ކުއްލި ނުރައްކަލުގެ ހާލަތުގެ ގަރާރުގެ ދަށުން ފުލުހުން ހައްޔަރުކުރި ރައްޔިތުންގެ މަޖިލީހުގެ އިހަވަންދޫ ދާއިރާގެ މެމްބަރު މުހައްމަދު އަބްދުﷲ (މުހައްމާ)ގެ ފޯނު އަތުލުމަށް ފަހު ދޫކޮށްލައިފިއެވެ.
ފުލުހުން ބަލަމުންދާ މައްސަލައަކާއި ގުޅިގެން މުހައްމާ ހައްޔަރުކޮށްފައި ވަނީ އާދީއްތަ ދުވަހު މެންދުރުގައެވެ. ފުލުހުންގެ ހައްޔަރަށް ގެންދިއުމަށް ފަހު މުހައްމާގެ ފޯނު އަތުލުމަށް ފަހު އާދީއްތަ ދުވަހު ހަވީރުގެ ވަގުތެއް ވަނީ ދޫކޮށްލާފައެވެ.
މުހައްމާ ހައްޔަރުކޮށްފައިވާއިރު ރައްޔިތުންގެ މަޖިލީހުގެ އެހެން ބައެއް މެމްބަރުންވެސް ވަނީ ކުއްލި ނުރައްކަލުގެ ހާލަތުގެ ދަށުން ކަމަށްބުނެ ހައްޔަރުކޮށްފަ އެވެ. އޭގެ ތެރޭގައި ދަނގެތީ ދާއިރާގެ މެމްބަރު އިލްހާމް އަހުމަދާއި މައްޗަންގޮޅި ދެކުނު ދާއިރާގެ މެމްބަރު އަބްދުﷲ ސިނާނާއި ދިއްގަރު ދާއިރާގެ މެމްބަރު އަހްމަދު ފާރިސް މައުމޫނާއި ގަލޮޅު ދެކުނު ދާއިރާގެ މެމްބަރު އަހްމަދު މަހްލޫފުވެސް ހިމެނެ އެވެ.
އޭގެ އިތުރުން އުއްތަމަ ފަނޑިޔާރު އަބްދުﷲ ސައީދާއި ސުޕްރީމް ކޯޓުގެ ފަނޑިޔާރު އަލީ ހަމީދާއި ކުރީގެ ރައީސް މައުމޫނު އަބްދުލް ގައްޔޫމްވެސް ވަނީ ހައްޔަރުކޮށްފަ އެވެ.