ރާއްޖޭގެ އެންމެ ގިނަ ދުވަސްވީ ސިނަމާ އޮލިމްޕަސް ހިންގުމާ, ޕަބްލިކް ސަރވިސް މީޑިއާ (ޕީއެސްއެމް) އިން ހަވާލުވެއްޖެއެވެ.
މިހާތަނަށް އޮލިމްޕަސް ހިންގަމުން އައީ މިނިސްޓްރީ އޮފް ޔޫތު އެންޑް ސްޕޯޓްސްގެ ދަށުގައި އޮންނަ ނޭޝަނަލް ސެންޓާ ފޯ ދި އާޓްސް (އެންސީއޭ) ގެ ބެލުމުގެ ދަށުންނެވެ.
ޕީއެސްއެމްގެ ރަސްމީ ޓްވިޓާ އެކައުންޓުން ހޯމަދުވަހުގެ ރޭ ކޮށްފައިވާ ޓްވީޓެއްގައި ބުނެފައި ވަނީ އޮލިމްޕަސް ހިންގުމާ ހަވާލުވީ ރައީސުލްޖުމުހޫރިއްޔާ އަބްދުﷲ ޔާމީންގެ ސަރުކާރުން ކުރިއަށް ގެންދާ ޒުވާނުންގެ އެޖެންޑާ ތަންފީޒުކުރުމުގެ ދަށުން ކަމަށެވެ.
"އަދި ބައިނަލް އަޤްވާމީ ފެންވަރުގައި ފަންނުވެރިން ތަމްރީނުކޮށް މުނިފޫހި ފިލުވުމުގެ ދާއިރާއަށް ކުރިން ނުލިބޭ ފަދަ ފުރުސަތުތަކެއް ތަނަވަސްކޮށްދޭނެ" ކަމަށް އެ ޓްވީޓުގައި އިތުރަށް ބުނެފައި ވެއެވެ.
އޮލިމްޕަސް ހުޅުވާފައި ވަނީ 1959 މޭ 21 ގައެވެ. އޭގެ ފަހުން އޮލިމްޕަސް ޒަމާނީ ފެންވަރަށް ތަރައްގީކޮށް ބޮޑު ބަދަލަކާ އެކު އަލުން ހުޅުވީ ކުރީގެ ރައީސް ޑރ. މުހައްމަދު ވަހީދު ހަސަންގެ ވެރިކަމުގައި 01 މާރޗް 2013 ގައެވެ.
