އިހަވަންދޫ ދާއިރާގެ މެންބަރު މުހައްމަދު އަބުދުﷲ ފުލުހަށް ހާޒިރުކޮށްފިއެވެ. އެމްޕީ މުހައްމާ ފުލުހަށް ހާޒިރުކޮށްފައިވަނީ ބުދަ ދުވަހުގެ ހެނދުނު 10.30 ގައެވެ.

މުހައްމާގެ މައްޗަށް ކުރާ ތުހުމަތަކީ ފެބުރުއަރީ މަހުގެ އެއްވަނަ ދުވަހު ސުޕްރީމްކޯޓުން ނެރުނު އަމުރަށްފަހު، ދައުލަތުގެ މުއައްސަސާތަކުގެ މުއައްޒަފުންނަށް ރިޝްވަތު ދިނުމާއި، މުއައްސަސާތައް ހިންގުމަށް ބަދަލުތަކެއް ގެނައުމަށް އެތަންތަނުގެ މުއައްޒަފުންނަށް ރިޝްވަތުގެ ފައިސާ ހުށައެޅުމުގެ ތުހުމަތެވެ. މީގެ އިތުރުން އެތަންތަނުގެ މުއައްޒަފުންގެ މަސައްކަތަށް ނުފޫޒު ފޯރުވުމުގެ ތުހުމަތުވެސް މުހައްމާގެ މައްޗަށް ކުރެއެވެ.

އެ ތުހުމަތުތަކާއި ގުޅިގެން މުހައްމާ ބުދަ ދުވަހު ފުލުހަށް ހާޒިރުކޮށްފައިވާއިރު، މިދިޔަ އާދިއްތަ ދުވަހު އޭނާ ކުއްލިއަކަށް ހައްޔަރުކުރީ މަގުމަތީގައި ހުންނަވަނިކޮށް އާދައިގެ ހެދުމުގައި ތިބި ދެމީހުންނެވެ. އަދި މުހައްމާ ހައްޔަރުކުރަނީ އެސްއޯއީގެ ދަށުންކަމަށް ބުނިކަމަށް މުހައްމާ ވިދާޅުވިއެވެ.މި ތުހުމަތު ތަކަށް އިންކާރު ކުރައްވަމުން މުހައްމާ ވިދާޅުވީ، މީ ވަރަށް ބޮޑު ދައުވާއެއް ކަަމަށާއި، މީ އޭނާގެ ސިކުނޑިއަށްވެސް އައިކަމެއް ނޫން ކަމަށެވެ."މި މިއަދު ސަރުކާރުގެ ތެރޭގައި ކަން ހިނގާގޮތް، ރައީސް ޔާމީނަށް އިދިކޮޅަށް ބަސްބުނާ ކޮންމެ މީހަކީ މިފަދަ ކޮންމެ ވެސް ތުހުމަތެއް ކުރާ މީހަކަށް މި ވަނީ، ވެރިކަން ވައްޓާލުން އެހެން ނޫނީ ކޮންމެވެސް އެހެންކަމެއް. އަޅުގަނޑުމެން މި ދައްކާ ވާހަކައަކީ ގާނޫނީ އިމުގެ ތެރެއިން މަސައްކަތް ކުރާށޭ" މުހައްމާ ވިދާޅުވިއެވެ.

ހޯމަ ދުވަހު މަޖިލީހުން ފާސްކުރި އެންޓި-ޑިފެކްޝަންގެ ބިލާއި ފަނޑިޔާރުންގެ ގާނޫނުން  ގާނޫނު އަސާސީ މިއަދު ފުރޭމް ކުރެވިފައިވާކަން އެނގޭ ކަމަށް މުހައްމާ ވިދާޅުވިއެވެ.

މުހައްމާ ވިދާޅުވީ، އެ ދެ ބިލް ރައީސް އަބުދުﷲ ޔާމީން ތަސްދީގު ކުރެއްވުމުގެ ކުރިން އިތުރަށް ވިސްނާ ވަޑައިގަންނަވާނެ ކަމަށް އުއްމީދުކުރައްވާ ކަމަށެވެ. ސަބަބަކީ އެ ގާނޫނުތައް ވެގެންދާނީ ސީދާ ރައްޔިތުންނާއި ގުޅުން ހުރި އެއްޗަކަށް ވެގެންދާނެތީ ކަމަށް މުހައްމާ ވިދާޅުވިއެވެ.

މުހައްމާ ބުދަ ދުވަހު ފުލުހަށް ހާޒިރުކުރިއިރު، ހޯމަ ދުވަހު ވެސް އޭނާ ހާޒިރުކުރިއެވެ. ފުލުހުން ވަނީ މުހައްމާގެ ފޯނުވެސް ހިފަހައްޓާފައެވެ. ފުލުހުން މުހައްމާގެ ފޯނު އަތުލާފައިވާ އިރު، ފޯނު އަތުލުމުގައި ކަންކަން ކުރައްވާފައިވަނީ އެއްވެސް ހަމައެއް ލަމައެއް ނެތި ފޭރުމުގެ އުސޫލުން ކަމަށް އޭނާ ވިދާޅުވި އެވެ.