ޕްލޭނަކީ ރެއާލްގައި ދިގު މުއްދަތެއް ވަންދެން ދެމިހުރުން: ޒިދާން

މި ސީޒަނަށްފަހު ރެއާލް މެޑްރިޑް ދޫކޮށްލަން އުޅޭ ވާހަކަތަކަކީ ދޮގު ވާހަކަތަކެއް ކަމަށާއި ޕްލޭނަކީ އެ ޓީމުގައި ދިގު މުއްދަތެއް ވަންދެން ދެމިހުރުން ކަމަށް އެ ޓީމުގެ ކޯޗު ޒައިނުއްދީން ޒިދާން ބުނެފިއެވެ.

ޖެހިޖެހިގެން ތިންވަނަ ފަހަރަށް ޗެމްޕިއަންސް ލީގު ކާމިޔާބު ކުރުމަށް ރެއާލްއިން މަސައްކަތްކުރަމުން އަންނައިރު ސްޕެނިޝް ލަލީގާ ދިފާއު ކުރުމަށް އެ ޓީމަށް ވަނީ ފުރުސަތު ގެއްލިފައެވެ. ލީގުގައި ބާކީ ނުވަ މެޗު އޮތްއިރު އެ ޓީމު އޮތީ އެއްވަނައިގައި އޮތް ބާސެލޯނާއަށްވުރެ 15 ޕޮއިންޓް ފަހަތުން ތާވަލުގެ ތިންވަނައިގައެވެ. ދެވަނައިގައި އޮތް އެޓްލެޓިކޯއަށްވުރެ އެ ޓީމު އޮތީ ހަތަރު ޕޮއިންޓް ފަހަތުގައެވެ. މިކަމުގެ ސަބަބުން ޒިދާންއަށް ބޮޑު ގޮންޖެހުންތަކަކާއި ފާޑުކިޔުންތަކާއި ވަނީ އަމާޒުވެފައެވެ.

ނޫސްވެރިންނާއި ވާހަކަ ދައްކަމުން ޒިދާން ބުނީ އޭނާގެ އަތްމަތީގައި ކަންކަން ނިންމުމުގެ ބާރު އޮތްނަމަ އޭނާ ޓީމުގައި މަޑުކުރާނެ ކަމަށާއި ރެއާލްގައި ވީހާވެސް ގިނަ ދުވަހު ދެމިހުރުމަށް އޭނާ ކުރިން ބުނި ވާހަކަ އަނެއްކާ ވެސް ތަކުރާރުކޮށްލަން ބޭނުންވާ ކަމަށެވެ. އޭނާ ބުނީ ރެއާލްގައި މަޑުކުރަން ބޭނުންވަނީ އޭނާއަކީ ފުޓްބޯޅައަށް ވަރަށް ޝައުގު ހުންނަ މީހަކަށް ވާތީ ކަމަށާއި ހުރިހާ ކަމެއް ވެސް ބިނާވެފައިވަނީ ނެރޭ ނަތީޖާތަކުގެ މައްޗަށް ކަމަށެވެ. އޭނާ ބުނީ ރެއާލްގައި އޭނާ މަސައްކަތްކުރާތާ 18 އަހަރު ވެފައިވާ ކަމަށާއި އެހެންކަމުން ކްލަބް މަސައްކަތްކުރާ ގޮތް ވަރަށް ރަނގަޅަށް އެނގޭ ކަމަށެވެ.

ޒިދާން ބުނީ ތަށި ދިފާއުކުރުމަށް ކުރަން ޖެހޭ ކަމަކީ މެޗުތައް ކާމިޔާބުކުރުން ކަމަށާއި ސީޒަން ނިމެންދެން އެކަން އެގޮތަށް ދެމެހެއްޓުމަކީ ބުރަ މަސައްކަތެއް ކަމަށެވެ. އޭނާ ބުނީ އެއީ އުނދަގޫ ކަމެއްކަން ހުރިހާ ކުޅުންތެރިންނަށް ވެސް އެނގޭ ކަމަށާއި ކުޅުންތެރިންގެ ފަރާތުން އެކަން ކުރުމަށް ހިތްވަރާއި މަސައްކަތް ފެންނަމުންދާ ކަމަށެވެ. އަދި އަބަދުވެސް ވިސްނަނީ ކުރިޔަށް އޮންނަ މެޗަށް ކަމަށާއި އެގޮތަށް ކުރިޔަށްދާނަމަ ތަށި ވެސް ލިބޭނެ ކަމުގެ އުއްމީދު އެބައޮތް ކަމަށް ޒިދާން ބުނެފައިވެއެވެ.

މި ސީޒަނުގައި ރެއާލްއަށް ދިމާވެފައިވާ އެންމެ ބޮޑު މައްސަލައަކީ އެއް ފެންވަރެއްގައި ކުޅުމުގެ ފެންވަރު ނުހިފެހެއްޓުމުގެ މައްސަލައެވެ. އަމިއްލަ ދަނޑުގައި ދެވަނަ ޑިވިޝަނުގެ ޓީމުތައް ރެއާލްއަށް ބަލިކުރެވިފައި ނުވާއިރު ބައިކޮޅަށް ވަންނަ ލަނޑުތައް ވެސް ވަނީ މިދިޔަ ސީޒަނާއި އަޅާބަލާއިރު ވަރަށް ބޮޑުތަނުން އިތުރުވެފައެވެ.

އެޕްރީލް މަހަކީ ޗެމްޕިއަންސް ލީގުގައި ރެއާލްއަށް މުހިންމު މަހަކަށްވާއިރު ޗެމްޕިއަންސް ލީގުގެ ކުއާޓާގައި އިޓަލީގެ ޔުވެންޓަސްއާ ދެކޮޅަށް ދެ ލެގު އެ ޓީމު ކުޅޭނެއެވެ. މި މެޗުތަކަށް ނުކުންނައިރު އެ ޓީމަށް ލިބޭނެ އެންމެ ބޮޑު ހިތްހަމަޖެހުމަކީ ފަހުގެ ތާރީހުގައި ޔުވެންޓަސްއާ ދެކޮޅަށް އެ ޓީމު ނެރެފައިވާ ނަތީޖާތަކެވެ.