހުގެ ކުރިމަތިލުމަށް ކޯލީޝަނުން ތައްޔާރުވެއްޖެ

އިސްލާމިކް ސްޓޭޓް (އައިއެސް) ގެ ބާރުގެ ދަށުގައިވާ ސީރިއާގެ ރައްޤާ ހިފުމުގެ ކުރިމަތިލުމަށް އެމެރިކާ އިން ވާގިވެރިވާ އެސްޑީއެފްގެ ހަނގުރާމަވެރިން ތައްޔާރުވެއްޖެ އެވެ.

އެމެރިކާގެ މަދަދުދޭ ސީރިއަން ޑިމޮކްރެޓިކް ފޯސަސް (އެސްޑީއެފް) ގެ ތަރުޖަމާނާއި ހަވާލާދީ އަލްޖަޒީރާ އިން ބުނީ، ރައްޤާގައި އަތްގަދަކޮށްފައިވާ އައިއެސްގެ ހަނގުރާމަވެރިން ބަލިކޮށް، ރައްޤާ ހިފުމުގެ ކުރިމަތިލުމުގެ އެންމެ ފަހު މަރުހަލާ އާދީއްތަ ދުވަހުގެރޭ ފަށާނެ ކަމަށެވެ.

ކުރުދީ އަދި އަރަބި ހަނގުރާމަވެރިންގެ އިއްތިހާދެއް ކަމަށްވާ އެސްޑީއެފްގެ ތަރުޖަމާނު ތަލާލް ސީލޯ އަލްޖަޒީރާ އަށް ބުނީ، ރައްޤާގެ ކުރިމަތިލުންތަކުގެ ފަހު މަރުޙަލާ ފެށުމަށް ތައްޔާރުވެފައިވާ ކަމަށާއި، އެކަމަށް ނަގާނެ ސީދާ މުއްދަތެއް ވަޒަން ކުރަން ނޭނގޭ ކަމަށެވެ. އެހެންނަމަވެސް، އައިއެސްގެ ކިބައިން ރައްޤާ ހިފުމުގެ ކުރިމަތިލުންތަކަށް ގިނަ ވަގުތު ނުނަގާނެ ކަމަށް އުއްމީދު ކުރާ ކަމަށް އޭނާ ބުންޏެވެ.

އަދި ވަގުތު ނަގާނެ ކަމަށް ބެލެވެނީ ރައްޤާގައި އައިއެސްގެ ހަނގުރާމަވެރިން ޖަހާފައިވާ ދަންތުރަތަކާއި، ވަޅުލާފައިވާ މައިންތައް ސާފު ކުރުމަށް ކަމަށް އޭނާ ބުންޏެވެ.

ސީލޯ ބުނީ، ސީރިއާގައި އައިއެސްގެ ވެރިރަށުގެ ގޮތުގައި ތިން އަހަރެއްހާ ދުވަހު އޮތް ރައްޤާގައި އައިއެސްގެ 400 އާ 500 އާދެމެދުގެ އަދަދެއްގެ ހަނގުރާމަވެރިން ތިބޭނެ ކަމަށް ލަފާ ކުރެވޭ ކަމަށާއި، އައިއެސްގެ ހަނގުރާމަވެރިންގެ އަތް ދަށުން ރައްޤާގެ ގާތްގަނޑަކަށް 90 އިންސައްތަ ހިފާފައިވާ ކަމަށެވެ.

އެމެރިކާ އިސްވެ އޮވެ އުފައްދާފައިވާ ކޯލީޝަނުން ވައިގެ މަގުން ދޭ އެހީތެރިކަމާއެކު، ރައްޤާގެ ވަށައިގެން އެސްޑީއެފްގެ ހަނގުރާމަވެރިން އެއްގަމު މަގުން ރައްޤާ ހިފުމުގެ ކުރިމަތިލުން ފަށާފައިވަނީ ޖޫން މަހުގެ ފުރަތަމަ ހަފްތާގެ ތެރޭގައެވެ.

ރައްޤާގައި އައިއެސްގެ ހަނގުރާމަވެރިންގެ އަތްދަށުގައިވާ މަދު ސަރަޙައްދުތަކުގެ ތެރޭގައި ރައްޤާގައި ހުންނަ ޤައުމީ ހަސްފަތާލާއި ސްޓޭޑިއަމް ހުންނަ ސިޓީ ސެންޓަރ ހިމެނެ އެވެ.

