ސަލްމާންގެ މައްޗަށް 5 އަހަރުގެ ޖަލުގެ ހުކުމެއް

މީގެ ވިހި އަހަރު ކުރިން 1998 ވަނަ އަހަރު ސަލްމާން ޚާން ކުޅެފައިވާ ފިލްމު "ހަމް ސާތު ސާތު ހޭ" ގެ މަންޒަރުތަކެއް ނަގަން އުޅުމުގެ ތެރޭގައި ހިމާޔަތް ކޮށްފައިވާ ފުއްލާގެ ވައްތަރެއް ކަމަށްވާ ބްލެކްބަކް ކިޔާ ޖަނަވާރެއް މަރާލުމުގެ ކުށް އޭނާގެ މައްޗަށް ސާބިތުވެއްޖެއެވެ.

ބުރާސްފަތި ދުވަހު ޖޯދުޕޫރުގެ ކޯޓުން ވަނީ ސަލްމާންގެ މައްޗަށް އެކުށް ސާބިތުވާކަމަށް ހުކުމްކޮށް 5 އަހަރުގެ ޖަލުގެ ހުކުމެއް ކޮށްފައެވެ.

ފަސް އަހަރަށް ޖަލަށްލުމުގެ އިތުރުން ސަލްމާންގެ މައްޗަށް ކޮށްފައިވަނީ 10،000 ރުޕީސް އިން ސަލްމާން ޖޫރިމަނާ ކުރުމަށެވެ. ބްލެކްބަކްގެ ގަޔަށް ބަޑިޖަހާ މަރާލާފައިވަނީ ސަލްމާން ޚާން ކަމަށް އެ ހާދިސާ ހިނގި ކަމަށް ބުނާ ވަގުތު ސަލްމާން ދުއްވި ވެހިކަލްގެ ޑްރައިވަރު އަދި މި މައްސަލައިގެ އެންމެ މުހިއްމު ހެކިވެރިޔާ ހަރީޝް ދުލާނީ ވަނީ ބުނެފައެވެ.

ސަލްމާން އެ ޖަނަވާރުންގެ ގަޔަށް ބަޑިޖެހިތަން ފެނުނު ކަމަށް ބުނެ ބަޔާން ދީފައިވަނީ ވެސް ހަރީޝް އެވެ.

ހަމަ އެފަހަރު ވަނީ ސަލްމާންއަށް އެހެން ދައުވާއެއް ވެސް ހަރީޝް ކޮށްފައެވެ. އެއީ ހިމާޔަތްކުރެވިފައިވާ ދެ ޖަނަވާރެއް ޝިކާރަކުރިކަމުގެ ދައުވާއެވެ. އެހެން ނަމަވެސް އެ ދައުވާ ސަލްމާންގެ މައްޗަށް ސާބިތު ވެފައެއް ނުވެއެވެ.

ސަލްމާންއާއި އެކު 1998 ވަނަ އަހަރު "ހަމް ސާތު ސާތު ހޭ" ގެ މަންޒަރުތަކެއް ނަގަން އުޅުނީ ފިލްމީ ތަރި ސައިފް އަލީ ކާންއާއި، ތާބޫ، ސޮނާލީ ބެންދްރޭ އަދި ނީލަމްއެވެ. އެމީހުން ވަނީ މިދައުވާތަކުން ސަލާމަތްވެފައެވެ.

މީގެ ދެއަހަރު ކުރިން ވެސް ވަނީ ސަލްމާން ހާން ދުއްވި ކާރަކުން ޖެހި، މީހަކު މަރުވި މައްސަލާގައި ފަސް އަހަރަށް ޖަލަށް ލާން އޭނާގެ މައްޗަށް ހުކުމް ކޮށްފައެވެ. އެހެން ނަމަވެސް ބޮމްބޭ ހައި ކޯޓުން ވަނީ ސަލްމާން ހާންގެ މައްޗަށް ދަށު ކޯޓުން ހިންގި ޝަރީއަތަކީ ފުރިހަމަ ޝަރީއަތެއް ނޫން ކަމަށް ބުނެ، އެ ހުކުމް ބާތިލް ކޮށްފަ އެވެ.

ސަލްމާނަށް މިއަދު ކުރި ހުކުމް އިސްތިއުނާފު ކުރުމުގެ މަސައްކަތް އޭނާގެ ގާނޫނީ ވަކީލުން މިހާރު ދަނީ ކުރަމުންނެވެ،