އަޅުގަނޑަކީ މުއްސަނދި މީހަކީމެއް ނޫނެވެ. މާކަ ބައިވަރު ފައިސާތަކެއް ވެސް ގެންގުޅެނީކީ ވެސް ނޫނެވެ. އެކަމަކު މައިންބަފައިންގެ ތަރިކައިން ލިބުނު މުދާކޮޅަކުން ލާރި ކޮޅެއް ހޯދައިގެން މަސްދޯންޏެއް ބަނދެފީމެވެ. އޮޑި ބާލާ އެއަށް ވާވެލާވެލި ވެސް ހަމަކޮށްފީމެވެ. ދެން މަސައްކަތް ފެށީ އެޔަށް ކެޔޮޅެއް ހޯދާށެވެ. މީސްމީހުން ކައިރީގައި ބުނެގެން އުޅެނިކޮށް ބަޔަކު މާ މޮޅު ކެޔޮޅެއް ދައްކައިފިއެވެ. އެމީހުން ބުނާ ގޮތުން އެއީ އެކަމުގެ މާހިރެކެވެ. ކޮންމެއަކަސް މި ލިބުނު މޮޅު ކެޔޮޅުމީހާއާ އޮޑި ހަވާލު ކޮށްފީމެވެ. އެޔަށް ފަޅުވެރިން ހޯދީ ކެޔޮޅުގެ ލަފާގެ މަތިންނެވެ. ކެޔޮޅުމީހާ ބޭނުން ގޮތަށް ހުރިހާ ކަމެއް ފުރިހަމަ ކޮށްދީފީމެވެ. ސާމާނަކަސް މީހުންނަކަސް އޮޑިޔަށް އަރުވައިދީ އަޅުގަނޑުގެ ވާޖިބު އަދާކޮށްފީމެވެ. ކެޔޮޅުމީހަ ގާތު އަޅުގަނޑު އެދުނީ އެއްމެ ކަމަކުއެވެ. އޮޑި ރަނގަޅަށް ބަލަހައްޓައި ދިނުމަށެވެ. އޮޑިން ފައިދާ ނެރެދިނުމަށެވެ. ފަޅުވެރިންނާ ގުޅިގެން އިޙްލާސްތެރިކަމާ އެކު މަސައްކަތް ކޮށްދިނުމަށެވެ. ކޮންމެއަކަސް ކެޔޮޅުމީހާ އޮޑިޔާއިގެން ފުރައިފިއެވެ. ފުރަތަމަ ދަތުރު ނުނިމެނީސް ކެޔޮޅުގެ އެހީތެރި މީހާއާ މައްސަލަ ޖެހިއްޖެއެވެ. ކެޔޮޅުގެ އެދުމުގެ މަތިން އެމީހާ އޮޑިން ބާލާ، އާމީހަކު އަރުވަދީފީމެވެ. މިފަހަރުވެސް ކެޔޮޅުގެ ލަފާގެ މަތިންނެވެ.

