އެސްޓީއޯ މާލޭ ލީގުގައި ވަރުގަދަ ޓީސީ ސްޕޯޓްސް ކްލަބްގެ މައްޗަށް ވިކްޓްރީ ސްޕޯޓްސް ކްލަބްއިން ކުރި ހޯދައިފިއެވެ.

ޓީސީއާ ދެކޮޅަށް ކުޅުނު މެޗުން ވިކްޓްރީ މޮޅުވީ 2-1 ގެ ނަތީޖާއަކުންނެވެ. މިދިޔަ ސީޒަނުގައި ރާއްޖޭގެ ފުޓްބޯޅައިގެ ގަދަ ބާރެއްގެ ގޮތުގައި ނިންމާލި ޓީސީ މި ސީޒަނުގައި ކުޅުނު އެއްވެސް މެޗަކުން މިހާތަނަށް މޮޅުވެފައެއް ނުވެއެވެ. ހަމައެހެންމެ މި މެޗާއި ކުރިމަތިލިރި ވިކްޓްރީ މި ސީޒަނުގައި މިހާތަނަށް ކުޅުނު އެއްވެސް މެޗަކުން މޮޅުވެފައެއް ނުވެއެވެ.

މި މެޗު ފެށިގެން އެއް މިނެޓު ނުވަނީސް ވިކްޓްރީއިން ވަނީ ފުރަތަމަ ލަނޑު ޖަހާ ލީޑު ނަގާފައެވެ. މި ލަނޑު އެ ޓީމަށް ޖަހައިދިނީ ސްޕެއިންގެ ފޯވާޑް އެންހެލް ކަރާސްކޯ މުނޯޒްއެވެ. ވިކްޓްރީގެ ލީޑު އިތުރަށް ފުޅާވެގެންދިޔައީ މެޗުގެ 19 ވަނަ މިނެޓުގައި ޕެޑްރޯ ހެންރިކޭ ޖަހައިދިން ލަނޑާއެކުއެވެ. މީގެ ފަހުން ވެސް ވިކްޓްރީއިން ވަނީ ރަނގަޅު ކުޅުމެއް ދައްކައި ޓީސީގެ ގޯލަށް ނުރައްކާކުރުމަށް މަސައްކަތްކޮށްފައެވެ. ވިކްޓްރީއިން އުފެއްދި ހަމަލާތައް މަތަކުރަން ޓީސީގެ ކީޕަރުން ވަނީ ރަނގަޅު ކުޅުމެއް ދައްކާފައެވެ.

ދެ ލަނޑުގެ ލީޑެއްގައި އޮވެ ވިކްޓްރީއިން ފުރަތަމަ ހާފު ނިންމާލިއިރު ދެވަނަ ހާފުގައި ޓީސީއިން ވަނީ އެ ޓީމުގެ ކުޅުން ވަރުގަދަކޮށްފައެވެ. ވިކްޓްރީގެ ކީޕަރަށް މަތަނުކުރެވުނު ބޯޅައެއްގެ ފައިދާ ނަގައިގެން ޓީސީއަށް 67 ވަނަ މިނެޓުގައި ނަތީޖާގެ ފަރަގު ކުޑަކޮށްދިނީ ކްލެރަންސް ވިލިއަމްސްއެވެ. އެ ޓީމުގެ ކުރިޔަށް ކުޅުނު ކުޅުންތެރިންނަށް ވަނީ މެޗުގެ ފަހުވަގުތުކޮޅުގެ ތެރޭގައި ލަނޑު ޖެހުމަށް ރަނގަޅު ފުރުސަތުތަކެއް ލިބި ބޭކާރުވެފައެވެ. މެޗުގެ 89 ވަނަ މިނެޓުގައި ވިކްޓްރީގެ ދެވަނަ ލަނޑު ޖެހި ޕެޑްރޯއަށް ވަނީ ދެވަނަ ރީނދޫ ކާޑަކާއެކު ރަތް ކާޑު ދައްކައި ދަނޑުން ފޮނުވާލާފައެވެ.

ކުރިޔަށް އޮތް މެޗުގައި މާޒިޔާއާ ދެކޮޅަށް ވިކްޓްރީ ނުކުންނައިރު ޓީސީ ނުކުންނާނީ ކްލަބް ވެލެންސިއާ ދެކޮޅަށެވެ.