ފުލުހުންނާ ގުޅޭ 36 މައްސަލައެއް އެންއައިސީއަށް ހުށަހަޅައިފި
އެންއައިސީއަށް މިއަދު ހުށަހެޅީ އަނިޔާ ލިބުނު 36 މީހެއްގެ މައްސަލަ
އެމްޑީޕީގެ ޗެއާރޕާސަން ހަސަން ލަތީފް އާއި ނާއިބު ރައީސް މުހައްމަދު ޝިފާޒު އަދި ޖެނެރަލް ސެކްރެޓަރީ އަނަސް އަބްދުއްސައްތާރު އެންއައިސީ އަށް ވަޑައިގެން
އެކެއް ފެބްރުއަރީގައި ސުޕްރީމް ކޯޓުން ނެރުނު އަމަރު ތަންފީޒު ކުރުމަށް ގޮވާލައި ދިވެހި ގިނަ އަދަދެއްގެ ރައްޔިތުން އިހުތިޖާޖު ކުރަމުން ދަނިކޮށް، ކުއްލި ނުރައްކަލުގެ ހާލަތު އިއުލާންކޮށް، އިހުތިޖާޖު ކުރަމުންދިޔަ ގިނަ އަދަދެއްގެ ދިވެހި ރައްޔިތުން ހައްޔަރުކޮށް، ފުލުހުންގެ އަމަލު ކޮށްފައިވާ ގޮތުގެ މައްސަލަތަކެއް ނޭޝަނަލް އިންޓެގްރިޓީ ކޮމިޝަނަށް ހުށަހަޅައިފި އެވެ.
އެމްޑީޕީގެ ޗެއާރޕާސަން ހަސަން ލަތީފް ވިދާޅުވީ ނޭޝަނަލް އިންޓެގްރިޓީ ކޮމިޝަނަށް އަންގާރަ ދުވަހު ހުށަހަޅާފައި ވަނީ ކުއްލި ނުރައްކަލުގެ ހާލަތުގެ ދަށުން ކަމަށް ބުނެ، ފުލުހުން ހައްޔަރުކޮށް، އަނިޔާ ލިބުނު މީހުންގެ ތެރެއިން 36 މީހެއްގެ މައްސަލަ ކަމަށެވެ. އަދި މީގެ އިތުރުން ވެސް ގިނަ އަދަދެއްގެ ބަޔަކު ހައްޔަރުކޮށް، ފުލުހުން އަނިޔާކޮށްފައިވާ ކަމަށް ބުނެ އެމްޑީޕީއަށް މައްސަލަތަކެއް ހިއްސާކޮށްފައިވާ ކަމަށާއި އެމައްސަލަތައް ވެސް ދިރާސާކުރުމަށް ފަހު އެންއައިސީއަށް ހުށަހަޅާނެ ކަމަށް ވެސް ހަސަން ލަތީފް ވިދާޅުވި އެވެ.
އެމްޑީޕީގެ ޗެއާރޕާސަން ހަސަން ލަތީފް އާއި ނާއިބު ރައީސް މުހައްމަދު ޝިފާޒު އަދި ޖެނެރަލް ސެކްރެޓަރީ އަނަސް އަބްދުއްސައްތާރު އެންއައިސީ އަށް ވަޑައިގެން އަނިޔާ ލިބިފައިވާ ފަރާތްތަކާއެކު މައްސަލަތައް ހުށަހަޅުއްވަނީ
"ސުޕްރީމް ކޯޓުގެ އަމުރު ތަންފީޒު ކުރަމަށް ގޮވާލާ އިހުތިޖާޖު ކުރަމުންދަނިކޮށް ފުލުހުންގެ މުއައްސަސާއިން ވަރަށް ގިނަ އަދަދެއްގެ ރައްޔިތުންގެ ވަނީ ހައްޔަރުކޮށްފަ.، ގާނޫނާ ހިލާފަށް އަދި ބައެއް މީހުން ހައްޔަރު ކޮށްފައިވަނީ ވަރަށް ބޮޑަށް އަނިޔާ ލިބޭ ގޮތަށް،" ހަސަން ލަތީފް ވިދާޅުވި އެވެ.
