ލަންކާގައި ހިނގަމުންދާ ހަމަނުޖެހުންތައް އެ ގައުމަށް ހައްލު ކުރެވޭނެ:ޗައިނާ

މިހާރު ސްރީލަންކާއަށް ދިމާވެފައިވާ ހާލަތުން އަރައިގަތުމުގެ ގާބިލްކަން އެ ގައުމުގައި ހުންނާނެ ކަމަށް ގަބޫލުކުރާ ކަމަށް އެ ގައުމުގައި ބޮޑެތި އިންވެސްޓްމަންޓްތަކެއް ކޮށްފައިވާ ޗައިނާއިން ބުނެފިއެވެ.

ބުދަ ދުވަހު ޗައިނާއިން ބުނީ ސްރީލަންކާގެ އިޖްތިމާއީ ހަމަޖެހުން ގާއިމްކޮށް ތަފާތު ދީނީ ފިކުރުތައް އެކަތިގަނޑަކަށް ހެދުމުގެ ގާބިލުކަން އެ ގައުމުގައި ހުންނާނެ ކަމަށެވެ.

އާއްމުކޮށް ބާއްވާ ނޫސްވެރިންގެ ބައްދަލުވުމުގައި ވާހަކަ ދައްކަވަމުން ކެންޑީގައި މިހާރު ހިނގަމުންދާ ހަމަނުޖެހުންތަކާއި ބެހޭގޮތުން ޗައިނާގެ ފޮރިން މިނިސްޓްރީގެ ތަރުޖަމާނު ގެންގް ޝުއާންގް ވިދާޅުވީ ސްރީ ލަންކާގައި ތިބި ޗައިނާގެ ރައްޔިތުންގެ ސަލާމަތާ ރައްކާތެރި ކަމަށް ލަންކާއިން ވަރުގަދަ ފިޔަވަޅުތަކެއް އަޅާނެ ކަމަށް އުއްމީދުކުރާ ކަމަށެވެ.

ސްރީލަންކާގައި ހިނގަމުންދާ ދީނީ ހަމަނުޖެހުންތަކާއި ގުޅިގެން މިދިޔަ އަންގާރަ ދުވަހު ރައީސް މައިތިރިޕާލާ ސިރިސޭނާވަނީ އެގައުމުގައި ކުއްލި ނުރައްކަލުގެ ހާލަތު އިއުލާން ކުރެއްވާފައެވެ.

މިހަމަނުޖެހުންތަކާއި ގުޅިގެން ހޯމަ ދުވަހު ކެންޑީގައި ވަނީ ކާފިއު ހިންގާފައެވެ. ލަންކާގެ ބުޑިސްޓުންނާއި މުސްލިމުންނާއި ދެމެދު ހޯމަ ދުވަހު ހިނގި ހަމަނުޖެހުންތަކުގައި ބުޑިސްޓަކު މަރުވެފައިވާއިރު، މުސްލިމު ވިޔަފާރިވެރިންތަކެއްގެ ފިހާރަތަކުގައި ބުޑިސްޓުން ވަނީ ހުޅުޖަހާފައެވެ.