އިދިކޮޅު ފަރާތްތަކުން ހަރަކާތެއް ހިންގާ ނަމަ އެންމެ ކުރީ ސަފުގައި އޭނާ ހުންނާނެއެވެ. ވަރުގަދަ ފަހުލަވާނެއްގެ ގޮތުގައެވެ. އިސްލާހަށް ކުރާ މަސައްކަތުގައި ވަރު ބަލި ކަމެއް ނެތި އެމްޑީޕީގެ ހަރަކާތްތަކުގައި އޭނާ އުޅޭތާ ހަތް އަހަރު ވެއްޖެއެވެ. މިއީ ލ. ގަމު އަވާލީ ދޭއް، ނައިމާ މުހައްމަދެވެ. މިދައްކަނީ "ރީނދޫ ސުކާފެއް" އަޅައިއިގެން އެމްޑީޕީ މުޒާހަރާތަކުން ފެންނަ "ނައީމާއްތަ" ގެ ވާހަކައެވެ.

އަންހެނުންގެ ހައްގުތަކާއި އަންހެނުންގެ ކެރިފޯރުންތެރިކަން ފާހަގަކުރާ ދުވަހެއްގައި ނައީމާއްތާގެ ބަހެއް ހޯދައިނުލައިފި ނަމަ އެކަން ވާނީ ވަރަށް އަބުއި ކަމަކަށެވެ. އެކުވެރި ނައީމާއްތަ އަށް ފެނުމާ އެކު ފުރަތަމަ ވެސް ދައުވަތުދިނީ އެކުގައި ދުފާލުމަށެވެ. "ކޮއްކޯ ދުފާލަން ވީއެއްނުން" ނައީމާއްތަ ބުންޏެއެވެ. ހިތްވަރު ގަދަ އުމުރުން 60 އަހަރުގެ ނައީމާއްތަގެ ދައުވަތު ގަބޫލުކޮށް ދުފުމުގައި އަހަރެން ބައިވެރިވީމެވެ. 

ނައީމާއްތަގެ ވާހަކަ ފެށީ ލ. އަތޮޅުގައި އޭނާ ހޭދަ ކުރި ދުވަސްތަކުގެ ވާހަކައިންނެވެ. ނުވަ ކުދިން އޭނާ ބަލާ ބޮޑު ކުރި ވާހަކައެވެ. އޭރު ވެސް ނައީމާއްތައަކީ ކެރިގެން ކަންކަމާ ކުރިމަތަލާން ކެރޭ އަންހެންނަކަށް ވާހަކަ ދައްކާލުމުން އެނގިގެންދިޔައެވެ. މިއީ ދެބަސްވެވެން ނެތް ހަގީގަތައެވެ. ކުރީގެ ރައީސް މުހައްމަދު ނަޝީދުގެ ވެރިކަން ބަދަލުވި ދުވަހުން ފެށިގެން މާލޭގައި ކުރާ މުޒާހަރާތަކަށް ނަޒަރު ހިންގާލުމުން އެކަން ހާމަވާނެއެވެ. މިދައްކަނީ ރީނދު ސްކާފެއް އަޅައިގެން ހުންނަ ނައީމާއްތަގެ "ހިތްވަރުގަދަ" ވާހަކައެވެ. ހައްގު ހޯދަން މަގުމައްޗަށް ނުކުތުމުން ދިމާވާ "ގޮންޖެހުންތަކުގެ" ވާހަކައެވެ.

 "ނުވަ ދަރިން ބަލާ ބޮޑުކުރީ ބައްޕައަކާ ނުލައި، އެކުދިންގެ ބައްޕަ ހަރަދެއް ނުކުރޭ. އަޅުގަނޑު އަބަދުވެސް ވަރަށް ބުރަކޮށް މަސައްކަތް ކުރަން. މަސް ކައްކާ ހިއްކާ، އަޅުގަނޑު އެކަނި މަސް ވެސް ކަނޑަން، އާންމްދަނީ ހޯދުމަށް ގިނަ މަސައްކަތްތަކެއް އޭރު ވެސް ކުރިން،" ރަށުގައި ދިރިއުޅުނު ދުވަސްތަކުގެ ވާހަކަ ދައްކަމުން ނައީމާއްތަ ބުންޏެއެވެ.

ފެބްރުއަރީ މަހުގެ ހަތް ވަނަ ދުވަހު ރައީސް ނަޝީދުގެ ވެރިކަން ބަދަލުވުމުން ކަނޑު ހުރަސްކޮށް ވެރިކަން ކުރާ މާލެ އަށް އައީ "އަނިޔާވެރިކަމާ ދެކޮޅަށް" ކުރާ މަސައްކަތުގައި ބައިވެރިވުމަށެވެ. އޭނާ ދެކޭ ގޮތުގައި ގުޅިފައިވާ ސިޔާސީ ޕާޓީތަކުން މިހާރު ކުރާ މަސައްކަތަކީ ގައުމީ މަސައްކަތެކެވެ.