އެމެރިކާ އިސްވެ އޮވެ އުފައްދާފައިވާ ކޯލީޝަނާއި އެސްޑީއެފްގެ ފައުޖުތަކުން ރައްޤާ ހިފުމަށް ކުރާ ހަނގުރާމާގައި ގިނަ އަދަދެއްގެ އާއްމުން މަރުވަމުންދާތީ، ޙައްޤުތަކަށް މަސައްކަތް ކުރާ ގްރޫޕްތަކާއި އެކްޓިވިސްޓުންގެ ފާޑު ކިޔުންތައް ވަނީ އަމާޒުވެފަ އެވެ.

އެހެންނަމަވެސް ކޯލީޝަނުން ވަނީ، ރައްޤާ ހިފުމަށް ކުރާ މަސައްކަތުގައި ކުށެއް ނެތް އާއްމުން މަރުވާ ނިސްބަތް ކުޑަ ކުރުމަށް އެޅެން ހުރި ހުރިހާ ފިޔަވަޅެއް އަޅާފައިވާ ކަމަށެވެ.

އެމެރިކާގެ ކޯލީޝަނުން އޯގަސްޓް މަހު އާއްމުކުރި ތަފާސްހިސާބުތައް ދައްކާ ގޮތުން ސީރިއާ އަދި އީރާޤްގައި އެމީހުން ހިންގާ އޮޕަރޭޝަންގައި މަރުވި އާއްމުންގެ އަދަދަކީ 685 އެވެ. އެއީ 2014 ވަނަ އަހަރު އީރާޤްގެ ފައުޖުތަކާއި ގުޅިގެން އައިއެސް އާދެކޮޅަށް އީރާޤްގައި ދިން ވައިގެ ހަމަލާތަކާއި، ސީރިއާގައި ދޭ ހަމަލާ ތަކުގައި މަރުވި އާއްމުންގެ އަދަދު ކަމަށް ކޯލީޝަނުން ބުނެއެވެ.

އެހެންނަމަވެސް ހައްގުތަކަށް މަސައްކަތް ކުރާ ގްރޫޕް ތަކުން ވަނީ، ކޯލީޝަނުން އާއްމުކުރި އަދަދު ދިމާ ނުވާ ކަމަށާއި، އެމެރިކާ ކޯލީޝަންގެ ހަމަލާތަކުގައި މަރުވި އާއްމުންގެ ނިސްބަތް އުޅޭނީ އެއަށްވުރެ މަތީގައި ކަމަށް ލަފާކުރާ ކަމަށް ބުނެފަ އެވެ.

އިނގިރޭސިވިލާތުގައި ގާއިމްވެފައިވާ ސީރިއަން އޮބްޒަވޭޓަރީ ފޯ ހިއުމަން ރައިޓްސްގެ ތަފާސްހިސާބުތައް ދައްކާ ގޮތުން، އަންހެނުންނާއި ކުޑަކުދިން ހިމެނޭ ގޮތަށް ރައްޤާގައި ކޯލިޝަނުން ދިން ވައިގެ ހަމަލާތަކުގައި މަރުވި އާއްމުންގެ އަދަދު އުޅެނީ ހާހަކަށްވުރެ މަތީގައެވެ.

ހަނގުރާމައިގެ ސަބަބުން ރައްޤާގައި ފަންސަވީސް ހާހަށްވުރެ ގިނަ އާއްމުން ތާށިވެފައިވާ ކަމަށް އދ.ގެ ތަފާސްހިސާބުތަކުން ދައްކައެވެ.

ސީރިއާގެ ރައީސް ބައްޝާރުލް އަސަދުގެ ސަރުކާރާއި ދެކޮޅަށް އެޤައުމުގައި 2011 ވަނަ އަހަރު ފެށި އިހްތިޖާޖުތަކުން އުފަންވި ދާޚިލީ ހަނގުމާގައި ހަތަރު ލައްކަ އަށްވުރެ ގިނަ އާއްމުން މަރުވެފައިވާ ކަމަށް ރިޕޯޓްތައް ބުނެއެވެ. އަދި ދާޚިލީ ހަނގުރާމައިގެ ސަބަބުން ސީރިއާ ދޫކޮށް އަވަށްޓެރި އެހެން ޤައުމުތަކުގެ ރެފިއުޖީ ކޭމްޕްތަކުން ހިމާޔަތް ހޯދާފައިވާ މީހުންގެ އަދަދު ފަސް މިލިއަނާއި ގާތް ކުރެއެވެ.