ކުރީގެ ރައީސް މުހައްމަދު ނަޝީދާއެކު ސިޔާސީ މަގުސަދުގައި ހައްޔަރުކޮށްފައިވާ ޖުމުލަ ނުވަ މީހަކު މިނިވަންކުރުމަށާއި ރައްޔިތުންގެ މަޖިލީހުގެ 12 މެމްބަރުންގެ ގޮނޑި ނުގެއްލޭ ކަމަށް އަދުލް އިންސާފު ގާއިމުކުރުމުގެ އެންމެ މަތީ ކޯޓުން ނެރުނު އަމުރު ތަންފީޒުނުކޮށް، އިއުލާނުކުރި ކުއްލި ނުރައްކަލުގެ ހާލަތުގެ ގެއްލުން އިންތިހާ އަށް ބޮޑުވެފައިވާތީ، މި ހާލަތު ނިމުމަކަށް ގެނައުމަށް ކުރެވެން ހުރި ހުރިހާ ކަމެއް ކުރަން އެމްޑީޕީގެ ގައުމީ މަޖިލީހުން ފާސްކޮށްފި އެވެ.
ހޮނިހިރު ދުވަހު ހަވީރު ބޭއްވި ގައުމީ މަޖިލީހުން ފާސްކުރި ގަރާރުގައި ބުނެފައިވަނީ ކުއްލި ހާލަތު ނިމުމަކަށް ގެނައުމަށާއި ސުޕްރީމް ކޯޓުން ފެބްރުއަރީ 1 ގައި ނެރުނު ކޯޓް އަމުރު ތަންފީޒުކުރަން ގޮވާލައި މުޒާހަރާ ކުރާތާ 45 ދުވަސް ވެފައިވާއިރު، މި މުޒާހަރާތަކުގެ ތެރެއިން މިހާތަނަށް 300 އަށް ވުރެ ގިނަ މީހުން ހައްޔަރު ކޮށްފައިވާ ކަމަށެވެ.
ގާނޫނު އަސާސީއާ ހިލާފަށް ކުއްލި ނުރައްކަލުގެ ހާލަތު އިއުލާނުކޮށް ގާނޫނު އަސާސީން ރައްޔިތުންނަށް ކަށަވަރުކޮށް ދީފައިވާ އަސާސީ ހައްގުތައް ނިގުޅައިގަނެ، ކޯޓުތަކަށް ނުފޫޒު ފޯރުވައި ސިފައިން މެދުވެރިކޮށް ރައްޔިތުންގެ މަޖިލިސް ހިސޯރުކޮށް މުޅި ދިވެހި ދައުލަތް ގަޑުބަޑު ކޮށްފައިވާ ކަމަށާއި މި ކުއްލި ނުރައްކަލުގެ ހާލަތުގެ ސަބަބުން ދިވެހިރާއްޖޭގެ ގައުމީ ސަލާމަތަށް ނުރައްކާވެ، ފޫނުބެއްދޭވަރު ބޮޑެތި ގެއްލުން އިގްތިސޯދަށް ލިބެމުން އަންނަ ކަމަށް ގަރާރުގައި ބުނެފައިވެ އެވެ.
އެހެންވެ، ގައުމަށް ދެމެހެއްޓެނިވި ހަމަޖެހުން ގެނައުމަކީ ކޮންމެހެން ކުރަންޖެހޭ ކަމެއް ކަމުގައިވާތީވެ، ޣައިރު ގާނޫނީ އުސޫލުން އިއުލާނު ކޮށްފައިވާ ކުއްލި ނުރައްކަލުގެ ހާލަތު މިހާރުން މިހާރަށް އުވާލުމަށާއި، މިހާރު ފުލުހުންގެ ބަންދުގައި ތިބި 194 މީހުން މިނިވަން ކުރުމަށާއި ދިވެހިރާއްޖޭގެ އަދުލް އިންސާފު ގާއިމުކުރުމުގެ އެންމެ މަތީ ބާރުކަމުގައިވާ ދިވެހިރާއްޖޭގެ ސުޕްރީމް ކޯޓްގެ 5 ފަނޑިޔާރުންގެ ފެބްރުއަރީ 1 ގައި ނެރުނު އަމުރު ތަންފީޒު ކުރުމަށް ކުރެވެން ހުރި ހުރިހާ ކަމެއް ކުރަން ވަނީ ފާސްކޮށްފަ އެވެ.
މީގެ އިތުރުން ހުރިހާ ފަރާތްތަކަކުން އެއްބަސްވެވޭ އުސޫލުން ސިޔާސީ ޕާޓީތަކުން މަޝްވަރާތަކުގައި ބައިވެރިވުމަށާއި ހުރިހާ ފަރާތްތަކަކުން ބައިވެރިވެވޭ ރިޔާސީ އިންތިހާބެއް ބޭއްވުމަށް ކުރެވެން ހުރި ހުރިހާ ކަމެއް ވެސް ކުރުމަށް ވަނީ ފާސްކޮށްފަ އެވެ.
އެމްޑީޕީގެ އިތުރުން ގުޅިފައިވާ ސިޔާސީ ޕާޓީތަކުން ބުނެފައިވަނީ ސިޔާސީ މަޝްވަރާތަކުގައި ބައިވެރިވެވޭނީ އެ ޕާޓީތަކުގެ ލީޑަރުންނަށް ބައިވެރިވެވޭނެ ގޮތަށް ކަމަށެވެ.