މި ސީޒަނަށް ފަހު ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އިން ބޮޑު ބަދަލުތަކެއް ފެނިގެންދާނެ ކަމަށް އެ ޓީމަށް ކުޅެމުން އަންނަ އާޖެންޓީނާގެ ވިންގަރ އެންހެލް ޑިމަރިއާ ބުނެފިއެވެ.

މި ސީޒަނުގެ ޗެމްޕިއަންސް ލީގު ހޯދުމަށް ޕީއެސްޖީ އިން ވަނީ ބޮޑު ހަރަދުތަކެއް ކޮށްފައެވެ. އެގޮތުން އެ ޓީމުން ވަނީ މިދިޔަ ހޫނު މޫސުމުގެ ޓްރާންސްފާ މާކެޓުގައި 400 މިލިއަން ޔޫރޯއަށް ވުރެ ބޮޑު އަދަދެއް ހަރަދުކޮށް މޮޅު ކުޅުންތެރިން އެ ޓީމަށް ގެނެސްފައެވެ. އެގޮތުން ބާސެލޯނާއަށް ކުޅުނު ބްރެޒިލްގެ ފޯވާޑް ނޭމާ އަދި މޮނާކޯއަށް ކުޅުނު ފްރާންސްގެ ޒުވާން ފޯވާޑް ކިލިއަން އެމްބާޕޭ އެ ޓީމަށް ގެނެސްފައިވަނީ ބޮޑު އަދަދަކަށެވެ. އެހެން ނަމަވެސް ރެއާލް މެޑްރިޑް އަތުން 5-2 ގެ އެގްރިގޭޓް ނަތީޖާއަކުން އެ ޓީމު ވަނީ ބަލިވެ ޗެމްޕިއަންސް ލީގުން ކަޓާފައެވެ.

އެކަމާ ގުޅޭ ގޮތުން ވާހަކަ ދައްކަމުން ޑިމަރިއާ ބުނީ ޗެމްޕިއަންސް ލީގުން ކަޓާނެ ކަމަށް ހީނުކުރާ ކަމަށާއި ކެޓުން ވެގެންދިޔައީ ބޮޑު ޝޮކަކަށް ކަމަށެވެ. އޭނާ ބުނީ ކުޅުންތެރިން ހޯދުމަށް 400 މިލިއަން ޔޫރޯ ހޭދަކުރުމާ ގުޅިގެން ކްލަބުން ވެސް ވަރަށް ބޮޑު އުއްމީދުތަކެއް ކުރި ކަމަށާއި ނޭމާ ހުރުމާ އެކު އެ އުއްމީދުތައް ބޮޑުވެގެން ދިޔަ ކަމަށެވެ. އޭނާ ބުނީ ކުއާޓާއިން ޖާގަ ނުލިބި ޗެމްޕިއަންސް ލީގުން ކެޓުމާއެކު މެނޭޖްމަންޓްގެ ބޮޑު ހިތްހަމަނުޖެހުންތަކެއް އެބަހުރި ކަމަށާއި އެކަމާ ގުޅިގެން ޓީމުން ބޮޑު ބަދަލުތަކެއް ފެނިގެންދާނެ ކަމަށް ގަބޫލުކުރާ ކަމަށެވެ.

އޭނާ ބުނީ ސަޕޯޓަރުންގެ ޝަކުވާ ހުންނާނެ ކަމަށް ގަބޫލުކުރާ ކަމަށާއި އެއީ އާ ކުޅުންތެރިންނާ އެކު ވެސް އެންމެ ބޭނުންވާ ހިސާބަށް ނުދެވުމާ ގުޅިގެން ކަމަށެވެ. އޭނާ ބުނީ ބަލިވި ނަމަވެސް ހިތްވަރު ދެރަކޮށްގެން ނުވާނެ ކަމަށާއި އަބަދުވެސް ދާން ޖެހޭނީ ކުރިޔަށް ކަމަށެވެ. މިވަގުތު ވެސް ތިން މުބާރާތް ކާމިޔާބުކުރުމުގެ ފުރުސަތު އެބައޮތް ކަމަށާއި އެ ތިން މުބާރާތް ވެސް ކާމިޔާބުކުރުމަށް މަސައްކަތްކުރާނެ ކަމަށެވެ. އޭނާ ބުނީ އެކަން ކުރެވިއްޖެ ނަމަ ސީޒަން ކާމިޔާބު ކަމުގެ ހެއްކަކަށް ވެގެންދާނެ ކަމަށެވެ.

ފްރެންޗް ލީގުގެ އެއްވަނައިގައި އެ ޓީމު އޮތީ 17 ޕޮއިންޓްގެ ލީޑަކާ އެކުއެވެ. މި ސީޒަނުގެ މިހާތަނަށް އެ ޓީމު ކުޅުނު 47 މެޗުގެ ތެރެއިން 40 މެޗު ކާމިޔާބުކޮށްފައިވާއިރު ބަލިވެފައި ވަނީ އެންމެ ފަސް މެޗުންނެވެ. ބާކީ ދެ މެޗު ނިމިފައި ވަނީ އެއްވަރުވެގެންނެވެ.