ހަސަން ލަތީފް ވިދާޅުވީ ފުލުހުން އާންމު ރައްޔިތުން ހައްޔަރު ކުރުމާއި ފުލުހުން އަނިޔާ ކުރުމާއި ގުޅިގެން އެ ފަރާތްތަކުން އެމައްސަލަތައް ނޭޝަނަލް އިންޓެގްރިޓީ ކޮމިޝަނަށް ހުށަހަޅަން ބޭނުންވާ ކަމަށާއި އެ މައުލޫމާތުތައް އެމްޑީޕީއާ ހިއްސާކުރަމުން ދާތީ އެ ފަރާތްތަކާއެކު އެ މައްސަލަތައް ނޭޝަނަލް އިންޓެގްރިޓީ ކޮމިޝަނަށް ހުށަހެޅުމުގެ މަސައްކަތް ފަށާފައިވާ ކަމަށެވެ.
"އެނގިވަޑައިގަންނަވާނެ ކުއްލި ނުރައްކަލުގެ ހާލަތުގައި 300 އަށް ވުރެ ގިނަ މީހުން ހައްޔަރު ކުރެވުނު. އޭގެ ތެރެއިން ގިނަ ފަރާތްތަކަކީ މިމައްސަލަތައް ހުށަހަޅަން ބޭނުންވި ފަރާތްތައް. އަނިޔާ ލިބުނު ފަރާތްތަކާއެކު މިއަދު ނޭޝަނަލް އިންޓެގްރިޓީ ކޮމިޝަނަށް މިހުށަހެޅީ 36 މީހެއްގެ މައްސަލަ. އެހެން ނަަމަވެސް އަޅުގަނޑުމެންގެ އަތުގައި ޕްރޮސެސް ކުރުމުގެ ތެރޭގައި އެބަހުރި ބައެއް ފޯމްތައް،" ހަސަން ލަތީފް ވިދާޅުވި އެވެ.
އެމްޑީޕީގެ ޗެއާރޕާސަން ހަސަން ލަތީފް އާއި ނާއިބު ރައީސް މުހައްމަދު ޝިފާޒު އަދި ޖެނެރަލް ސެކްރެޓަރީ އަނަސް އަބްދުއްސައްތާރު އެންއައިސީ އަށް ވަޑައިގެން އަނިޔާ ލިބިފައިވާ ފަރާތްތަކާއެކު މައްސަލަތައް ހުށަހަޅުއްވަނީ
މީގެއިތުރުން ހަސަން ލަތީފް ވިދާޅުވީ ފުލުހުންގެ މުއައްސަސާއިން ހިންގާ ޣައިރު ގާނޫނީ އަމަލުތަކާއި ގުޅޭ ވަކިވަކި ފުލުހުންގެ މައްސަލަތައް ނޭޝަނަލް އިންޓެގްރިޓީ ކޮމިޝަނަށް ހުށަހެޅުމަށް ތައްޔާރުވަމުންދާ ކަމަށެވެ.
"ފުލުހުންގެ މުއައްސަސާއިން އެހިންގާ ޣައިރު ގާނޫނީ އަމަލުތައް ތަންފީޒު ކުރުމަށް ގްރައުންޑްގައި އަމަލީ ގޮތުން މަސައްކަތްކުރާ ފުލުހުން އެބަތިބި. ކަނޑައެޅިގެން ގާނޫނާ ހިލާފަށް އަމަލު ކުރާ ފުލުހުން، އެފަރާތްތައް އަޅުގަނޑުމެންނަށް ފާހަގަވާ މިންވަރަކުން އެ ވަކިވަކި ފުލުހުންގެ މައްސަލަތައްވެސް މިދަނީ ހުށަހަޅަމުން،" ހަސަން ލަތީފް ވިދާޅުވި އެވެ.
ފުލުހުންގެ މުއައްސަސާއިން ކުރާ ޣައިރު ގާނޫނީ އަމުރުތައް ތަންފީޒު ނުކުރާނެ ކަމަށް ބުނާ ފުލުހުން އިރާދަ ކުރެއްވިއްޔާ ފެނިގެންދާނެ ކަމަށް ވެސް ހަސަން ލަތީފް ވިދާޅުވި އެވެ.
"މިކަމަކީ އެއްދުވަހަކުން ދެ ދުވަހަކުން ނިންމަން ފެށި މަސައްކަތެއް ނޫން. އަޅުގަނޑުމެންނާ ދޭތެރޭގައި ގާނޫނާ ހިލާފަށް އަމަލުކުރާ މީސްމީހުންގެ މައްސަލަތައް ހުށަހަޅަން އެއީ މި ޕާޓީން ވެސް ބޭނުންވާ ކަމެއް. އަދި ހަމައެހެންމެ، ރައްޔިތުންގެ ބޭނުންވާ ކަމެއް. އެކަން މިފެށީ،" ހަސަން ލަތީފް ވިދާޅުވި އެވެ.
