އަންހެނުންގެ ހައްގުތަކަށް އިހުތިރާމް ކުރާނަން: ޠާލިބާން
އިސްލާމީ އުސޫލުތަކާ އެއްގޮތަށް ހުރިހާ ކަމަކަށް ވެސް ޖާގަދޭނެ
ތާލިބާނުން ކުރިއަށް ގެންދިޔަ ނޫސްވެރިންގެ ބައްދަލުވުމުގެ ތެރެއިން،
އަންހެނުންގެ ހައްގުތަކަށް އިހުތިރާމް ކުރާނެ ކަމަށް ޠާލިބާނުން ބުނެފިއެވެ.
އަފްޣާނިސްތާނުގެ ސަރުކާރު އެމީހުންގެ ބާރުގެ ދަށަށް ގެނެސް ފުރަތަމަ ބޭއްވި ނޫސްވެރިންގެ ބައްދަލުވުމުގައި ޠާލިބާންގެ ތަރުޖަމާނު ޒަބިހުއްލާ މުޖާހިދު ވިދާޅުވީ, އެމީހުން އަންހެނުންގެ ހައްގުތަކަށް އިހުތިރާމުކުރާނެ ކަމަށެވެ. އަންހެނުން ވަޒީފާއަށް ނުކުތުމާއި, އަންހެން ކުދިން ތައުލީމު ހާސިލްކުރުމަށް ސްކޫލްތަކަށް ދިޔުމަށް ހުރަސް ނާޅާނެ ކަމަށް ވެސް ތަރުޖަމާނު ވިދާޅުވިއެވެ.
އިސްލާމީ އުސޫލުތަކާ އެއްގޮތަށް ހުރިހާ ކަމަކަށް ވެސް ޖާގަދޭނެ ކަމަށާއި، އަންހެނުންނާ މެދު އެއްވެސް ތަފާތު ކުރުމެއް ނުގެންގުޅޭނެ ކަމަށް ފާހަގަކުރެއްވިއެވެ.
މީގެ އިތުރުން ތަރުޖަމާނު ވިދާޅުވީ, ނޫސްވެރިކަމުގެ މިނިވަންކަމާއި, ޚިޔާލު ފާޅުކުރުމުގެ މިނިވަންކަމަށް ޖާގަ ދެވޭނެ ކަމަށެވެ. އަފްޣާންގެ ސަގާފަތާއި, އުސޫލުތަކުގެ ތެރެއިން މީޑިއާތަކަށް ވެސް ޖާގަދޭނެ ކަމަށް ތަރުޖަމާނު ވިދާޅުވިއެވެ.
ރައްޔިތުންގެ ގެދޮރަށް ވަދެ ކުރީގެ ސަރުކާރަށް ޚިދުމަތްކުރި މީހުންނަށް އެއްވެސް އަދަަބެއް ދިނުމުގެ ވިސްނުމެއް ނެތް ކަަމަށް ވެސް ތަރުޖަމާނު ވިދާޅުވިއެވެ.
އަންގާރަ ދުވަހުގެ ވަގުތެއްގައި ޠާލިބާނުންގެ އިސް ލީޑަރެއް ކަމަށްވާ މުއްލާ އަބްދުލް ޣަނީ ބަރަދާރ ވަނީ ކަންދަހާރަށް ވަޑައިގެންފައެވެ. އޭނާ އަފްޣާނަށް ވަޑައިގަތުން މިއީ އައު ސަރުކާރު އެކުލަވާލުމުގެ ސިގްނަލެއް ކަމަށްވަނީ ބެލެވެން ފަށާފައެވެ.
