ޗެމްޕިއަންސް ލީގު: ދެވަނަ ލެގުން ބަލިވި ނަމަވެސް ސިޓީ ކުއާޓާއަށް

ޔުއެފާ ޗެމްޕިއަންސް ލީގުގައި ސްވިޓްޒަލޭންޑުގެ އެފްސީ ބަސެލްއާ ދެކޮޅަށް ކުޅުނު ދެވަނަ ލެގުގެ މެޗުން ބަލިވި ނަމަވެސް މެންޗެސްޓާ ސިޓީ އިން ކުއާޓާގެ ޖާގައެއް ކަށަވަރުކޮށްފިއެވެ.

ސިޓީ ކުއާޓާއަށް ދަތުރުކުރީ 5-2 ގެ އެގްރިގޭޓް ނަތީޖާއަކުން ބަސެލްގެ މައްޗަށް ކުރި ހޯދައިގެންނެވެ. މި ދެ ޓީމު ބަސެލްގެ ދަނޑުގައި ކުޅުނު ފުރަތަމަ ލެގުގެ މެޗު 4-0 އިން ސިޓީ ކާމިޔާބުކުރިއިރު ސިޓީގެ ދަނޑުގައި ކުޅުނު ދެވަނަ ލެގުގެ މެޗު ފަހަތުން އަރައި 2-1 ގެ ނަތީޖާއަކުން ކާމިޔާބުކުރީ ބަސެލްއެވެ. މި މެޗުގައި ސޓީގެ ޓީމުގައި ހިމެނޭ މުހިންމު ކުޅުންތެރިންނަށް ފުރުސަތު ދިފައިނުވާއިރު އެ ކުޅުންތެރިންގެ ބަދަލުގައި ފުރުސަތު ދީފައި ވަނީ ޒުވާން ކުޅުންތެރިންނަށެވެ. އެގޮތުން ފިލް ފޯޑެން އާއި ގެބްރިއެލް ޖީސަސް އަދި ޖޯން ސްޓޯންސް ވަނީ މި މެޗުގައި ފެނިގެން ގޮސްފައެވެ.

ފުރަތަމަ ހާފު ފެށިގެން ސިޓީ އިން ވަނީ ބަސެލްގެ ގޯލަށް ނުރައްކާކުރުމަށް މަސައްކަތްކޮށްފައެވެ. މެޗުގެ ފުރަތަމަ ލަނޑު ޖަހައި ލީޑު ވެސް ނެގީ ސިޓީ އިންނެވެ. އެގޮތުން މެޗުގެ އަށް ވަނަ މިނެޓުގައި ބަނާޑޯ ސިލްވާ ތަނަވަސްކޮށްދިން ފުރުސަތަކުން އެ ޓީމަށް ލީޑު ނަގައިދިނީ ގެބްރިއެލް ޖީސަސްއެވެ. މި ލަނޑަށް ފަހު ވެސް ސިޓީއަށް ލީޑު ފުޅާކުރުމަށް ރަނގަޅު ފުރުސަތު ލިބުނުއިރު އެ ޓީމަށް އެ ފުރުސަތުތަކުގެ ބޭނުން ހިފިފައެއް ނުވެއެވެ. މިކަމުގެ ނަތީޖާއެއްގެ ގޮތުން މެޗުގެ 17 ވަނަ މިނެޓުގައި ބަސެލް އިން ވަނީ ނަތީޖާ ހަމަހަމަކޮށްފައެވެ. އެ ޓީމަށް ނަތީޖާ ހަމަހަމަވެގެންދިޔައީ މުހައްމަދު އެލްޔޫނިސީ ޖަހައިދިން ލަނޑުންނެވެ. ދެ ޓީމަށް ވެސް ވަނީ ނަތީޖާ އަނބުރާލުމަށް މި ހާފުގައި ރަނގަޅު ފުރުސަތު ލިބިފައެއެވެ.

