ރާއްޖެޓީވީގެ ތިން ނޫސްވެރިން ހައްޔަރުކުރީ ދޮގު ތުހްމަތެއްގައި، ސްޓޭޝަންގެ އަގު ވައްޓާލައި ތަން ބަންދުކުރުމުގެ ނުބައި ނިޔަތުގައި ކަމަށް ރާއްޖެޓީވީން ބުނެފިއެވެ.
ރާއްޖެޓީވީން ހޮނިހިރު ދުވަހު ނެރުނު ނޫސްބަޔާނުގައި, ފުލުހުންގެ ޔުނިފޯމުގައި ތިބި ބަޔަކު ސަރުކާރަށް އިންޒާރު ދޭ ވީޑިއޯއެއް އުފައްދައި ސޯޝަލް މީޑިއާއަށް އަޕްލޯޑްކުރި ތުހްމަތުގައި ރާއްޖެ ޓީވީގެ ދެ ނޫސްވެރިޔަކު ހައްޔަރުކުރުމާއި، ރާއްޖެ ޓީވީއަކީ ޓެރަރިޒަމްގެ އަމަލުތަކަށް ހިތްވަރު ދޭ ސްޓޭޝަނެއް ކަމަށް ވެރިކަންކުރާ ޕާޓީ ޕީޕީއެމް އިން ބުނެފައި ވާތީ އިންތިހާއަށް ކަންބޮޑުވާކަން ވަނީ ހަމަކޮށްފައެވެ.
ރާއްޖެޓީވީން ބުނީ، މިފަދަ ތުހުމަތެއްގައި ރާއްޖެ ޓީވީގެ ދެ ނޫސްވެރިޔަކު ހައްޔަރުކުރީ ވެސް، އަދި ވެރިކަންކުރާ ޕާޓީން ރާއްޖެ ޓީވީ ބަދުނާމުގެ ކުރުމުގެ ވާހަކަ ވެސް ދައްކަމުން ދަނީ، ސްޓޭޝަންގެ އަގު ވައްޓާލުމަށާއި ސްޓޭޝަން ބަންދުކުރުމުގެ ނުބައި ނިޔަތް އޮވެގެން ކަމަށެވެ.
އިންޒާރުގެ ވީޑިއޯގެ މައްސަލައިގައި ރާއްޖެ ޓީވީގެ ނޫސްވެރިޔާ މުހައްމަދު ވިސާމާއި ހެޑް އޮފް ޕްރޮގްރާމްސް އެންޑް ކޯޑިނޭޝަން އާމިރު ސަލީމް ހައްޔަރުކޮށްފައި ވާއިރު، ފުލުހުންގެ އަމުރަށް ނުކިޔަމަންތެރިވި ކަމަށް ބުނެ، ނޫސްވެރިޔާ މުހައްމަދު ފަޒީން ހައްޔަރުކުރީ މާޗް 16، 2018 ވަނަ ދުވަހުގެ ރެއެވެ.
މި ތިން ނޫސްވެރިންގެ މައްޗަށް ކުރަނީ އެއްވެސް އަސްލެއް ނެތް ދޮގު ތުހްމަތުތަކެއް ކަމަށް ރާއްޖެޓީވީން ބުނެއެވެ. ސްޓޭޝަނަކީ ގާނޫނާއި ގަވާއިދާ ހިލާފު އަމަލެއް ހިންގާނެ ސްޓޭޝަނެއް ނޫން ކަމަށާއި، ޓެރަރިޒަމްގެ އަމަލަކަށް އެއްވެސް މިިންވަރެއްގެ ހިތްވަރެއް ދޭނެ ސްޓޭޝަނެއް ނޫން ކަމަށް ރާއްޖެޓީވީން ބުންޏެވެ.