"ފެބްރުއަރީ 6 ވަނަ ދުވަހު ދުންފިނި ހަރުގެ ތަޅާލި ހަބަރު ލިބިގެން އެރޭގެ ފަތިހު ފްލައިޓުން މާލެ އައީ. ދެން އައިސް ޓީވީ ބަލަން އިންދާ އެކަންތައް ނިމިގެން ދިޔައީ ( އީސް ނަޝީދުގެ ވެރިކަން ބަދަލުވެގެން ދިޔައީ). ދެން ފެބްރުއަރީ މަހުގެ އަށް ވަނަ ދުވަހު މަގުމައްޗަށް ނުކުތީ. އެ ނުކުތް ގޮތަށް އަތުންފައިން ދެވަނަ މަސައްކަތެއް ނުރަން. މިހާރު މިވީ ހަތް އަހަރު. މި ގޮތަށް ޕާޓީއަށްޓަކައި ޕާޓީގެ ހަރަކާތްތަކުގައި މުޒާހަރާތަކުގައި ހަރަކާތްތެރިވާ ތަން،"  ރައީސް ނަޝީދަށްޓަކައި "ޖަލުގައި އޮންނަން ތައްޔާރަށް" ހުންނަ ނައީމާއްތަ ބުންޏެއެވެ.

ކޮންމެއަކަސް ހަތް އަހަރު ދުވަހު ހިތްވަރަށް ކުޑަ ވެސް ބަދަލެއް ނާދެއެވެ. ނައީމާއްތަ ގޮވާ ގޮވެލި ފަތި މިހާރު ވެސް ވަރުބަލި ކަމެއް ނެތި އެ ދަނީ ގޮވަމުންނެވެ. މުޒާހާރާތަކުގެ ތެރެއިން 14 ފަހަރު ފުލުހުން ނައީމާއްތަ ހައްޔަރުކުރި އިރުވެސް، އެއްވެސް ފުލުހަކާ ދިމާއަށް ބަދުބަހެއް ބުނެފައި ނޯންނާނެ ކަމުގެ ޔަގީންކަން ނައީމާއްތަ ދެނީ ފަހުރުވެރިކަމާ އެކުގައެވެ. އެހެންނަވެސް ބައެއް ފުލުހުން ކަންކަންކުރަނީ "އަނިޔާވެރިކޮށް" އެކި ފަހަރުމަތިން އަނިޔާ ލިބިފައިވާ ކަމަށް ނައީމާއްތަ ބުންޏެއެވެ.

"އެސްއޯ މީހެއް ނައީމާއްތަ ގައިގައި ޖެހިއަސް ނުޖަހާނަން. ނުޖަހަން. ހަޑި އެއްޗެއް ބުންޏަސް ނުބުނާނަން. އެއީ ނައިމާއްތަ އަބަދު ވެސް ކަންކުރާ ގޮތް. ދެ ފަހަރު މަތިން ފުލުހުން އަނިޔާކުރި. އަނިޔާކުރީ ނަމަކަށް ނޫން،" ނައިމާއްތަ ބުންޏެއެވެ.

އެހެން ނަމަވެސް އެމުރުން ދުވަސްވީ އަންހެނަކު ހަތް އަހަރު ދުވަހު ވަރުބަލިކަމެއް ނެތި، ޖަހާ ޕެޕާސްޕްރޭއަކަށް، ކަރުނަ ގޭހަކަށް ނުބަލައި ހައްގުތަށް ކަށަވަރުކުރުމަށް ބެރިކޭޑް ފަހަތުގައި ސާބިތުކަމާ އެކު ހުންނާތީ ބައެއް މީހުންގެ ފާނޑުކިޔުންތަކާ އަމާޒުވާ ކަމަށް ނައީމާއްތަ ބުންޏެއެވެ. އަންހެނަކަށްވީމައެވެ. އުމުރުން ދުވަސްވެފައި ހުރުމުންނެވެ.

"މީހުން ބުނޭ، ދެން ކީއްކުރަން އުޅޭ ގޮތެއްހޭ ތިއީ. ނައީމާއްތަ ދެން ރަށަށް ދާށޭ. ތިއީ (މުޒާހަރާތަކުގައި ބައިވެރިވުން) ހަޑިކަމެއް ނޫންހޭ. ތިކަންތައް ނުކުރާށޭ ދެން. ތިހެން ތިއުޅެނީ އެމީހުންގެ ފުށުން (އެމްޑީޕީގެ ފަރާތުން) ކޯއްޗެއް ލިބޭތީހޭ. ކޮންކަމެއް ވާތީހޭ. އެކަމަކު ވެސް ނައީމާއްތަ ބުނަން މިއީ ނައީމާއްތަގެ އަމިއްލަ ކަމަކޭ. މިއީ މީހަކާ ބެހޭ ކަމެއް ނޫނޭ. ދެން ހިތްވަރު ލިބެނީ އާއިލާ އާއި ރައްޔިތުންގެ ފަރާތުން،" ނާއީމާއްތަ ވަރަށް އަސަރާ އެކު ބުންޏެއެވެ.

ބައިނަލްއަގްވާމީ އަންހެނުންގެ ދުވަހު އުމުރުން 60 އަހަރުގެ ނައީމާއްތަ ދޭ މެސެޖެކީ، ކަންކަމާ ކެރިގެން ކުރިމަލާ މީހަކަށް ކާމިޔާބު ވާނެ ކަމެވެ. އުންމީދު ގެއްލުވާލުމަކީ މޮޔަ ހިޔާލެއް ކަމަށެވެ. ނައީމާއްތަ މިއަދު ވެސް ހުރީ ހަމަ އެގޮތުގައެވެ. ކާމިޔާބު ނުލިބެނީސް ގެއަށް ވަންނަ ގޮތަކަށް ނޫނެވެ. ނައިމާއްތަ ނިންމާލުމުން ކިޔާލީ ނައިފަރު ދޮންހޮއްކޮގެ "ދިޔަވަތް ރަނަގަޅު އޮނޑި، ރިޔަލަށް ކެރަންޏާ" ލަވައެކެވެ.