ދެ ޓީމު އެއްވަރުވެއޮވެ ފުރަތަމަ ހާފު ނިމިގެންދިޔައިރު ބަސެލްގެ ކީޕަރު ވަނީ ދެވަނަ ހާފުގައި ވެސް މޮޅު ސޭވްތަކެއް ކޮށްފައެވެ. ކައުންޓާގައި ބަސެލް އިން ނުރައްކާކުރި އިރު އެ ޓީމުން ވަނީ މެޗުގެ 71 ވަނަ މިނެޓުގައި ލީޑު ނަގާފައެވެ. އެލްޔޫނުސީގެ އެހީތެރިކަމާއެކު މި ލަނޑު އެ ޓީމަށް ޖަހައިދިނީ މިޝެލް ލެންގްއެވެ. ސިޓީ އިން ވަނީ މި ލަނޑާއެކު ކުރިޔަށް ޖެހި ބަސެލްގެ ގޯލަށް ނުރައްކާ ކުރުމަށް މަސައްކަތްކޮށްފައެވެ. އެހެން ނަމަވެސް އެ ޓީމަށް ނަތީޖާ ހަމަހަމަކުރެވޭނެ ގޮތެއް ހޯދިފައެއް ނުވެއެވެ.

މި މެޗުގައި ސިޓީގެ ފުރަތަމަ އެގާރައިގައި ހިމެނުނު ޒުވާން މީޑްފީލްޑަރު ފިލް ފޯޑެން ވެގެން ގޮސްފައި ވަނީ ޗެމްޕިއަންސް ލީގުގެ ނޮކްއައުޓް ބުރުގައި ކުޅުނު އިނގިރޭސިވިލާތަށް ނިސްބަތްވާ އެންމެ ޒުވާން ކުޅުންތެރިޔާއަށެވެ. ހަމައެހެންމެ މި މެޗު ވެގެން ގޮސްފައި ވަނީ 36 މެޗުގެ ފަހުން އަމިއްލަ ދަނޑުގައި ސިޓީ ބަލިވި ފުރަތަމަ މެޗަށެވެ.

މެންޗެސްޓާ ސިޓީގެ ކޯޗު ޕެޕް ގާޑިއޯލާ ބުނީ ދެވަނަ ފަހަރަށް ކުއާޓާ ފައިނަލްގެ ޖާގައެއް ލިބުމަކީ އުފާކުރަން ޖެހޭ ކަމެއް ކަމަށާއި ފުރަތަމަ ހާފުގައި ފެނިގެންދިޔައީ ރަނގަޅު ކުޅުމެއް ކަމަށެވެ. އޭނާ ބުނީ ހަތަރު ލަނޑުގެ ލީޑަކާ އެކު ދެވަނަ ލެގާއި ކުރިމަތިލީ ދެވަނަ ލެގުން ބަލިވުމުގެ އުއްމީދުގައި ނޫން ކަމަށެވެ. އޭނާ ބުނީ ކުއާޓާގައި ކުޅުން ރަނގަޅު ނުކޮށްފި ނަމަ މުބާރާތުން ވަކިވާން ޖެހުމަކީ ވެސް ވެދާނެ ކަމެއް ކަމަށެވެ.

ބަސެލްގެ ކޯޗު ރަފައެލް ވިކީ ބުނީ މިއީ ވަރަށް ހާއްސަ މޮޅެއް ކަމަށާއި އެހެން ނަމަވެސް ކުއާޓާއަށް ދަތުރުނުކުރެވުމުން ހިތްހަމަނުޖެހޭ ކަމަށެވެ. އޭނާ ބުނީ ކުޅުނު މެޗާއި މެދު ފަހުރުވެރިވާ ކަމަށާއި ހަތަރު ލަނޑުގެ އެގްރިގޭޓެއް ބަދަލުކުރުމަކީ އެއްވެސް ޓީމަކަށް ކުރަން ފަސޭހަ ކަމަކަށް ވާނެ ކަމަށް ގަބޫލުނުކުރާ ކަމަށެވެ.

ކުއާޓާ ފައިނަލުގެ ގުރު ނެގުން އޮންނަނީ މި މަހުގެ 16 ވަނަ ދުވަހުއެވެ. މިހާތަނަށް ސިޓީގެ އިތުރުން ކުއާޓާއިން ޖާގަ ހޯދާފައިވަނީ ޔުވެންޓަސް އާއި ރެއާލް މެޑްރިޑްގެ އިތުރުން ލިވަޕޫލްއެވެ.