މާލޭގެ ދެކުނު ފަރާތު ފަޅު ބޭނުންކުރުން މަނާކޮށްފި
10 އެޕްރީލު 2018 | އަންގާރަ 11:36ވިލާ ކޮލެޖުގެ ހުޅަނގު ކަނުން ފެށިގެން އިރަށް ގޮސް ޕޮލިސް ޓޯޔާޑާ ހަމައަށް އޮންނަ ފަޅުގެ ސަރަހައްދު ބޭނުންކުރުން މަނާ
މާލޭ އިންޑިއަސްޓްރިއަލް ވިލެޖް ސަރަހައްދު
މާލޭ ދެކުނު ފަރާތު ބޮޑުތަކުރުފާނު މަގު ތަރައްގީ ކުރުމުގެ މަސައްކަތް ފަށާފައިވާތީ މުދާ އުފުލާ ދޯނިފަހަރަށް މާލޭ ދެކުނު ފަރާތު ފަޅު ބޭނުންކުރުން މަނާކޮށްފިއެވެ. ހައުސިން މިނިސްޓްރީން ނެރުނު އިއުލާނެއްގައި ބުނީ ބޮޑުތަކުރުފާނުމަގު ރަނގަޅު ފެންވަރަކަށް ހަދަން، އެ ސަރަހައްދު ފަޅުތެރެއަށް ބަދަލުތަކެއް ގެންނަންޖެހޭ ކަމަށެވެ. އެހެންވެ، މުދާއުފުލާ އުޅަނދުފަހަރަށް ވިލާ ކޮލެޖުގެ ހުޅަނގު ކަނުން ފެށިގެން އިރަށް ގޮސް ޕޮލިސް ޓޯޔާޑާ ހަމައަށް އޮންނަ ފަޅުގެ ސަރަހައްދު ބޭނުންކުރުމަށް މިއަދުން ފެށިގެން ހުއްދަ ދޫނުކުރާ ގޮތަށް ނިންމާފައިވާ ކަމަށެވެ. އެ ސަރަހައްދު ބޭނުންކުރާ އުޅަނދުފަހަރު، މިމަހުގެ 8 ވަނަ ދުވަހުގެ ފަހުން އެ ސަރަހައްދު ބޭނުން ކުރުމަކީ މަނާ ކަމެއްކަން ފާހަގަކުރައްވާ ހައުސިން މިނިސްޓްރީން ބުނީ މިއެންގުމާ ހިލާފުވާ އުޅަނދުފަހަރު އެސަރަހައްދުން ނަގާނެ ކަމަށެވެ. ސިނާއީ ސަރަހައްދުން ފެށިގެން އެމްޓީސީސީގެ ހުޅުމާލެ ފެރީ ޓާމިނަލްއާ ހަމައަށް މަގު ފުޅާކުރަން ނިންމާފައިވާ ކަމަށް ހައުސިން މިނިސްޓްރީން ބުނެއެވެ. ބޮޑުތަކުރުފާނު މަގު ރަނގަޅު ފެންވަރަކަށް ތަރައްގީކުރުމަށް ސަރުކާރުން ކުރިއަށް ގެންދާ މަޝްރޫއުގެ ދަށުން ކަމަށް ބުނެ، އެސަރަހައްދުގައި އިންދާފައި ހުރި ގަސްތައް ވެސް ދަނީ ކަނަޑަމުންނެވެ. އަދި ގަސްތައް ކަަނޑާ ނެގި ނަމަވެސް މަޝްރޫއު ނިމުމުން 450 އެއްހާ ގަސް އިންދާނެ ކަމަށް ހައުސިން މިނިސްޓްރީން ބުނެއެވެ. މާލޭގެ ބޮޑުތަކުރުފާނު މަގު ފުޅާކޮށް އެ މަގު ރަނގަޅު ފެންވަރަކަށް ހަދަން ނިންމީ މާލެ އާއި ހުޅުލެއާ ގުޅުވައިދޭ ބްރިޖު މިއަހަރުގެ ތެރޭގައި ހުޅުވުމުން މާލޭގެ ޓްރެފިކް ބާރުބޮޑުވެދާނެތީ އެކަމަށް ހައްލެއް ހޯދުމަށެވެ.
ހައުސިން މިނިސްޓަރު ޑރ. މުހައްމަދު މުއިއްޒު މިދިޔަ މަހުގެ ފަހުކޮޅު ވިދާޅުވެފައި ވަނީ ބްރިޖަށް ދަތުރުކުރާ މަގުތައް ފުޅާކުރާއިރު 16 މީޓަރު ހުންނާނެ ކަމަށެވެ. އަދި މަގު ފުޅާކުރާ ސަރަހައްދުގައި ޖުމްލަ ހަތަރު ލޭން އޮންނާނެ ކަމަށް ވެސް މިނިސްޓަރު ވިދާޅުވިއެވެ.
