ސްޕެނިޝް ލަލީގާގައި ޖިރޯނާއާ ދެކޮޅަށް ކުޅުނު މެޗުގައި ކްރިސްޓިއާނޯ ރޮނާލްޑޯ ޖެހި ހަތަރު ލަނޑާ އެކު ރެއާލް މެޑްރިޑް އިން ބޮޑު މޮޅެއް ހޯދައިފިއެވެ.

އަމިއްލަ ދަނޑުގައި ޖިރޯނާއާ ދެކޮޅަށް ކުޅުނު މެޗުން ރެއާލް މޮޅުވީ 6-3 ގެ ނަތީޖާއަކުންނެވެ. ސީޒަނުގެ ކުރީކޮޅު މި ދެ ޓީމު ޖިރޯނާގެ ދަނޑުގައި ކުޅުނު މެޗު 2-1 އިން ކާމިޔާބުކުރީ ޖިރޯނާއެވެ. އެ މެޗުގެ ހަނދާންތައް ފޮހެލައި ބަދަލުހިފުމަށް ނުކުތް ރެއާލްގެ ޓީމުން ވަނީ ފަސް ބަދަލެއް ފެނިގެން ގޮސްފައެވެ. އެގޮތުން ޒުވާން ކުޅުންތެރިން ކަމަށްވާ ނާޗޯ ފަނާންޑޭޒްއާ ލޫކަސް ވަސްކުއޭޒް އަދި މަޓެއޯ ކޮވަސިޗްގެ އިތުރުން މާކޯ އަސެންސިއޯ ވަނީ އެ ޓީމުގެ ފުރަތަމަ އެގާރައިން ފެނިގެން ގޮސްފައެވެ. ހަމައެހެންމެ ކަރިމް ބެންޒެމާއަށް ވެސް ޒިދާން ވަނީ ފުރުސަތުދީފައެވެ.

ފުރަތަމަ ހާފު ފެށިގެން ރެއާލްގެ ފަރާތުން މޮޅު ކުޅުމެއް ފެނިގެންދިޔައިރު އެ ޓީމުގެ ފުރަތަމަ ލަނޑު ފެނިގެންދިޔައީ މެޗުގެ 11 ވަނަ މިނެޓުގައެވެ. ޓޯނީ ކްރޫސް ތަނަވަސްކޮށްދިން ފުރުސަތަކުން އެ ޓީމަށް ލީޑު ނަގައިދިނީ ރޮނާލްޑޯއެވެ. މި ލަނޑަށްފަހު ޖިރޯނާއިން ކުޅުން ރަނގަޅު ކުރުމުގެ ނަތީޖާއެއްގެ ގޮތުން މެޗުގެ 29 ވަނަ މިނެޓުގައި ކްރިސްޓިއަން ސްޓުއާނީ ވަނީ ލަނޑެއް ޖަހައި އެ ޓީމަށް ނަތީޖާ ހަމަހަމަކޮށްދީފައެވެ. މި ހާފުގައި ދެ ޓީމަށް ވެސް ނަތީޖާ ބަދަލުކުރުމަށް އިތުރު ފުރުސަތުތައް ލިބިގެންދިޔައިރު އެ ފުރުސަތުތަކުގެ ބޭނުން ހިފިފައެއްނުވެއެވެ.

ދެ ޓީމު އެއްވަރުވެއޮވެ ފުރަތަމަ ހާފު ނިމިގެންދިޔައިރު ދެވަނަ ހާފުގައި ވަނީ ފޯރިގަދަ ކުޅުމެއް ފެނިގެން ގޮސްފައެވެ. މެޗުގެ 47 ވަނަ މިނެޓުގައި ރޮނާލްޑޯ ރެއާލްއަށް އަލުން އަނބުރާ ލީޑު ނަގައިދިންއިރު 59 ވަނަ މިނެޓުގައި ލޫކަސް ވަސްކުއޭޒް ވަނީ ރެއާލްގެ ލީޑު އިތުރަށް ފުޅާކޮށްދީފައެވެ. ރޮނާލްޑޯ ވަނީ މެޗުގެ 64 ވަނަ މިނެޓުގައި ލަނޑެއް ޖަހާ އޭނާގެ ހެޓްރިކް ފުރިހަމަކޮށްފައެވެ. އެހެން ނަމަވެސް ސްޓުއާނީ ވަނީ މެޗުގެ 67 ވަނަ މިނެޓުގައި ލަނޑެއް ޖަހާ ޖިރޯނާއަށް ނަތީޖާގެ ފަރަގު ކުޑަކޮށްދީފައެވެ.

ރެއާލްގެ ފަސްވަނަ ލަނޑު މެޗުގެ 86 ވަނަ މިނެޓުގައި ގެރެތު ބޭލް ޖަހައިދިންއިރު 88 ވަނަ މިނެޓުގައި ޖުއާންޕޭ ވަނީ ލަނޑެއް ޖަހާ އަނެއްކާ ވެސް ޖިރޯނާއަށް ނަތީޖާގެ ފަރަގު ކުޑަކޮށްދީފައެވެ. ރޮނާލްޑޯގެ ހަތަރު ވަނަ ލަނޑު އޭނާ ޖެހީ މެޗުގެ ފުރިހަމަ ވަގުތު ހަމަވެގެން ރެފްރީ ކުޅެން ދެއްކި އިތުރު ވަގުތުގެ ތެރޭގައެވެ.

މި މެޗުގައި ރޮނާލްޑޯ ޖެހި ހަތަރު ލަނޑާއެކު އޭނާ ވަނީ މިއަހަރުގެ ތެރޭގައި 18 ލަނޑު ޖަހާފައެވެ. މި އަދަދާއި އެއްވަރަކަށް ޔޫރަޕުގެ ގަދަ ފަސް ލީގުގައި ކުޅޭ އެހެން އެއްވެސް ކުޅުންތެރިޔަކަށް ލަނޑު ޖެހިފައެއްނުވެއެވެ. ހަމައެހެންމެ މިއީ ރޮނާލްޑޯގެ ކެރިއަރުގައި އޭނާ ކާމިޔާބުކުރި 50 ވަނަ ހެޓްރިކެވެ.

ސްޕެނިޝް ލަލީގާގައި ކުޅުނު 29 މެޗުން ލިބުނު 60 ޕޮއިންޓާއެކު ރެއާލް މެޑްރިޑަށް ތިންވަނަ ލިބޭއިރު ޖިރޯނާ އޮތީ 43 ޕޮއިންޓާއެކު ހަތްވަނައިގައެވެ.