80 އަހަރު ވިޔަސް ޔުވެންޓަސްއާ އިޓަލީއަށް ކުޅޭނަން: ބުފޮން

އުމުރުން 80 އަހަރުގައި ވެސް ޔުވެންޓަސްއާއި އިޓަލީއަށް ކުޅެން ޖެހިއްޖެނަމަ އެކަމަށް އިޖާބަދޭނެ ކަމަށް އެ ދެ ޓީމުގެ ވެސް އެއް ނަމްބަރު ކީޕަރު ޖިއަންލުއީޖީ ބުފޮން ބުނެފިއެވެ.

ޕްރޮފެޝަނަލް ލެވެލްގައި 22 ސީޒަން ކުޅުމަށް ފަހު ބުފޮން ވަނީ މި ސީޒަނަށް ފަހު ކުޅުން ހުއްޓާލާނެ ކަމުގެ އިޝާރާތެއް ދީފައެވެ. އޭނާ ބުނީ ކުޅުން ހުއްޓާލާނެ ކަމުގެ 99.9 އިންސައްތަ ގެރެންޓީ އެބައޮތް ކަމަށް ބުނެފައެވެ.

ޖަރުމަނުގެ ނޫހަކާއި ވާހަކަ ދައްކަމުން ބުފޮން ބުނީ ކުޅުން ހުއްޓާލާނެ ދުވަހެއް ހޯދުމަށް އެކި މީހުން ސުވާލު ކުރަމުން އަންނަ ކަމަށާއި އެ ސުވާލުތަކަށް ޖަވާބުދޭނެ ގޮތެއް ނޭނގޭ ކަމަށެވެ. ސުވާލަކީ އޭނާ ހުއްޓާލާނެތޯ ނޫން ކަމަށާއި ސުވާލު ވާން ޖެހޭނީ ހުއްޓާލާނީ ކޮން ދުވަހަކުންތޯ ކަމަށް ބުފޮން ބުނެފައިވެއެވެ.

ހަމައެހެންމެ އޭނާ ބުނީ ކްލަބާއި ގައުމަކީ އޭނާ އެންމެ އިސްކަންދޭ ޓީމުތައް ކަމަށާއި ގައުމީ ޓީމާއި ޔުވެންޓަސްއަށް ކުޅޭއިރު އިހްސާސް ވަނީ ސިފައިންގެ މީހަކު ގައުމަށް ހިދުމަތްކުރުމުގެ އިހްސާސް ކަމަށެވެ. ކޮންމެވެސް ދުވަހަކުން ހުރިހާ ކަމެއް ވެސް ނިމުމަކަށް އަންނާނެ ކަމަށާއި އެހެން ނަމަވެސް ޔުވެންޓަސްއާއި އިޓަލީގެ ގޯލު ބަލަހައްޓާނެ ކީޕަރެއް ނެތިއްޖެ ހާލަތެއްގައި ގޮވާލާ ގޮވާލުމަށް 80 އަހަރު ވިޔަސް އިޖާބަ ދޭނެ ކަމަށް ބުފޮން ބުނެފައިވެއެވެ.

ބުފޮން ބުނީ އޭނާ އުއްމީދުކުރީ ޖެހިޖެހިގެން ހަ ވޯލްޑް ކަޕްގައި ކުޅެން ކަމަށާއި އެ ހުވަފެން ހަގީގަތަކަށް ނުވުމުން ވަރަށް ދެރަވާ ކަމަށެވެ. އިޓަލީއަށް ވޯލްޑް ކަޕްގެ ފުރުސަތު ގެއްލުނީ ޕްލޭއޮފްގައި 1-0 ގެ އެގްރިގޭޓް ނަތީޖާއަކުން ސްވިޑެން އަތުން ބަލިވުމާއި ގުޅިގެންނެވެ. އޭނާ ބުނީ މި ނާކިމާޔާބީއާ ކުރިމަތިލާން ޖެހުނު ސްކޮޑުގައި ހިމެނުމުން މީހުންގެ ކުރިމައްޗަށް ނުކުންނަން ލަދުގަތް ކަމަށެވެ. އަންނަ އަހަރުގެ ވޯލްޑް ކަޕް ވެގެން ދާނީ 1958 ވަނަ އަހަރުގެ ފަހުން ފުރަތަމަ ފަހަރަށް އިޓަލީއާ ނުލައި ވޯލްޑް ކަޕް ކުޅޭ ފަހަރަށެވެ.

މީގެކުރިން ދިން އިންޓަވިއުއެއްގައި ވާހަކަ ދައްކަމުން ބުފޮން ބުނީ ސްވިޑެން އަތްދަށުވެ ވޯލްޑް ކަޕުން ފުރުސަތު ގެއްލުމާއެކު ރައްޔިތުންގެ ފަރާތުން ލިބެމުން ދިޔަ ސަޕޯޓް އިތުރުވެގެން ދިޔަ ކަމަށެވެ. އޭނާގެ ސަޕޯޓަރުންނަށް އޭނާއަކީ ތެދުވެރިކަމާއެކު މަސައްކަތް ކުރާ މީހެއްކަން ފެނިގެން ގޮސްފައިވާ ކަމަށް ވެސް އޭނާ ބުނެފައިވެއެވެ.

އިޓަލީ ގައުމީ ޓީމަށް 20 އަހަރަށް ފަހު ކުޅުން ހުއްޓާލި ކަމަށް ބުނި މިހާރު އުމުރުން 39 އަހަރުގެ ބުފޮން ވަނީ އެޓީމަށް 175 މެޗު ކުޅެދީފައެވެ. އޭނާ ވަނީ އިޓަލީ ޓީމާއެކު 2006 ވަނަ އަހަރު ވޯލްޑްކަޕް ވެސް ކާމިޔާބު ކޮށްފައެވެ.

ޕާމާ އިން 1995 ވަނަ އަހަރު ކެރިޔަރު ފެށި ބުފޮން ޔުވެންޓަސް އަށް ބަދަލުވީ 2001 ވަނަ އަހަރެވެ. އޭނާ ވަނީ އެ ކްލަބަށް މިހާތަނަށް 637 މެޗު ކުޅެދީ ގިނަ ކާމިޔާބީތަކެއް ހޯދާފައެވެ. އެގޮތުން އޭނާ ވަނީ ޔުވެންޓަސްއާއެކު 10 ލީގު ތަށި، ހަތަރު ކޮޕާ އިޓަލިއާ، ފަސް އިޓާލިއަން ސުޕާކަޕް ކާމިޔާބު ކޮށްފައެވެ.