އޮޑި ދަތުރަކަށް ފަހު ދަތުރެއް ކުރަމުން ދެއެވެ. ކޮންމެ ދަތުރެއްގައިވެސް އެތައްބަޔަކު އޮޑިން ބަދަލު ކުރަންޖެހެއެވެ. ކެޔޮޅުމީހާ ގަޔާ ނުވާތީއެވެ. އޮޑިން ބާލާ މީހުން ބުނާ ގޮތުން މަސްވެރިކަން ވެސް ރަނގަޅެވެ. މަސް ވެސް ބާނައެވެ. އެކަމަކު އަޅުގަނޑަކަށް ފައިދާއެއް ނުވެއެވެ. ލާރިޔެއް ނުލިބޭތާނގައި މަސް ބައެއް ވެސް ނުލިބެއެވެ. މިކަމާ ކެޔޮޅުމީހާއާ ސުވާލުކުރުމުން ބުނަނީ މަސްވެރިކަން ދަށީ ކަމުގައެވެ. ޚަރަދު ބޮޑީ ކަމުގައެވެ. ފައިދާ ނުވަނީ ކަމުގައެވެ. ފަހުން ރަނގަޅުވާނޭ ކިޔައިގެން ކޮންމެ ފަހަރަކު ވެސް ކެޔޮޅުމީހާ އަޅުގަނޑުގެ ބޯ ކާލައެވެ. ބައެއް ދަތުރުތައް ނިންމާފައި އައުމުން ލާރިއެއް ނުލިބޭހޭ އެހުމުން ދައްކަނީ އޮޑީގެ ކޮންމެ ވެސް މައްސަލައެކެވެ. ބައެއް ފަހަރު އިންޖީނު ގޯސްކުރެވެ. ބައެއް ފަހަރު ހުންގާނު ވެސް ގޯހެވެ. އެންވަތާއި އޮޑީގެ ވާވެލާވެލި ވެސް ގޯހެވެ. މިއިން ކޮންމެ ފަހަރަކު އެކަމަށް ބަދަލު ކޮށްދެވޭތޯ އަޅުގަނޑުގެ ވަރުން އަޅުގަނޑު މަސައްކަތް ކޮށްދެމެވެ. ފައިދާއެއް ނުލިބި ހަރަދު ކޮށްކޮށް އަތްމަތި ހުސްވާން ކައިރިވެއްޖެއެވެ. އޮޑީގެ ތަންތަން ބަދަލު ކޮށްކޮށް އޮޑި ބަނތްއިރު ހުރި ސިފަ ބަދަލުވާން ކައިރިވެއްޖެއެވެ. އޭރު މީހުން އަޅުގަނޑުގެ ގާތުގައި ކެޔޮޅުމީހާގެ ވާހަކަ ދައްކަން ފަށައިފިއެވެ. އޮޑިން އޭނާ ވައްކަން ކުރާ ވާހަކައެވެ. އޮޑީގައި ހުންނަ ބައެއް ސާމަނު އަޅުގަނޑަށް ނޭނގި ވިއްކާ ވާހަކައެވެ. އެކަމާ ސުވާލު ކުރުމުން ވެސް މޮޅު ވާހަކަ ދައްކައިގެން އޭނާ އަޅުގަނޑަށް އޮޅުވާލައެވެ.

ކޮންމެއަކަސް މިހެން އުޅެނިކޮށް އޮޑި ފަރަށް އަރައިފި ކަމުގެ ޚަބަރު އަޅުގަނޑަށް ލިބިއްޖެއެވެ. ކެޔޮޅު އަޅުގަނޑަކަށް ޖަވާބުދާރީއެއްނުވެއެވެ. ފަޅުވެރިންގެ ފަރާތުން އަޅުގަނޑަށް އެންގުނު ގޮތުން އޮޑި ފަރަށް އެރިވަގުތު ކެޔޮޅުމީހާ އިނނީ ހުންގާނު ދޫކޮށްފައި ތާސް ކުޅޭށެވެ. އޭރު އޮޑީގެ ދެތިން މަޑުލެއް ނެއްޓި އޮޑި ދިޔަވާން ވެސް ފަށައިފިއެވެ. ކެޔޮޅުމީހާ ދެކެ އައިރުޅުން ވަގުތުން އޮޑިން ފައިބަން އޭނާއަށް އަންގައިފީމެވެ. ނަމަވެސް އޭނާ އަޅުގަނޑު ގާތުގާ ބުނީ އޮޑިން ނުފައިބާނެ ކަމަށެވެ. މިހާރު އެއީ އޭނާގެ އޮޑިއެއް ކަމަށެވެ.

ކޮންމެއަކަސް އަޅުގަނޑަށް ލިބުނީ ބޮޑު ޝޮކެކެވެ. ކަން ހިންގި ގޮތް އަޅުގަނޑަށް ރޭކާލީ ވަގުތު ފާއިތުވީ ފަހުންނެވެ. އޭރު އަޅުގަނޑުގެ އޮޑީގެ ރަޖިސްޓްރީ ގާޒިއަކަށް ރިޝްވަތުދީގެން އޭނާގެ ނަން މައްޗަށް އޮތީ ބަދަލުކޮށްފައެވެ. އޮޑިން ލިބުނުހާ ފައިސާއެއް ވަގަށް ނަގައިގެން މި އަށްވުރެ ބޮޑު އޮޑިއެއް ވެސް އޭނާ ބަނދެފިއެވެ.

ކޮންމެއަކަސް ބަޔަކު ދެއްކި ވާހަކައަކަށް ހެއްލިގެން ބަލާ ނުލައި ކެޔޮޅެއް ކަމަށް ހިތާ އަޅުގަނޑަށް އޮޑިއަށް އެރުވުނީ ބޮޑު ވަގެކެވެ. ކަނޑައެޅިގެން ހުރި މުރަނގަ ގަސްދޮށު މާލިމީއެކެވެ.