އިންޑިއާ އިން ހައްޖަށްދާ މީހުންގެ ކޯޓާ ސައުދީ އަރައްބިއްޔާ އިން އިތުރުކުރުމާ ގުޅިގެން އެކަމަށް އިންޑިއާގެ ޚާރިޖީ ވަޒީރު ސުޝްމާ ސުވަރާޖް މަރުހަބާ ވިދާޅުވެއްޖެއެވެ.

ސައުދީގެ އަލް ޖަންދްރިއާގައި އަހަރަކު އެއްފަހަރު ބާއްވާ ސައުދީގެ ގައުމީ އަދި ސަގާފީ ފެލްސިޓިވަލް ހުޅުވުމުގެ ރަސްމިއްޔާތުގައި ވާހަކަ ދައްކަވަމުން ސުޝްމާ ވިދާޅުވީ އިންޑިއާގެ ވަރަށް ގިނަ ރައްޔިތުންތަކެއް ހައްޖަށް ދާ ކަމަށާއި، ހައްޖު ކޯޓާ އިތުރުކޮށްދެއްވި ކަމަށްޓަކައި ސައުދީގެ ރަސްގެފާން ސަލްމާނަށް ވަރަށް ބޮޑަށް ޝުކުރު ދަންނަވާ ކަމަށެވެ.

ސުޝްމާ ސައުދީ އަށް ކުރައްވާ ދަތުރުފުޅުގައި ވަނީ ބުދަ ދުވަހު ރަސްގެފާނު ސަލްމާނާ ބައްދަލުކުރައްވާފައެވެ. އަދި ސައުދީގެ ފޮރިން މިނިސްޓަރު އާދިލް އަލް ޖުބައިރާ ވެސް، ސުޝްމާ ވަނީ ބައްދަލު ކުރައްވާފައެވެ.

އިންޑިއާ އިން ވަނީ ހައްޖަށް ދާ މީހުންގެ ކޯޓާ މިއަހަރުން ފެށިގެން 5،000 އަށް އިތުރުކޮށްދީފިއެވެ.

އިންޑިއާގެ ހައްޖު ކޯޓާ އިތުރުކޮށްދޭން ސައުދީން ނިންމީ އިންޑިއާގެ ޔޫނިއަން މައިނޮރިޓީ އެފެއާޒް މިނިސްޓަރު މުޚްތާރު އައްބާސް ނަގްވީ އާއި ސައުދީ ހައްޖު އެންޑް އުމްރާ މިނިސްޓަރު މުހައްމަދު ސާލިހު ބިން ތާހިރު ބަންތަންއާ އެކު ސޮއިކުރެއްވި އެއްބަސްވުމެއްގެ ތެރެއިންނެވެ.

އާ ކޯޓާގެ ދަށުން އިންޑިއާ އިން 1.75 ލައްކަ މީހުންނަށް މިހާރު ހައްޖަށް ދެވޭނެއެވެ. ސައުދީން މިދިޔަ އަހަރު ވަނީ އިންޑިއާގެ ހައްޖު ކޯޓާ އަށް 35،000 މީހުން އިތުރުކޮށްދީފައެވެ. އިންޑިއާގެ ޚާރިޖީ ވަޒީރު އަންގާރަ ދުވަހު ސައުދީއަށް ފެއްޓެވި ތިން ދުވަހުގެ ދަތުރުފުޅުގައި ސައުދީ ރަސްގެފާން ސަލްމާނާއި ޚާރިޖީ ވަޒީރު އާދިލް އަލް ޖުބައިރާ ވެސް ވަނީ ބައްދަލުކުރައްވާފައެވެ.