ރައްޔިތުންގެ މަޖިލީހުގެ ކުރީގެ މެމްބަރު އަހުމަދު އީސަ އާއި އިތުރު ބަޔަކު ހައްޔަރުކޮށްފި
15 މާރިޗު 2018 | ބުރާސްފަތި 13:44އީސަ ހައްޔަރުކޮށްފައި ވަނީ ގޭގައި ހުންނަވަނިކޮށް، އަށް ވަރަކަށް ފުލުހުން ގޮސް
ރައްޔިތުންގެ މަޖިލީހުގެ ކުރީގެ މެމްބަރު އަހުމަދު އީސަ - ކުއްލި ނުރައްކަލުގެ ހާލަތުގެ ދަށުން އިތުރު ބަޔަކު މިއަދު ވަނީ ހައްޔަރުކޮށްފައި
ރައްޔިތުންގެ މަޖިލީހުގެ ކެނދިކުޅުދޫ ދާއިރާގެ ކުރީގެ މެމްބަރު އަހުމަދު އީސަ އާއި، އެމްޑީޕީގެ އެކްޓިވިސްޓުންތަކެއް ހައްޔަރުކޮށްފިއެވެ.
ރާއްޖެއެމްވީއަށް އެނގިފައިވާ ގޮތުގައި އީސަ ހައްޔަރުކޮށްފައި ވަނީ ބުރާސްފަތި ދުވަހު (މިއަދު) ހަވީރުގެ ވަގުތެއްގައި ގޭގައި ހުންނަވަނިކޮށް، އަށް ވަރަކަށް ފުލުހުން ގޮހެވެ. ނަމަވެސް އީސާ ހައްޔަރުކުރީ ކުއްލި ނުރައްކަލުގެ ހާލަތުގެ ދަށުން ކަމެއް ނުވަތަ ނޫން ކަމެއް އަދި ކަށަވަރެއް ނުވެއެވެ.
އީސަގެ އިތުރުން އެމްޑީޕީގެ އެކްޓިވިސްޓް ޕައްޕި، އަދި ސައިމަން ވެސް ވަނީ ފުލުހުން ހައްޔަރުކޮށްފައެވެ. އެ ދެ މީހުން ހައްޔަރުކޮށްފައި ވަނީ ވެސް ކުއްލި ނުރައްކަލުގެ ހާލަތުގެ ދަށުން ކަމެއް ނުވަތަ ނޫން ކަމެއް ކަށަވަރެއް ނުވެއެވެ.
ކުއްލި ނުރައްކަލުގެ ހާލަތުގެ ދަށުން ހައްޔަރުކުރެވިފައިވާ މީހުންގެ އަދަދު 50 އަށް ވުރެ މައްޗަށް އަރާ ކަމަށް ވަކީލުން ހާމަކުރައްވައެވެ. އަދި އޭގެ ތެރެއިން ގިނަ މީހުން ތިބީ ދޫނިދުގައި ކަމަށް ވެސް ވަކީލުން ހާމަކުރައްވައެވެ.
