މިއަހަރުގެ ޖޫން މަހު ރަޝިއާގައި ފެށުމަށް ހަމަޖެހިފައިވާ ވޯލްޑް ކަޕަކީ އެ މުބާރާތް ކާމިޔާބުކުރަން ލިބޭ އެންމެ ފަހު ފުރުސަތުކަމަށް އާޖެންޓީނާގެ ކެޕްޓަން ލިއޮނެލް މެސީ ބުނެފިއެވެ.

 ބާސެލޯނާއާއެކު ގިނަ ކާމިޔާބުތަކެއް މެސީ ހޯދި ނަމަވެސް ގައުމީ ޓީމާއެކު އޭނާއަށް ކާމިޔާބު ނުހޯދޭތީ ގިނަ ބަޔަކު އަންނަނީ އޭނާއަށް ފާޑު ކިޔަމުންނެވެ. މެސީގެ ކެޕްޓަން ކަމުގެ ދަށުން އާޖެންޓީނާގެ ގައުމީ ޓީމު ވަނީ ޖެހިޖެހިގެން ބައިނަލްއަގްވާމީ ބޮޑު ތިން މުބާރާތެއްގެ ފައިނަލްއިން ބަލިވެފައެވެ. އެގޮތުން 2014 ވަނަ އަހަރުގެ ވޯލްޑް ކަޕްގެ ފައިނަލްއިން ޖަރުމަނު އަތުން އާޖެންޓީނާ ބަލިވިއިރު 2015 ވަނަ އަހަރާއި 2016 ވަނަ އަހަރުގެ ކޮޕާ އެމެރިކާ ފައިނަލްއިން އާޖެންޓީނާ ބަލިވީ ޗިލީ އަތުންނެވެ.

އާޖެންޓީނާގެ ޓީވީ ޗެނަލަކާއި ވާހަކަ ދައްކަމުން މެސީ ބުނީ ގައުމީ ޓީމާއެކު ކުޅުނު ފައިނަލްތަކުން ބަލިވުމުން ވަރަށް ގިނަ ފަހަރު ރޮވުނު ކަމަށާއި ގައުމީ ޓީމާއެކު ބައިނަލްއަގްވާމީ މުބާރާތެއް ކާމިޔާބުކުރުމުގެ ހުވަފެން ހަގީގަތަކަށް ހެދިފައިނުވުމަކީ ހިތާމަކުރާ ކަމެއް ކަމަށެވެ. އޭނާ ބުނީ ތިން ފައިނަލްއިން ބަލިވުމަކީ ލިބުނު ވަރަށް ބޮޑު ހިތްދަތި ކަމެއް ކަމަށާއި ތިން ފައިނަލްއަށް ދެވުނު ނަމަވެސް ތައްޓެއް އަތުނުޖެހުމަކީ ބޮޑު ލަދެއްގެ ގޮތުގައި ދެކޭ ކަމަށެވެ.

އާޖެންޓީނާގެ ގައުމީ ޓީމުގައި ހިމެނޭ މުހިންމު ގިނަ ކުޅުންތެރިންނަކީ މިހާރު އުމުރުން 30 އަހަރަށްވުރެ ދޮށިވެފައިވާ ކުޅުންތެރިންނެވެ. މިއީ އޭގެތެރެއިން ގިނަ ކުޅުންތެރިންގެ އެންމެފަހު ވޯލްޑް ކަޕް ކަމަށް އެ ކުޅުންތެރިން ވަނީ ބުނެފައެވެ. މެސީ ބުނީ އަބަދުވެސް ކުޅެނީ ނަތީޖާ ނެރުމަށް ކަމަށާއި މިފަހަރުގެ މުބާރާތް ކާމިޔާބު ނުކުރެވިއްޖެނަމަ އިތުރު ފުރުސަތެއް ލިބޭނެ ކަމަށް ގަބޫލުނުކުރާ ކަމަށެވެ. މެސީ ބުނީ އަބަދުވެސް ހުވަފެން ދެކެނީ ވޯލްޑް ކަޕްގެ ފައިނަލުގައި ކުޅެ އެ މުބާރާތުގެ ތަށި އުފުލާލަން ކަމަށެވެ. އޭނާ ބުނީ 2014 ވަނަ އަހަރުގެ ވޯލްޑް ކަޕްގައި ލިބުނު ނަތީޖާއަށްވުރެ އެއް ފިޔަވަޅު އިތުރަށް ކުރިޔަށްޖެހެން ބޭނުންވާ ކަމަށާއި މިފަހަރު ރަޝިއާއަށް ދާނީ ތަށި އުފުލާލުމަށް ކަމަށެވެ.

ރަޝިއާގައި އޮންނަ ވޯލްޑް ކަޕަށް އާޖެންޓީނާ ކޮލިފައި ކޮށްދިނުމުގައިވެސް މެސީ ވަނީ މުހިންމު ރޯލެއް އަދާކޮށްފައެވެ. އެގޮތުން އެ ޓީމު ކޮލިފައިންގައި ކުޅުނު އެންމެ މުހިންމު އަދި އެންމެ ފަހު މެޗުގައި އޭނާ ހެޓްރިކެއް ހެދިއެވެ.

އާޖެންޓީނާގެ ގައުމީ ޓީމު ހިމެނިފައި ވަނީ މިއަހަރުގެ މުބާރާތުގައި ގްރޫޕް ޑީގައެވެ. އެ ޓީމުގެ އިތުރުން މި ގްރޫޕްގައި ހިމެނިފައިވަނީ އައިސްލޭންޑާއި ކްރޮއޭޝިއާގެ އިތުރުން ނައިޖީރިއާއެވެ. ދެކުނު އެފްރިކާގައި 2014 ވަނަ އަހަރު ބޭއްވި ވޯލްޑް ކަޕްގެ ފައިނަލްގައި ޖަރުމަނު އަތުން ބަލިވި އާޖެންޓީނާއިން ވަނީ 1978 ވަނަ އަހަރާއި 1986 ވަނަ އަހަރުގެ ވޯލްޑް ކަޕް ތަށި އުފުލާލާފައެވެ.

ދެހާސް ފަސްވަނަ އަހަރުން ފެށިގެން އާޖެންޓީނާގެ ގައުމީ ޓީމަށް ކުޅެމުން އަންނަ މެސީ ވަނީ އެ ޓީމަށް 123 މެޗު ކުޅެދީ 61 ލަނޑު ޖަހައިދީފައެވެ. އޭނާއަކީ އެ ގައުމުގެ ގައުމީ ޓީމަށް އެންމެ ގިނަ ލަނޑު ޖަހައިދިން ކުޅުންތެރިޔާއަށްވާއިރު ގައުމީ ޓީމާއެކު އޭނާއަށް ހޯދިފައިވާ އެންމެ ބޮޑު ކާމިޔާބަކީ 2008 ވަނަ އަހަރު ޗައިނާގެ ބެއިޖިންގައި ބޭއްވި އޮލިމްޕިކް ގޭމްސްގެ ރަން މެޑަލް ހޯދުމެވެ.