އޮލިމްޕަސްގެ ޕްލޭބެކް ސިސްޓަމަށް އެރޯ އަރައިގެން ތިޔަލޯތްބާއި ދުރަށް ދެއްކުން މެދުކެނޑިފައި

އޮލިމްޕަސްގެ ޕްލޭބެކް ސިސްޓަމަށް އެރޯއެއް އަރައިގެން ތިޔަ ލޯތްބާއި ދުރަށް ދެއްކުން މެދުކެނޑިފައިވާ ކަމަށް އެފިލްމުގެ ޑައިރެކްޓަރ މަރިޔަމް މޫސާ(މަރީ) ބުނެފިއެވެ.

ތިޔަ ލޯތްބާ ދުރަށް ދައްކަން ފަށާފައި ވަނީ މިމަހުގެ 21 ގައެވެ.

މަރީ ބުނީ އޮލިމްޕަސްގެ ޕްލޭބެކް ސިސްޓަމަށް އެރޯއެއް އަރައިގެން ފިލްމުގެ އެކި ހިސާބުތަކުގައި އޯޑިއޯ އާއި ވިޑިއޯ ދިމާނުވުމާއި ބައެއް ހިސާބުތަކުގައި ބްލެކްއައުޓް އަރާފައިވާ ކަމަށެވެ.

އެކަން އެހެން ދިމާވީ އޮލިމްޕަހުގެ ޕްލޭބެކް ޕީސީގެ މައްސަލައަކާ ގުޅިގެން ކަމަށް އޮލިމްޕަހުން މައުލޫމާތުދޭ ކަމަށް އޭނާ ބުންޏެވެ. އަދި އާދީއްތަ ދުވަހު އެފިލްމު ބެލިމީހުންނަށް އެކަންތައްތައް ދިމާވެފައިވާ ކަމަށާއި އެކަމާއިގުޅިގެން އެފަރާތްތަކުން ވަނީ ހިތްހަމަ ނުޖެހުން ފާޅުކޮށްފައި ކަމަށް އޭނާ ބުންޏެވެ.

މަރީ ބުނީ ތިޔަލޯތްބާއި ދުރަށްގެ ފިލްމަށް ދިމާވި ކަންތައްތަކާއި ގުޅިގެން ބެލުންތެރިންގެ ކިބައިން އެޓީމުން މާފަށް އެދޭކަމަށެވެ.

އަދި ކުރިއަށް ހުރި ތިން ޝޯކަމަށްވާ މިމަހުގެ 26،27،28 ގައި ފިލްމު ދައްކާއިރު އެކަންތައްތައް ރަނގަޅުވާނެކަމުގެ ޔަގީންކަން އޮލިމްޕަހުން ދީފައިވާ ކަމަށް އޭނާ ބުންޏެވެ. މަރީގެ ވާހަކައަކަށް ހަދާފައިވާ ތިޔަ ލޯތްބާއި ދުރަށްގެ ފިލްމުގެ ކާސްޓުންގެ ތެރޭގައި ހިމެނެނީ އަހުމަދު އަޒްމީލް (އަޒޭ)، މަލީހާ ވަހީދު (މަލް) އަދި އަހުމަދު އަމަން (ޓޮމް)އަދި މަރިޔަމް ޝަހްޒާ އެވެ.

ފިލްމުގެ ކެމެރާމަން އަކީ އަލީ ރަޝީދު (ގޮޅާ އައްޔަ) އެވެ. ކުރީގެ ލަވަކިޔުންތެރިޔާ އަލީ ރަމީޒުގެ ދެ ލަވައެއް ހިމަނައިގެން އުފައްދާފައިވާ މިފިލްމުގައި ޖުމްލަ ހަތަރު ލަވަ ހިމެނެއެވެ. ފިލްމު ޕްރޮޑިއުސް ކޮށްފައިވަނީ ޓެކްނޯ މީޑިއާ އިންނެވެ. ޓެކްނޯމީޑިއާއިން ބުނީ ފިލްމަށް ލިބޭ ތަރުހީބަށް ބެލުމަށް ފަހު ރާއްޖޭގެ ރަށްރަށުގައި ފިލްމު އަޅުވާނެ ކަމަށެވެ.