އިސްތަށިގަނޑު ކޮށާލުމުން ވަރަށް ދެރަވި: ޓައިގާ

ދެހާސް ސޯޅަ ވަނަ އަހރު ނިކުތް "ބާގީ" ގެ ދެ ވަނަ ބައި ބާގީ 2 ގެ ޝޫޓިން އަށް އިސްތަށިގަނޑު ކޮށާލުމުން ވަރަށް ދެރަވި ކަމަށް ފިލްމުގެ ލީޑު ރޯލުން ފެނިގެންދާ ޓައިގާ ޝްރޮފް ބުނެފިއެވެ.

ޓައިގާ ވަނީ ފިލްމުގެ ޝޫޓިންއަށް އޭނާގެ އިސްތަށިގަނޑު ކޮށާލާ ވީޑިއޯ އާންމުކޮށްފައެވެ.

އެ ވީޑިއޯއިން ޓައިގާ އޭނާގެ އިސްތަށިގަނޑު ކޮށާލާތީ ދެރަވެ، ކަރުނަ ފޮހޭ މަންޒަރު ފެނެއެވެ.

ޓައިގާ ބުނީ އިސްތަށިގަނޑު ކޮށާލަން އޭނާ ބޭނުންނުވި ނަމަވެސް އޭނާގެ ޑައިރެކްޓަރު އަހްމަދު ހާން އެކަން ކުރަން ބުނުމުން އިންކާރުކުރަން ބޭނުންނުވީ ކަމަށެވެ.

"ބާގީ" ގައި ވެސް ފެނިގެންދިޔައީ ޓައިގާ އެވެ. އެހެން ނަމަވެސް "ބާގީ" އާއި ތަފާތުކޮށް "ބާގީ 2" ގައި ޓައިގާ ފެންނާނީ ތަންކޮޅެއް ބިޔަކޮށް ކަމަށް ވެސް މީޑިއާގައި ވަނީ އަޑު ފެތުރިފައެވެ. އަދި ފިލްމުގައި ޓައިގާ ގެ ނެށުންތަކާއި އޭނާގެ ފެނިލުން ވެސް ތަފާތުވާނެ ކަމަށް ދަނީ ބުނަމުންނެވެ.

"ބާގީ 2" ގައި ޓައިގާއާ އެކު ލީޑު ރޯލުން ފެނިގެންދާނީ ފިލްމީތަރި ދިޝާ ޕަޓާނީއެވެ.

ޓައިގާ އާއި އެކު ދާދި ފަހުން ރާއްޖެ އައިސް ޗުއްޓީ ހޭދަކޮށްފައިވާ ދިޝާ ބުނެފައިވަނީ ޓައިގާގެ މިހާރުގެ ހެއާ ސްޓައިލް ވަރަށް ކަމުދާކަމަށެވެ. ޓައިގާ އާއި އޭނާގެ ލޯބިވެރިޔާކަމަށްބުނާ ދިޝާ ޗުއްޓީ ހޭދަކޮށްފައިވަނީ ރާއްޖޭގެ ރިސޯޓެއް ކަމަށްވާ ކޮންރެޑް މޯލްޑިވެސްގައެވެ.

ބާގީ2 ޕްރޮޑިއުސް ކޮށްފައިވަނީ ސާޖިދް ނަދިއަދްވާލާއެވެ.