އުއްތަމަ ފަނޑިޔާރުގެ މައްޗަށް ދައުވާކޮށް މިއަދު ޝަރީއަތް ފަށަނީ!
އުފުލާފައިވަނީ ދައުލަތުގެ މަސައްކަތަށް ހުރަސްއެޅުމުގެ ކުށުގެ ދައުވާ
އުއްތަމަ ފަނޑިޔާރު ޢަބްދުﷲ ސައީދު
އުއްތަމަ ފަނޑިޔާރު އަބްދުﷲ ސައީދުގެ މައްޗަށް ދައުވާކޮށް، މިއަދު ޝަރީއަތް ފެށުމަށް ކްރިމިނަލް ކޯޓުގައި ތާވަލުކޮށްފި އެވެ.
އުއްތަމަ ފަނޑިޔާރުގެ މައްޗަށް އުފުލާފައިވަނީ ދައުލަތުގެ މަސައްކަތަށް ހުރަސްއެޅުމުގެ ކުށުގެ ދައުވާއެވެ. މި ދައުވާގެ ޝަރީއަތް ފަށަން ތާވަލުކޮށްފަިއވަނީ މިއަދު މެންދުރު 3:00 ގައެވެ.
ގާނޫނީ ގޮތުން އުފެދިފައިވާ ސަރުކާރު ވައްޓާލަން އުޅުމުގެ ތުހުމަތާއި ރިޝްވަތު ދިނުމާއި ހިފުމުގެ ތުހުމަތުގައި އުއްތަމަ ފަނޑިޔާރާއި ފަނޑިޔާރު އަލީ ހަމީދުއާއި ރައީސް މައުމޫން އަބްދުލްގައްޔޫމް ހައްޔަރުކޮށްފައިވާއިރު، ފުލުހުން ތުހުމަތު ކުރާ ގޮތުގައި މި ތިން ބޭފުޅުން ވަނީ މައްސަލައާ ގުޅޭ ހެކި ނައްތާލާފައެވެ. އެކަމަށް ތުހުމަތުކޮށް، ހެކި ނައްތާލުމުގެ ދައުވާ ތިން ބޭފުޅުންގެ މައްޗަށް ކުރުމަށް ޕްރޮސެކިއުޓަރ ޖެނަރަލްގެ އޮފީހަށް މައްސަލަ ފޮނުވީ ފެބްރުއަރީ 28 ވަނަ ދުވަހުއެވެ.
އެހެން ނަމަވެސް، މިމަހުގެ ފުރަތަމަ ހަފްތާގެ ތެރޭގައި އިތުރު ކަންތައްތަކެއް ސާފުކުރުމަށް ޕްރޮސެކިއުޓަރ ޖެނަރަލްގެ އޮފީހުން އެ މައްސަލަ އަނބުރާ ފުލުހަށް ފޮނުވާލިއެވެ.
ރާއްޖެއެމްވީއަށް މައުލޫމާތު ލިބިފައިވާ ގޮތުގައި މި މައްސަލަައިގައި ރައީސް މައުމޫނާއި އުއްތަމަ ފަނޑިޔާރާއި ފަނޑިޔާރު އަލީ ހަމީދުގެ މައްޗަށް ޕްރޮސެކިއުޓަރ ޖެނަރަލްގެ އޮފީހުން ދައުވާކުރީ މިދިޔަ އަންގާރަ ދުވަހުއެވެ.
ކުއްލި ނުރައްކަލުގެ ހާލަތު އިއުލާނުކުރުމަށް ފަހު އަސްކަރިއްޔާއިން ސުޕްރީމް ކޯޓާއި ކްރިމިނަލް ކޯޓް ހިސޯރުކުރުމަށް ފަހު، އުއްތަމަ ފަނޑިޔާރު އަބްދުﷲ ސައީދާއި ފަނޑިޔާރު އަލީ ހަމީދު ހައްޔަރުކުރީ ފެބްރުއަރީ 5 ވަނަ ދުވަހުގެ ރޭގަ އެވެ. އެއަށް ފަހު އަސްކަރިއްޔާއިން ހިސޯރުކޮށްފައިވާ ރައްޔިތުންގެ މަޖިލީހުން، ސަރުކާރުން ބޭނުންވި ގޮތަށް ފަނޑިޔާރުންގެ ގާނޫނަށް ބަދަލު ގެނެސް، ފަނޑިޔާރެއްގެ މައްޗަށް ޖިނާއީ ދައުވާއެއް ސާބިތުވެއްޖެ ނަމަ ފަނޑިޔާރު ކަމުގެ މަގާމު ގެއްލިގެންދާ ގޮތް ހެދި އެވެ. ނަމަވެސް މިއީ ގާނޫނު އަސާސީއާއި ހިލާފު ބާތިލު ބަދަލެއް ކަމަށް ގާނޫނީ ވަކީލުން ވިދާޅުވެ އެވެ.
