މަޔާމީ އޯޕެންގެ ޗެމްޕިއަންކަން އިސްނާ ހޯދައިފި

އެމެރިކާގެ މަޔާމީގައި ކުރިޔަށް ދިޔަ މަޔާމީ މާސްޓާސް އޯޕެން ޓެނިސް މުބާރާތުގެ ޗެމްޕިއަންކަން އެ ގައުމުގެ ޖޯން އިސްނާ ހޯދައިފިއެވެ.

އިސްނާ މި މުބާރާތުގެ ޗެމްޕިއަންކަން ހޯދީ ފައިނަލުގައި ޖަރުމަނުގެ ޒުވާން ޓެނިސް ކުޅުންތެރިޔާ އެލެކްޒެންޑްރާ ޒްވަރޭޒް ދެ ސެޓު އެއް ސެޓުން ބަލިކޮށްގެންނެވެ. މި މެޗުގެ ފުރަތަމަ ސެޓު 7-6 އިން ޒްވަރޭވް ގެންދިޔައިރު އިސްނާ ވަނީ ފަހުން ކުޅުނު ދެ ސެޓު 6-4 އަދި 6-4 އިން ގެންގޮސް މެޗު ކާމިޔާބު ކޮށްފައެވެ. މި މެޗު ވަނީ ދެ ގަޑިއިރާއި 29 މިނެޓަށް ދެމިގެންގޮސްފައެވެ.

މި މުބާރާތުގެ ފައިނަލްއިން އިސްނާ ޖާގަ ހޯދީ ސެމީގައި އާޖެންޓީނާގެ ހުއާން މާޓިން ޑެލްޕޮޓްރޯ ސީދާ ދެ ސެޓުން ބަލިކޮށްގެންނެވެ. ހަމައެހެންމެ ޒްވަރޭވް ފައިނަލަށް ދަތުރުކުރީ ސެމީގައި ސްޕެއިންގެ ޕަބްލޯ ކަރޭނާ ބުސްޓާ ސީދާ ދެ ސެޓުން ބަލިކޮށްގެންނެވެ.

މުބާރާތުގެ ޗެމްޕިއަންކަން ހޯދުމަށް ފަހު ވާހަކަ ދައްކަމުން އިސްނާ ބުނީ މިދިޔަ އަހަރުގައި ދަށް ކުޅުމެއް ދެއްކުމަށް ފަހު މިއަހަ މުބާރާތެއް ކާމިޔާބުކުރެވުމަކީ ލިބޭ ވަރަށް ބޮޑު ހިތްހަމަޖެހުމެއް ކަމަށެވެ. އޭނާ ބުނީ ފުރަތަމަ މެޗު ވެސް ނިމުނީ ތިން ސެޓުން ކަމަށާއި އެހާ ހިސާބުން ފެށިގެން އަމިއްލަ ނަފުސަށް އޮތް އިތުބާރު ބޮޑުވެގެން ދިޔަ ކަމަށެވެ. މިއީ އިސްނާގެ ކެރިއަރުގައި އޭނާ ކާމިޔާބުކުރި މާސްޓާސް ފެންވަރުގެ ފުރަތަމަ މުބާރާތެވެ. މީގެކުރިން އޭނާވަނީ ތިން މާސްޓާސް މުބާރާތެއްގެ ފައިނަލްއިން ބަލިވެފައެވެ.

އަންނަ އަހަރު މި މުބާރާތް އެހެން ސަރަހައްދެއްގައި ބާއްވާއިރު މިއަހަރުގެ މުބާރާތުގެ އަންހެން ސިންގަލްސް އިވެންޓުގެ ޗެމްޕިއަންކަން ވެސް ހޯދާފައިވަނީ އެމެރިކާއަށް ނިސްބަތްވާ ކުޅުންތެރިޔެއް ކަމަށްވާ ސްލޮއާން ސްޓެފަންސްއެވެ.