ބޮލީވޫޑް އަދި ހޮލީވޫޑްގެ މަޝްހޫރު އެކްޓަރު އިރްފާން ޚާނަށް ނިއުރޯއެންޑޮކްރައިން ޓިއުމާ (ނެޓްސް) ނުވަތަ ބަނޑުގެ ކެންސަރު ޖެހުމުން އިތުރު ފަރުވާއަށް ލަންޑަނަށް ފުރާފައި ވަނީ މިދިޔަ މަހުގެ ތެރޭގައެވެ.
އޭނާ ލަންޑަނަށް ފުރި ފަހުން ބައްޔާ މެދު އެއްވެސް ޚަބަރެއް އޭނާގެ އާއިލާ އިން ވެސް އަދި އޭނާ ވެސް ހާމަކޮށްފައެއް ނުވެއެވެ. ފިލްމުތަކުގެ ޚަބަރުތައް ކަވަރު ކުރާ ޖާނަލިސްޓެއް ކަމަށްވާ އުމައިރު ސަންދޫ އޭނާގެ ޓްވިޓާގައި ބުނެފައި ވަނީ އިރުފާންގެ ހާލު ދަނީ ގޯސްވަމުން ކަމަށެވެ. އިރުފާންގެ އާއިލާ މީހަކާ ހަވާލާދީ އުމައިރު ބުނެފައި ވަނީ އިރުފާނަށް ކެންސަރު ޖެހިފައިވާއިރު އޭނާ ތަހައްމަލު ކުރަމުންދަނީ ކެންސަރުގެ އެންމެ ފަހުގެ ސްޓޭޖް ކަމަށެވެ.
އިރުފާން ރަނގަޅު ވާނެ ކަމަށް ޑޮކްޓަރުން އުއްމީދު ކަނޑާލާފައިވާއިރު އޭނާއަށް ދުނިޔޭގައި ހުރުމުގެ މުއްދަތަކަށް ދީފައި ވަނީ އެއްމަސް ދުވަސް ކަމަށް ވެސް އުމައިރުގެ ޓްވީޓްގައި ވަނީ ފާހަގަކޮށްފައެވެ.
އިރުފާން އިތުރު ފަރުވާއަށް ލަންޑަނަށް ފުރާފައިވާއިރު އޭނާ ވަނީ ފިލްމެއްގެ ޝޫޓިން ފެށުމަށް ތައްޔާރުވެފައެވެ. އޭނާގެ ބައްޔާ ގުޅިގެން އެ ފިލްމުގެ ޝޫޓިން ލަސްކޮށްލާފައިވާ އިރު އެފިލްމުގައި އޭނާއާ އެކު ފެނިގެންދާނީ ދިޕިކާ ޕަދުކޯންއެވެ.
އިރުފާން އޭނާގެ ބައްޔާ މެދު މީގެ މަހެއްހާ ދުވަސްކުރިން ކޮށްފައިވާ ޓްވީޓެއްގައި ބުނެފައި ވަނީ އޭނާ އަށް ނިއުރޯއެންޑޮކްރައިން ޓިއުމާ (ނެޓްސް) ޖެހިފައިވާ ކަމަށާއި އެއީ ބަނޑަށް ޖެހޭ ކެންސަރުގެ ބާވަތެއް ކަމަށެވެ. އަދި އެކަމަށް ފަރުވާ ހޯދުމަށް އިންޑިއާ ނޫން އެހެން ގައުމަކަށް ދާންޖެހިފައިވާ ކަމަށް އިރުފާނު ވަނީ ބުނެފައެވެ. އިރުފާން ބުނީ އޭނާ ބޭނުންވަނީ އެކަމުގައި އޭނާގެ ފޭނުންނާއި އާންމުންގެ ހެޔޮ ދުއާ ކަމަށެވެ. އޭނާއަށް ލަންޑަނުގައި ފަރުވާދެނީ އިންޑިއާ ޑޮކްޓަރެއްކަމަށާއި ޖެހިފައިވާ ބަލި ރަނގަޅު ކުރެވޭނެކަމަށް ޑޮކްޓަރުން ބުނެފައިވާކަމަށް ރިޕޯޓްތައް ބުނެއެވެ. އެހެންކަމުން ލަންޑަނުގައި އޭނާ ބަލި އެއްކޮށް ރަނގަޅުވަންދެން ހުންނާނެއެވެ.
އިރުފާން ވަނީ ބޮލީވޫޑްގެ މަޝްހޫރު ގިނަ ފިލްމުތަކެއްގައި ހަރަކާތްތެރިވެފައެވެ. އެގޮތުން "މުމްބާއީ މެރީ ޖާން،" "ޕީކޫ"، "ލައިފް އިން އަ މެޓްރޯ" "ދަ ލަންޗްބޮކްސް"، "ހައިދަރު" އަދި "ތަލްވާރު" ފަދަ މޮޅެތި ފިލްމުތައް ފާހަގަކޮށްލެވެއެވެ. ޓީވީ ސީރީޒްއެއް ކަމަށްވާ "ޝްރީކާންތު" އިން 1985 ވަނަ އަހަރު ކެރިއަރު ފަށައި 1988 ވަނަ އަހަރު "ސަލާމް މުބްއީ" ގެ ކުޑަ ރޯލަކުން ބޮލީވުޑަށް ތައާރަފްވި އިރުފާން ވަނީ ހޮލީވޫޑްގައި މަސައްކަތްކޮށް "ސްލަމްޑޯގް މިލިއަނާ" އިން އޮސްކާ ވެސް ހާސިލްކޮށްފައެވެ. އޭގެ އިތުރު ބޮޑެތި ބަޖެޓްތަކުން އުފެއްދި ކާމިޔާބީތައް ހޯދި ހޮލީވޫޑްގެ ފިލްމްތައް ކަމަށްވާ "ދަ އެމޭޒިން ސްޕައިޑާ މޭން" އާއި "ލައިފް އޮފް ޕައި،" އަދި "އިންފާނޯ" ގައި ވެސް މުހިންމު ރޯލުތައް ކުޅެފައި ވެއެވެ. "މީގެ އިތުރުން ބޮކްސް އޮފީހުގައި ބޮޑު ކާމިޔާބެއް ހޯދި "ދަ ޖަންގަލް ބުކް" އަށް އަޑު އަޅައިދީފައި ވެއެވެ. އިރުފާން މުހިންމު ރޯލަކުން ފެނިގެންދިޔަ "ޖުރަސިކް ވާރލްޑް"އަކީ ބޮކްސް އޮފީހުގެ ތާރީހުގައި ވެސް ހަފުތާއެއްގެ ތެރޭގައި 500 މިލިއަން ޑޮލަރު ހޯދި ފުރަތަމަ ފިލްމެވެ. އަދި މިހާތަނަށް ތިން ވަނަ އަށް އެންމެ ގިނަ ފައިސާ ހޯދި ހޮލީވޫޑްގެ ފިލްމަކީ ވެސް އެއީއެވެ. އެ ފިލްމުގައި އޭނާ އަދާކޮށްފައިވާ ސިމޮން މަސްރާނީގެ ކެރެކްޓާ އަށް ގިނަ ބަޔަކު ތައުރީފްކޮށްފައި ވެއެވެ.