ވީޑިއޯގެ މައްސަލައިގައި ވިސާމާއި އާމިރު ހައްޔަރުކުރީ، ހުކުރު ދުވަހުގެ މެންދުރު ފަހު ބޭއްވި ޕީޕީއެމްގެ ޕްރެސް ކޮންފަރެންސެއްގައި އެ ތުހްމަތުކޮށްފައި ވަނިކޮށެވެ. އޭގެ މާ ގިނަ އިރުތަކެއް ނުވަނީސް، ރާއްޖެ ޓީވީގެ ނޫސްވެރިން ހައްޔަރުކުރީ އަދި ރާއްޖެ ޓީވީ ބަދުނާމުކޮށް ބައެއް މީހުން ވާހަކަ ދައްކަމުން ދަނީ، ސްޓޭޝަންގެ މަގުބޫލްކަމާ މެދު، އަދި ރައްޔިތުންގެ އޮންނަ ލޯބި ފެނި ހަސަދަވެރިވެ، ސްޓޭޝަން ބަންދުކުރަން ތަކުރާރުކޮށް މަސައްކަތްކުރާ ބައެއްގެ ރޭވުމުން ކަމަށް ގަބޫލުކުރާ ކަމަށް ސްޓޭޝަނުން ވަނީ ބުނެފައެވެ.
"މީގެ ކުރިން ވެސް ރާއްޖެ ޓީވީއަށް ގެއްލުން ދިނުމުގެ ގޮތުން ނޫސްވެރިން ހައްޔަރުކޮށް، ބޭއިންސާފުން ޖޫރިމަނާކޮށް، ތަނަށް ބޮޑެތި ގެއްލުންތައް ދީފައިވާއިރު، މި ފަހަރު ވެސް ނޫސްވެރިން ހައްޔަރު މިކުރީ ރާއްޖެ ޓީވީގެ ޓީމަށް ބިރު ދައްކައި، މަސައްކަތް ހީނަރު ކުރުމުގެ ބޭނުމުގަ އެވެ،" މި ބަޔާނުގައިވެއެވެ.
ރާއްޖެޓީވީ އަނެއްކާ ވެސް ބަންދުކުރުމަށް ޕީޕީއެމްގެ ޑެޕިއުޓީ ލީޑަރު އަބްދުއްރަހީމް އަބްދުﷲ، ހުކުރު ދުވަހުގެ ރޭ މެންދަމު ގޮވާލައްވާތީ، އެކަން ވެސް ރާއްޖެޓީވީން ވަނީ ކުށްވެރިކޮށްފައެެވެ. އަދި ނޫސްވެރިކަމުގެ މިނިވަންކަން ގާނޫނު އަސާސީން ވެސް ކަށަވަރުކޮށްދީފައިވާއިރު، މިފަދަ އިންޒާރުތައް ދިނުމާއި ބިރު ދެއްކުން ހުއްޓާލުމަށް ވެސް ވަނީ ގޮވާލާފައެވެ.
ރާއްޖެޓީވީން ބުނީ، ހިތަށް އެރި ކޮންމެ ވާހަކައެއް ދެއްކޭނެ ކަމަށް ގަބޫލުކުރާ ބަޔަކު ސްޓޭޝަންގެ އަގު ވައްޓާލަން ވާހަކަ ދައްކައި، ސްޓޭޝަން ބަންދުކުރަން ގޮވާލާފައިވާ މައްސަލަ އާއި، ހަގީގަތެއް ބެލުމެއް ނެތި ބައެއް މީޑިއާތަކުން ރާއްޖެ ޓީވީ ބަދުނާމުވާ ގޮތަށް، ނޫސްވެރިިކަމުގެ ހަމައާއި އުސޫލާ ހިލާފަށް ވިޔަފާރިއަށް ގެއްލުންވާ ގޮތަށް ވާހަކަތައް ގެނެސްދީފައިވާ މައްސަލަ ކަމާބެހޭ މުއައްސަސާތަކަށް ހުށަހަޅުމުގެ ހައްޤު އެސްޓޭޝަނަށް ލިބިގެންވާ ކަމަށެވެ. އަދި އެއްވެސް އަސްލެއް ނެތް ތުހްމަތެއްގައި ހައްޔަރުކޮށްފައިވާ ސްޓޭޝަންގެ ތިން ނޫސްވެރިން ވަގުތުން ވަގުތަށް މިިނިވަންކުރުމަށް ކަމާބެހޭ ފަރާތްތަކަށް ރާއްޖެޓީވީން ވަނީ ގޮވާލާފައެވެ.