ކުއްލި ނުރައްކަލުގެ ހާލަތުގެ ދަށުން ހައްޔަރުކޮށްފައިވާ މީހުންނަށް އައްޔަނުކުރެވޭނީ 3 ވަކީލުން ކަމަށް އަންގައިފި
21 މާރިޗު 2018 | ބުދަ 17:28އެކަން އަންގާފައިވަނީ ކްރިމިނަލް ކޯޓުގެ ރަޖިސްޓްރާ
އުއްތަމަ ފަނޑިޔާރު އަބްދުﷲ ސައީދު - އެމަނިކުފާނު ވެސް ހައްޔަރުކޮށްފައިވަނީ ކުއްލި ނުރައްކަލުގެ ހާލަތުގެ ދަށުން
ކުއްލި ނުރައްކަލުގެ ހާލަތުގެ ދަށުން ހައްޔަރު ކޮށްފައިވާ ބޭފުޅުންނަށް އައްޔަނު ކުރެވޭނީ އެންމެ ތިން ވަކީލުން ކަމަށް ކްރިމިނަލް ކޯޓުން އަންގައިފި އެވެ.
ހައްޔަރު ކޮށްފައިވާ ފަނޑިޔާރުންނާއި، ސިޔާސީ ބޭފުޅުންގެ މައްޗަށް ގިނަ ތުހުމަތުތަކެއް ކުރާއިރު، އެ ބޭފުޅުންގެ ވަކީލުންގެ ގޮތުގައި ގިނަ ވަކީލުންތަކެއް މަސައްކަތްކުރައްވަ އެވެ. އަދި އޭގެތެރެއިން ބައެއް ބޭފުޅުންގެ ވަކީލުންގެ ޓީމުގައި ތިން ވަކީލުންނަށް ވުރެ ގިނަ ވަކީލުން ވެސް މަސައްކަތްކުރައްވަ އެވެ.
ޕްރޮސިކިއުޓަރ ޖެނެރަލް އޮފީހުގައި ޑެޕިއުޓީ ޕްރޮސިކިއުޓަރ ޖެނެރަލްގެ މަޤާމުވެސް އަދާކުރައްވާފައިވާ ޤާނޫނީ ވަކީލް ހުސެއިން ޝަމީމް ކުރެއްވި ޓުވީޓެއްގައި ވިދާޅުވީ ކްރިމިނަލް ކޯޓުން ގުޅުމަށް ފަހު، ކުއްލި ނުރައްކަލުގެ ހާލަތުގެ ދަށުން ހައްޔަރު ކޮށްފައިވާ ބޭފުޅުންގެ ވަކީލެއްގެ ގޮތުގައި އައްޔަނު ކުރެވޭނީ ތިން ބޭފުޅުން ކަމަށް ކްރިމިނަލް ކޯޓުގެ ރަޖިސްޓްރާ އަންގަވާފައިވާ ކަމަށެވެ. ނަމަވެސް ފުލުހުންނާއި ޕްރޮސިކިއުޓަރ ޖެނެރަލްގެ އޮފީހަށް އެ ފަރާތްތައް ބޭނުން އަދަދަކަށް ވަކީލުން އައްޔަނު ކުރެވޭކަމަށާއި، މިއީ ވަރަށް ބޮޑަށް ބޭއިންސާފުން ކުރާކަމެއް ކަމަށެވެ. ޝަމީމް ވަނީ އެންމެ ކުޑަމިނުން ވަކީލުންނަށް ވަކީލުންގެ ދައުރުއަދާކުރުމަށް ފުރުސަތު ދެއްވުމަށް އެދިވަޑައިގެންފަ އެވެ.
ކުއްލި ނުރައްކަލުގެ ހާލަތުގެ ދަަށުން ސުޕްރީމް ކޯޓުގެ އުއްތަމަ ފަނޑިޔާރާއި، ސުޕްރީމް ކޯޓުގެ ފަނޑިޔާރު އަލީ ހަމީދު ވަނީ ހައްޔަރުކޮށްފަ އެވެ. އޭގެއިތުރުން ކުރީގެ ރައީސް މައުމޫން އަބްދުލްޤައްޔޫމާއި ރައްޔިތުންގެ މަޖިލީހުގެ ގިނަ އަދަދެއްގެ މެމްބަރުންތަކެއް ވެސް ހައްޔަރުކޮށްފައިވެއެވެ. އޭގެތެރެއިން ބައެއް ބޭފުޅުންގެ މައްޗަށް ގިނަ ދައުވާތަކެއް އުފުލާފައިވާއިރު، ކޮންމެ ބޭފުޅެއްގެ މައްޗަށް ވެސް ޓެރަރިޒަމްގެ ދައުވާ އުފުލުމަށް ކޯޓަށް ހުށައަޅާފައިވެއެވެ.
