މުދާ އުފުލޭ ގަޑިތަކަށް ސަރުކާރުން ގެނައި ބަދަލާއެކު، މަޖޫރީންނަށް ނެގޭނެ އަގުތައްވެސް ސަރުކާރުން ކަނޑައަޅައިފި އެވެ. 

މަޖޫރިންނަށް ނެގޭނެ އަގުތައް ސަރުކާރުން ކަނޑައަޅާފައިވަނީ، ކުއްލި ގޮތަކަށް މުދާ އުފުލާ ގަޑިތަކަށް ސަރުކާރުން ގެނައި ބަދަލާއެކުގައި މަޖޫރީންގެ މަސައްކަތުގެ އަގު ދެގުނަ ބޮޑުކޮށްފައި ވަނިކޮށެވެ. 

އިކޮނޮމިކް މިނިސްޓްރީން ކުރި އިއުލާނެއްގައި ބުނެފައިވަނީ މުދާ ހުސް ކުރުމަށް ނެގޭނެ އެންމެ ބޮޑު އަގު (މަޖޫރީންނަށް ނެގޭނެ އެންމެ ބޮޑު އަގު) ކަނޑައެޅީ މުދާ ލިބިގަންނަ ފަރާތްތަކާއި ހިދުމަތް ލިބިގަންނަ ފަރާތްތަައް ހިމާޔަތް ކުރުމުގެ ގާނޫނުގެ ދަށުން މިނިސްޓްރީއަށް ލިބިގައިވާ ބާރުގެ ދަށުން ކަމަށެވެ. އަދި މާލޭގައި މުދާ އުފުލާ ގަޑިތަކަށް ބަދަލު ގެނައުމުން މުދަލުގެ އަގު ބޮޑުވާ ގޮތަށް ބައެއް ފަރާތްތަކުން މަސައްކަތް ކުރާ ކަމަށްވެސް އެ އިއުލާންގައި ބުނެގައިވެއެވެ.

އިކޮނޮމިކް މިނިސްޓްރީން ކަނޑައަޅާފައިވާ ގޮތުގައި މަޖޫރީންނަށް ހެނދުނު 6:00 އިން ރޭގަނޑު 12 އަށް ބިއްލޫރި ޝީޓް ފިޔަވައި އެހެން ބާވަތްތަކުގެ 20 ފޫޓް ކޮންޓެއިނަރ އަކަށް ނެގޭނީ 2500 ރުފިޔާ އަށް ކަމަށެވެ. އަދި 40 ފުޓް ކޮންޓެއިނަރަކުން ނެގޭނީ 5000 ރުފިޔާ ކަމަށާއި، ބިއްލޫރި ޝީޓް ހިމެނޭ ކޮންޓެއިނަރެއްނަމަ 20 ފޫޓް ކޮންޓެއިނާއެއް 4000 ރުފިޔާ އަދި 40 ފުޓް ކޮންޓެއިނަރަކުން ނެގޭނީ 7000 ރުފިޔާ ކަމަށް އިއުލާންގައި ބުނެފައިވެއެވެ.

އޭގެއިތުރުން މެންދަމު 12:00 އިން ހެނދުނު 6:00 އަށް ބިއްލޫރިޝީޓް ފިޔަވައި އެހެން ބާވަތްތަކުގެ ކޮންޓެއިނަރެއް ނަމަ 20 ފޫޓް ކޮންޓެއިނަރަކަށް ނެގޭނީ 4500 ރުފިޔާ އަދި 40 ފޫޓް ކޮންޓެއިނަރަކަށް ނެގޭނީ 7000 ރުފިޔާކަމަށް އިކޮނޮމިކް މިނިސްޓްރީން ބުނެ އެވެ. އަދި ބިއްލޫރި ޝީޓްގެ 20 ފޫޓް ކޮންޓެއިނަރަކުން 4500 ރުފިޔާ ނެގޭނެކަމަށާއި،  40 ފޫޓް ކޮންޓެއިނަރަކުން ނެގޭމީ 7500 ރުފިޔާކަމަށް އިއުލާންގައި ބުނެފައިވެއެވެ. 

އެއް ކޮންޓެއިނާގައި ގިނަ ފަރާތުން ގެންނަ މުދާ ވަކި ވަކިން ހުސްކުރުމަށް ވެސް މިނިސްޓްރީން އަގު ކަނޑައަޅާފައެވެ. އެގޮތުން ބިއްލޫރި ޝީޓް ފިޔަވައި އެހެން ބާވަތްތަކުން އެއް ކިއުބިކް މީޓަރުން ފެށިގެން ފަސް ކިއުބިކް މީޓަރާ ހަމަައަށް ނެގޭނީ 250 ރުފިޔާކަމަށާއި، އަދި ހަ ކިއުބިކް މީޓަރުން ފެށިގެން 10 ކިއުބިކް މީޓަރާ ހަމައަށް 175 ރުފިޔާ އެވެ. 

ބިއްލޫރި ޝީޓަށް އަގު ނެގޭނީ އެއް ކިއުބިކް މީޓަރުން ފެށިގެން ފަސް ކިއުބިކް މީޓަރާ ހަމަައަށް 250 ރުފިޔާ އަދި ހަ ކިއުބިކް މީޓަރުން ފެށިގެން 10 ކިއުބިކް މީޓަރާ ހަމައަށް 200 ރުފިޔާކަމަށް މިނިސްޓްރީން ބުނެ އެވެ.