ހަ މަސްދުވަހަށް ފަހު ފަރިތަކުރުންތަކުގައި ނޯޔާ ބައިވެރިވެއްޖެ

ބަޔާން މިއުނިކަށް ކުޅެމުން އަންނަ ޖަރުމަނުގެ އެއް ނަމްބަރު ކީޕަރު މެނުއެލް ނޯޔާ ހަ މަސްދުވަހަށް ފަހު އެ ޓީމުގެ ފަރިތަކުރުންތަކުގައި ބައިވެރިވެއްޖެއެވެ.

ނޯޔާއަށް އަނިޔާވީ މިދިޔަ އަހަރުގެ ސެޕްޓެމްބަރު މަހުގެ ތެރޭގައެވެ. ބަޔާންގެ ފަރިތަކުރުންތަކުގެ ތެރެއިން އޭނާގެ ފަޔަށް ލިބުނު އަނިޔާއަކާ ގުޅިގެން ނޯޔާ ވަނީ ފައިގެ ސާޖަރީއެއް ވެސް ފުރިހަމަކޮށްފައެވެ. ނޯޔާގެ ފައިގެ ކައްޓަށް ގެއްލުން ވެފައިވާ ކަމަށް ބަޔާންގެ ޑޮކްޓަރުން ބުނިއިރު މިދިޔަ ސީޒަނުގެ ގިނަ މެޗުތަކެއް ވެސް އޭނާގޭ ފަޔަށް ލިބުނު އަނިޔާއަކާ ގުޅިގެން ގެއްލުނެވެ. މި އަނިޔާގެ ސަބަބުން މިދިޔަ ސެޕްޓެމްބަރު މަހުގެ ފަހުން އޭނާ އެއްވެސް މެޗެއް ކުޅެފައެއް ނުވެއެވެ.

އެހެން ނަމަވެސް ނޯޔާ ވަނީ ހަ މަސްދުވަހުގެ ތެރޭގައި ފުރަތަމަ ފަހަރަށް ބުރާސްފަތި ދުވަހު ފަރިތަކުރުންތަކުގައި ބައިވެރިވެފައެވެ. އޭނާ ވަނީ ބޯޅައާ އެކު ބައެއް ގޯލްކީޕިން ޑްރިލްތަކެއް ފުރިހަމަކޮށްފައެވެ. ބަޔާންގެ ވެބްސައިޓުގައި އެ ޓީމުން އާންމުކުރި ބަޔާނެއްގައި ވަނީ ހަ މަސްދުވަހުގެ ތެރޭގައި ފުރަތަމަ ފަހަރަށް ނޯޔާ ލައިޓް ޓްރެއިނިން ސެޝަންތަކެއް ފުރިހަމަކޮށްފައިވާ ކަމަށާއި އޭނާއާ އަމާޒުކުރި ހަމަލާތައް ހުށިޔާރު ކަމާއެކު ފަރިތަކުރުންތަކުގައި ދިފާއުކުރި ކަމަށެވެ.

ނޯޔާގެ އަނިޔާއާ ގުޅިގެން ބަޔާންގެ ގޯލު ބަލަހައްޓަމުން އަންނަނީ ބަދަލު ކީޕަރު ސްވެން އުލްރެއިޗްއެވެ. އަނިޔާއިން ސަލާމަތްވުމުގެ އެންމެ ފަހު މަރުހަލާއެއްގެ ގޮތުން ނޯޔާ ވަނީ ހާއްސަ ސްކޭންތަކެއް ވެސް ފުރިހަމަކޮށްފައެވެ. އޭނާގެ ރިކަވަރީގެ ކަންކަން ބިނާކުރަމުންދަނީ އެ ސްކޭންތަކުގެ ނަތީޖާއަށް ބެލުމަށް ފަހުއެވެ.

ބަޔާންގެ އޮފިޝަލް ޓީވީ ޗެނަލާ ވާހަކަ ދައްކަމުން ނޯޔާ ބުނީ އޭނާގެ ފަޔަށް މިހާރު އެއްވެސް ވަރަކަށް ތަދުނުވާ ކަމަށާއި ދުވުމުގެ ތަމްރީނުތަކެއް ވެސް ފުރިހަމަކޮށްފައިވާ ކަމަށެވެ. އެގޮތުން ދުވުމުގެ ތަމްރީނުތައް ފުރިހަމަކުރެވުމަކީ އަނިޔާ އިން އެނބުރި އާދެވޭނެ ކަމުގެ ފެހި ސިގްނަލެއް ކަމަށާއި ހުރިހާ ކަމެއް ވެސް ކުރިޔަށް ގެންދަނީ ވަރަށް ފަރުވާތެރިކަމާ އެކު ކަމަށް ނޯޔާ ބުނެފައި ވެއެވެ.

އަނިޔާ ރަނގަޅުވަމުންދާ ނަމަވެސް އެއްވެސް ހާލެއްގައި ކުޅުމުގެ ތެރެއަށް އާދެވޭނެ ދުވަހެއް ޔަގީންކޮށް ބުނަން ނޭނގޭ ކަމަށް ނޯޔާ ބުނެފައިވެއެވެ. އޭނާ ބުނީ ކަންކަން އަވަސްކޮށްލައިފި ނަމަ ލިބޭ ގެއްލުން މާ ބޮޑުވާނެ ކަމަށާއި އޭނާގެ ކެރިއަރު ނިމުމަކީ ވެސް އެކަށީގެންވާ ކަމެއް ކަމަށެވެ. ނޯޔާ ބުނީ ކަންކަން ރޭވުމެއްގެ ދަށުން ކުރިޔަށް ގެންދަނީ އެ ސަބަބަށްޓަކައި ކަމަށާއި ހުރިހާ ކަމެއް ވެސް ކުރަމުންދަނީ ފިޔަވަޅަކަށް ފަހު ފިޔަވަޅެއް ކަމަށެވެ.

ބަޔާންގެ ޓީމަށް ނޯޔާއަށް ނުކުޅެވުމާއެކު އޭނާއަށް ވަނީ އެ ގައުމުގެ ގައުމީ ޓީމުން ވެސް ފުރުސަތު ގެއްލިފައެވެ. ޖަރުމަނުގެ ގައުމީ ޓީމުގެ ކެޕްޓަންކަން ވެސް ކުރަމުންދިޔަ ނޯޔާއާ ގުޅޭގޮތުން އެ ޓީމުގެ ކޯޗު ޔޯކިމް ލޯ ބުނެފައި ވަނީ ނޯޔާ ވޯލްޑް ކަޕްގައި ކުޅެން ބޭނުންވާ ނަމަ ސީޒަނުގެ ކޮންމެ ވެސް ހިސާބަކުން ފެންނަންޖެހޭ ކަމަށެވެ. ޖަރުމަނުގެ ގައުމީ ޓީމުގައި ނޯޔާގެ މަގާމު މިހާރު ފުރަމުން އަންނަނީ ބާސެލޯނާގެ ކީޕަރު މާކް އެންޑަރ ޓާސްޓީޖެންއެވެ.