އިނގިރޭސިވިލާތުގެ ގައުމީ ޓީމުގެ ކުރީގެ ކެޕްޓަން އަދި ޗެލްސީގެ ކުރީގެ މިޑްފީލްޑަރު ރޭ ވިލްކިންސް މަރުވެއްޖެއެވެ.

އުމުރުން 61 އަހަރުގެ ވިލްކިންސް މަރުވެފައިވަނީ ހާޓް އެޓޭކެއް ޖެހުމުގެ ސަބަބުން ލަންޑަނުގެ ސެއިންޓް ޖޯޖްސް ހޮސްޕިޓަލުގައި ފަރުވާ ދެމުން ދަނިކޮށެވެ. ރޭގެ އާއިލާއިން ވަނީ އޭނާގެ ސަޕޯޓަރުންނާއި އެކުވެރިންގެ ފަރާތުން ލިބެމުންދާ މެސެޖުތަކަށް ޝުކުރު އަދާކޮށްފައެވެ. އޭނާގެ އާއިލާއިން ނެރުނު ބަޔާނެއްގައި ވަނީ އިންތިހާ ހިތާމަޔާއެކު އޭނާ މަރުވި ހަބަރު އާންމުކުރާ ކަމަށާއި މި އުނދަގޫ ދަނޑިވަޅުގައި އާއިލާގެ އިހުސާސުތަކައް ހުރިހާ ފަރާތްތަކުން ވެސް އިހުތިރާމްކުރަން އެދޭ ކަމަށެވެ.

ޗެލްސީގެ ކެޕްޓަންކަން އަދި އެ ޓީމުގެ އެސިސްޓަންޓް ކޯޗުކަން ވެސް ކުރި ރޭ މަރުވުމާއި ގުޅިގެން އެ ޓީމުން ނެރުނު ބަޔާނެއްގައި ވަނީ އޭނާގެ މަރާއެކު ދިމާވެފައިވާ ހިތާމައިގެ ވަގުތުކޮޅުގައި ޓީމުގެ ހުރިހާ އެންމެން ވެސް ބައިވެރިވާ ކަމަށާއި އަދި އޭނާއަކީ އަބަދު ވެސް އެ ޓީމުގެ ތާރީހުގައި ރަން އަކުރުން ލިޔެވިގެންދާނެ ކުޅުންތެރިޔެއް ކަމަށެވެ. ވިލްކިންސް މަރުވިއިރު އޭނާ މަސައްކަތްކުރަމުން ދިޔައީ ޓީވީ އަދި ރޭޑިއޯ އެނަލިސްޓެއްގެ ގޮތުގައެވެ.

ވިލްކިންސްގެ މަރާއެކު ގިނަ ބަޔަކު އަންނަނީ ހިތާމަ ފާޅުކުރަމުންނެވެ. އެގޮތުން އޭނާއާއެކު އިނގިރޭސި ގައުމީ ޓީމަށް ކުޅުނު ގެރީ ލިނެކާ ބުނެފައިވަނީ އޭނާއަކީ މޮޅު ކުޅުންތެރިޔެއް ކަމަށާއި އަދި ވަރަށް ރަނގަޅު މީހެއް ކަމަށެވެ. އަދި އޭނާއާއެކު ކުޅުމުގެ ފުރުސަތު ލިބިފައިވުމަކީ ޝަރަފެއް ކަމަށާއި އޭނާއަށް އެހެން އެއްވެސް މީހަކު އެހީނުވާ ވަރަށް ވިލްކިންސް އެހީތެރިވި ކަމަށެވެ. އެލަން ޝިއަރާ ވެސް ބުނެފައިވަނީ ވިލްކިންސްއާއެކު އޭނާއަށް މަސައްކަތްކުރަން ފުރުސަތު ލިބިފައިވުމަކީ ވެސް ނަސީބެއް ކަމަށެވެ.

ވިލްކިންސްގެ ކެރިއަރުގައި އޭނާ ވަނީ ޗެލްސީ، މެންޗެސްޓާ ޔުނައިޓެޑް، ކުއީންސް ޕާކް ރޭންޖާސް (ކިއުޕީއާރް) އަދި ކްރިސްޓަލް ޕެލަސްއަށް ވެސް ކުޅެފައެވެ. އޭނާވަނީ އިޓަލީގެ އޭސީ މިލާން އަދި ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އަށްވެސް ކުޅެފައެވެ. އިނގިރޭސި ގައުމީ ޓީމަށް ވިލްކިންސް 84 މެޗު ކުޅެފައިވާއިރު އޭނާ ވަނީ އެ ގައުމަށް ތިން ލަނޑު ޖަހައިދީފައެވެ. އޭގެތެރެއިން 10 މެޗުގައި އޭނާ ވަނީ އިނގިރޭސި ގައުމީ ޓީމުގެ ކެޕްޓަން ބޭންޑް އަޅައިގެން ކުޅެފައެވެ.

ހަމައެހެންމެ އޭނާ ވަނީ ޗެލްސީގެ ކޯޗުގެ މަގާމާއި ކާލޯ އަންޗެލޯޓީ އަދި ގޫސް ހިޑިންކް ހުރި ދުވަސްވަރު އެ ޓީމުގެ އެސިސްޓަންޓް ކޯޗުގެ މަގާމު ވެސް އަދާކޮށްފައެވެ. ވިލްކިންސް ވަނީ މެންޗެސްޓާ ޔުނައިޓެޑްގައި އޭނާ ހޭދަކުރި ދުވަސްތަކުގައި އެ ޓީމާއެކު އެފްއޭ ކަޕެއް އަދި ޗެރިޓީ ޝީލްޑެއް ކާމިޔާބު ކޮށްފައެވެ. އޭނާއަކީ ދެ ފަހަރެއްގެ މަތިން ޗެލްސީގެ އެންމެ މޮޅު ކުޅުންތެރިޔާގެ މަގާމު ވެސް ހޯދާފައިވާ ކުޅުންތެރިޔެކެވެ.