ގޮނޑީގެ މައްސަލާގައި ސުޕްރީމް ކޯޓުން ބާއްވަން އުޅުނު އަޑުއެހުން އަނެއްކާވެސް ކެންސަލް
މި މައްސަލައިގެ އަޑުއެހުން ތާވަލުކޮށްފައި އޮތީ ހޯމަ ދުވަހުގެ ހެނދުނަށް
ދިވެހި ރާއްޖޭގެ ސުޕްރީމް ކޯޓު: މެމްބަރުންގެ ގޮނޑީގެ މައްސަލާގައި ބާއްވަން އުޅުނު އަޑުއެހުން ވަނީ ކެންސަލްކޮށްފި
ރައްޔިތުންގެ މަޖިލީހުގެ 12 މެންބަރުންގެ ގޮނޑި ނުގެއްލޭ ކަމަށް ސުޕްރީމް ކޯޓުން ނިންމި ނިންމުން ބާތިލްކުރުމަށް ބަންޑާރަނައިބު ހުށަހެޅުއްވި މައްސަލައިގެ އަޑުއެހުމެއް ހޯމަ ދުވަހު ތާވަލު ކުރުމަށްފަހު އަނެއްކާވެސް ކެންސަލްކޮށްފި އެވެ.
މި މައްސަލައިގެ އަޑުއެހުން ތާވަލުކޮށްފައި އޮތީ ހޯމަ ދުވަހުގެ ހެނދުނު 11:00 އަށެވެ.
މީގެ ކުރިން ފެބްރުއަރީ 27 ވަނަ ދުވަހަށް ވެސް އަޑުއެހުމެއް ތާވަލުކުރި އެވެ. އެހެންނަމަވެސް، ފަހުން ވަނީ އެ އަޑުއެހުން ވެސް ކެންސަލްކޮށްފައެވެ. އެ ފަހަރު އަޑުއެހުން ކެންސަލްކުރީ މައްސަލަ ހުށަހެޅުއްވި ބަންޑާރަނައިބު އޮފީހުން އެދިގެންނެވެ.
ބަންޑާރަނައިބު ހުށަހަޅުއްވާއި ވަނީ މި މަހުގެ 1 ވަނަ ދުވަހު ސުޕްރީމް ކޯޓުގެ ފަސް ފަނޑިޔާރުންގެ އިއްތިފާގުން ނިންމަވާފައިވާ ނިންމުމުގެ ތިން ބައެއް ބާތިލްކޮށްދިނުމަށެވެ. އޭގެ ތެރެއިން އެއް ކަމެއްގެ ގޮތުގައި ހުށަހަޅުއްވާފައި އޮތީ ފްލޯކްރޮސް ކުރުމާ ބެހޭ ގޮތުން ސުޕްރީމް ކޯޓުން ނެރުނު އަމުރު ބާތިލް ކޮށްފައިވާތީ އެ އަމުރު އަލުން ނެރުމަށެވެ. އަދި 12 މެމްބަރެއްގެ ގޮނޑިއާ މެދު ސުވާލު އުފެދިފައިވަނިކޮށް އެ މެމްބަރުންގެ ގޮނޑި ނުގެއްލޭ ކަމަށާއި ހުރިހާ މެމްބަރުން ހިމަނައިގެން މަޖިލީހުގެ ޖަލްސާތައް ފެށުމަށް ނެރުނު އަމުރު ބާތިލް ކަމަށް ކަނޑައަޅަން ވެސް ބަންޑާރަނައިބު ވަނީއެދިވަޑައިގެންފައެވެ. މީގެ އިތުރުން ސުޕްރީމް ކޯޓުގެ ހުއްދަ ލިޔުމަކުން ލިބިގެން މެނުވީ ދިވެހި ރާއްޖޭގެ އެއްވެސް ކޯޓަކަށް އެއްވެސް ފަނޑިޔާރަކު ނުވަތަ އިސް ފަނޑިޔާރަކު ވިޔަސް އައްޔަން ކުރުމާ ބެހޭ ގޮތުން އެއްވެސް ކަމެއް އެހެން ފަރާތަކުން ނުކުރުމަށް ކަނޑައަޅާފައިވާ ބައި އުނިކުރުމަށް ވެސް ބަންޑާރަނައިބުގެ އޮފީހުން ހުށަހަޅާފައިވެއެވެ.
އެ މައްސަލަ ހުށަހެޅުއްވައި ބަންޑަރާނައިބު ވިދާޅުވެފައި ވަނީ މި މަހުގެ 1 ވަނަ ދުވަހު ސުޕްރީމް ކޯޓުން ނެރުނު އަމުރުގައިވާ އެ ބައިތައް އުނިކުރަން ހުށަހަޅުއްވީ އަދުލު އިންސާފު ގާއިމު ކުރުމަށްޓަކައި ގާނޫނު އަސާސީގެ ހަ ވަނަ ބާބުގައި ކަނޑައަޅާފައިވާ އުސޫލުތަކާ ހިލާފު ބައިތަކެއް ކަމަށް ފެންނާތީ ކަމަށެވެ. އަދި އެ މައްސަލަ ހުށަހެޅުއްވީ ގާނޫނު އަސާސީގެ 33 ވަނަ މާއްދާގެ (ނ) ދަށުން ގާނޫނީ ވެރިކަން ހިމާޔަތްކޮށް ނަގަހައްޓައި، ހިމާޔަތްކޮށް، ކުރިއެރުވުމަށާއި ރައްޔިތުންގެ ސަލާމަތަށާއި ރައްޔިތުންގެ މަންފާ އާއި އާންމު މައްސޫލިއްޔަތު ދިފާއު ކުރުމަށް ބަންޑާރަނައިބުގެ މައްސޫލިއްޔަތެއް ކަމުގައި ވާތީ ކަމަށް ވެސް ފާހަގަކުރައްވާފައިވެއެވެ.
މައްސަލަ ތާވަލުކޮށްފައިވާ އިރު ރާއްޖޭގައި ކުއްލި ހާލަތުގެ ނުރައްކާ އިއުލާނުކޮށް ސުޕްރީމް ކޯޓުގެ ފުރާޅުން އެ ކޯޓަށް ވަދެ އުއްތަމަ ފަނޑިޔާރު އަބްދުﷲ ސައީދާއި އެ ކޯޓުގެ ފަނޑިޔާރު އަލީ ހަމީދު ވަނީ ހައްޔަރުކޮށްފައެވެ. އޭގެ ފަހުން 1 ނޮވެމްބަރުގެ އަމުރުގައި ސޮއިކުރައްވާފައިވާ ފަސް ފަނޑިޔާރުންގެ ތެރެއިން ތިން ފަނޑިޔާރުން ވަނީ އެ ހުކުމުގެ ބައެއް ބައިތައް އެހެން އަމުރުތަކެއް ނެރެ ބާތިލްކޮށްފައެވެ.
