އޭސީ މިލާން އަށް ކުޅެމުން އަންނަ ޒުވާން ގޯލްކީޕަރު ޖިއަން ލުއީޖީ ޑޮނަރޫމާ އެ ކްލަބު ދޫކޮށް ވާދަވެރި ޔުވެންޓަސް އަށް އައުމަށް އިޓަލީގެ ގޯލްކީޕަރު ޖިއަން ލުއީޖީ ބުފޮން ދައުވަތު ދީފިއެވެ.

އުމުރުން 18 އަހަރުގެ ގޯލްކީޕަރު މިލާން ދޫކޮށްލަން އުޅޭ ކަމުގެ އަޑުތައް ވަނީ ފެތުރިފައެވެ. އެހެންނަމަވެސް އޭނާ ވަނީ މި ސީޒަން ފެށުމުގެ ކުރިން މިލާންއާއެކު ހަދާފައިވާ އެއްބަސްވުން އައުކޮށްފައެވެ. ޑޮނަރޫމާ ހޯދުމަށް ޔުވެންޓަސްގެ އިތުރުން ސްޕެއިންގެ ގަދަ ދެ ބާރު ކަމަށްވާ ބާސެލޯނާ އަދި ރެއާލް މެޑްރިޑުންވެސް ދަނީ މަސައްކަތް ކުރަމުންނެވެ.

މި ސީޒަން ނިންމާލުމަށްފަހު ބުފޮން ރިޓަޔަރ ކުރަން ނިންމާފައިވާއިރު، އޭނާގެ ބަދަލުގައި އިޓަލީގެ ގޯލު ބެލެހެއްޓުމާއި ހަވާލުވާނީ ޑޮނާރޫމާއެވެ. ބުފޮން ވަނީ އޭނާގެ އުމުރަށްވުރެ 21 އަހަރު ޅަ، ޒުވާން ގޯލްކީޕަރު ޑޮނާރޫމާ އަށް ޔުވެންޓަސްއަށް އައުމަށް ދައުވަތު ދީފައެވެ. އެގޮތުން ބުފޮން ބުނެފައިވަނީ ޑޮނަރޫމާ ޔުވެންޓަސްއަށް ބަދަލުވުމަކީ އޭނާގެ ކެރިއަރުގައި ކުރިޔަށް އެޅޭނެ ފިޔަވަޅެއް ކަމަށާއި، އޭނާއާއި މިލާންއާ ދެމެދު އޮތް ގުޅުން ނޭނގޭ ކަމަށެވެ.

ހަމައެހެންމެ އޭނާއަކީ އިޓަލީގެ ގައުމީ ޓީމުގެ މުސްތަގުބަލު ކަމަށާއި ބުފޮން އަދާކުރަމުން އަންނަ ވަޒީފާ އެންމެ ރަނގަޅަށް އަދާކުރެވޭނެ ކުޅުންތެރިޔަކީ ޑޮނަރޫމާ ކަމަށްވެސް ބުފޮން ބުނެފައިވެއެވެ. އަދި އޭނާ މިލާން ދޫކޮށްލަން ބޭނުންވާކަން ކަނޑައެޅިގެން ބުނަން ނޭނގޭ ކަމަށާއި އެކަން އެންމެ ރަނގަޅަށް އެނގޭނީ ޑޮނަރޫމާއަށް ކަމަށް ބުފޮން ބުނެފައިވެއެވެ.

ދާދިފަހުން ދިން އިންޓަވިއުއްގައި ޑޮނަރޫމާ ބުނެފައިވަނީ އޭނާގެ ކޮންޓްރެކްޓުގައި ބާކީ ހަތަރު އަހަރު އެބައޮތް ކަމަށާއި، އޭނާ މިލާންގައި ހުރީ ވަރަށް ހިތްހަމަޖެހިގެން ކަމަށެވެ. އޭނާ މިލާން އަށް 100 މެޗު ކުޅެދީފައިވާއިރު، އޭނާ މިކަމާއި ގުޅިގެން ބުނެފައިވަނީ އެއީ ވަރަށް އުފާވާ ކަމެއް ކަމަށާއި އެއީ އޭނާގެ ޓީމުގެ ކުޅުންތެރިންގެ ސަބަބުން ލިބުނު ކާމިޔާބެއް ކަމަށެވެ. މިލާންގެ ސަޕޯޓަރުން ވަނީ މި ސީޒަނުގެ ކުރީކޮޅު އޭނާ އެ ޓީމު ދޫކޮށްލަން އުޅޭ ކަމަށް ބުނެ މީޑިއާތަކުން ރިޕޯޓު ފެތުރުމާއި ގުޅިގެން، އޭނާއާ ދެކޮޅަށް އަޑު އުފުލާފައެވެ.

ޑޮނަރޫމާގެ ޔޫތު ކެރިއަރުގައި އޭނާ ކުޅެފައިވަނީ ނަޕޯލީއަށެވެ. އޭނާ މިލާންއަށް ކުޅެން ފެށީ 2015 ވަނަ އަހަރުއެވެ. އޭނާ އެންމެ ފުރަތަމަ މެޗު ކުޅުނުއިރު އޭނާގެ އުމުރަކީ 16 އަހަރާއި 242 ދުވަހެއެވެ. އޭގެ ފަހުން އޭނާ އަންނަނީ އެ ޓީމުގެ ގޯލު ބެލެހެއްޓުމުގެ ފުރިހަމަ ޒިންމާ އަދާކުރަމުންނެވެ.