ސިޓީ ދޫކޮށްލަން އަގުއޭރޯ ނިންމައިފި

މެންޗެސްޓާ ސިޓީއަށް ކުޅެމުން އަންނަ އާޖެންޓީނާގެ ފޯވާޑް ސާޖިއޯ އަގުއޭރޯ އެ ޓީމު ދޫކޮށްލުމަށް ނިންމައިފިއެވެ.

އުމުރުން 29 އަހަރުގެ އާޖެންޓީނާގެ ބައިނަލްއަގްވާމީ ފޯވާޑް ސިޓީ ދޫކޮށްލަން ނިންމާފައިވަނީ އޭނާ ތަމްރީނުވި ޓީމު ކަމަށްވާ އާޖެންޓީނާގެ ލީގުގައި ކުޅެމުން އަންނަ އިންޑެޕެންޑިއެންޓޭއަށެވެ. އޭނާގެ ކެރިއަރު 1997 ވަނަ އަހަރު އެ ކްލަބްއިން ފެށިއިރު އޭނާ ވަނީ އެ ކްލަބްގައި ނުވަ އަހަރު ހޭދަކޮށްފައެވެ. އެ ކްލަބްގައި ނުވަ އަހަރު ހޭދަކުރުމަށް ފަހު އޭނާ ބަދަލުވީ ސްޕެއިންގެ އެޓްލެޓިކޯ މެޑްރިޑްއަށެވެ.

ސިޓީއަށް އަގުއޭރޯ ބަދަލުވީ 2011 ވަނަ އަހަރު ކަމަށްވާއިރު އޭނާވަނީ އެ ޓީމާއެކު ދެ ޕްރިމިއާ ލީގު ތަށި ކާމިޔާބު ކޮށްފައެވެ. މި ސީޒަނުގެ ޕްރިމިއާ ލީގުގެ ތަށި ވެސް އެ ޓީމުން ޔަގީންކޮށްފައިވާއިރު އަގުއޭރޯ ވަނީ މި ސީޒަނުގައި މޮޅު ކުޅުމެއް ދައްކާފައެވެ. މިހާރު ކުޅެމުންދާ ބައިނަލްއަގްވާމީ އެއްވެސް މެޗެއްގައި އަގުއޭރޯއަށް އާޖެންޓީނާގެ ސްކޮޑުން ފުރުސަތު ދީފައެއް ނުވެއެވެ. އޭނާއަށް ފުރުސަތު ދީފައިނުވަނީ ކަކުލަށް ލިބިފައިވާ އަނިޔާއެއްގެ ސަބަބުންނެވެ.

ފޮކްސް ސްޕޯޓްސްއާ ވާހަކަ ދައްކަމުން އަގުއޭރޯ ބުނީ ސިޓީއާއެކު އޭނާ ހަދާފައިވާ ކޮންޓްރެކްޓް 2020 ވަނަ އަހަރު ހަމަވުމާއެކު އޭނާ އެންމެ ކުޑައިރު ކުޅުނު ޓީމު ކަމަށްވާ އިންޑެޕެންޑިއެންޓޭއަށް އެނބުރި ދިޔުމަށް ނިންމާފައިވާ ކަމަށެވެ.

މި ސީޒަނުގެ ޕްރިމިއާ ލީގުގައި ސިޓީ އޮތީ ތާވަލުގެ ކުރީގައި 16 ޕޮއިންޓްގެ ލީޑަކާއެކުއެވެ. އަގުއޭރޯ ވަނީ ޕްރިމިއާ ލީގުގައި ސިޓީއަށް 21 ލަނޑު ޖަހައިދީފައެވެ. ހަމައެހެންމެ އިނގިރޭސި ލީގު ކަޕް ސިޓީއިން ކާމިޔާބުކޮށްފައިވާއިރު ސިޓީއިން ވަނީ އަގުއޭރޯގެ މޮޅު ކުޅުމާއެކު ޔުއެފާ ޗެމްޕިއަންސް ލީގުގެ ކުއާޓާ ފައިނަލުން ޖާގަ ހޯދާފައެވެ. މި ސީޒަނުގެ މިހާތަނަށް އަގުއޭރޯ ވަނީ ސިޓީއަށް 30 ލަނޑު ޖަހައިދީފައެވެ.

ސިޓީގައި ހޭދަކުރި ހަތް ސީޒަނުގައި އަގުއޭރޯ ވަނީ އެ ޓީމަށް 289 މެޗު ކުޅެދީ 199 ލަނޑު ޖަހައިދީފައެވެ. ސިޓީއާއެކު ހަ ތައްޓެއް އަގުއޭރޯ ކާމިޔާބުކޮށްފައިވާއިރު އޭނާވަނީ 2014 ވަނަ އަހަރުގެ ރަން ބޫޓު ވެސް ހޯދާފައެވެ.