މުސްލިމުންގެ ކިބައިން ބުޑިސްޓުން މަޢާފަށް އެދެން ޖެހޭ: ހައުސް ލީޑަރު

ލަންކާގެ ކެންޑީ ޑިސްޓްރިކްޓްގައި މުސްލިމުންނާއި ބުޑިސްޓުންގެ މެދުގައި ހިނގި ހަމަނުޖެހުންތަކުގެ މައްސަލައިގައި މުސްލިމުންގެ ކިބައިން ބުޑިސްޓުން މަޢާފަށް އެދެން ޖެހޭނެ ކަމަށް އެޤައުމުގެ ޤާނޫނު ހަދާ މަޖިލީހުގެ ހައުސް ލީޑަރު ލަކްޝްމަން ކިރިއެއްލާ ވިދާޅުވެއްޖެއެވެ.

ކިރިއެއްލާ ވިދާޅުވީ ޤާނޫނު ހަދާ މަޖިލީހަށް ޤަރާރެއް ވައްދައި، މުސްލިމުންގެ ކިބައިން ބުޑިސްޓުން މަޢާފަށް އެދެން ޖެހޭނެ ކަމަށެވެ. އޭނާ ވިދާޅުވީ ދިގާނާ އަދި ތެލްދެނިޔާގައި ހިނގި ހަމަނުޖެހުންތައް ހިނގީ ޖާސޫސީ އިދާރާތަކުގެ ނާޤާބިލްކަމުން ކަމަށެވެ. އަދި އެސަރަހައްދުގައި ހަމަނުޖެހުންތައް ހިންގައި، މުސްލިމުންނާއި ބުޑިސްޓުންގެ މެދުގައި ހަމަނުޖެހުން އުފެއްދީ އެސަރަހައްދާ މާދުރުން އައި ބައެއް ކަން އޭނާ ފާހަގަކުރެއްވިއެވެ. އަދި އެކަން ފުލުހުންނަށާއި، އާއްމުންނަށް އެނގޭނެ ކަމަށާއި، އެހެން ނަމަވެސް އެސަރަހައްދުގައި ހަމަނުޖެހުން ހިންގަން އުޅޭކަން ފުލުހުންގެ އިސްކޮށް ތިބި ފަރާތްތަކަސް ނޭނގުނީ ޖާސޫސީ އިދާރާތައް ފެއިލްވުމުން ކަމަށް ކިރިއެއްލާ ވިދާޅުވިއެވެ.

ކެންޑީގައި ހިނގަމުންދާ ހަމަނުޖެހުންތަކުގައި ރޯކޮށްލާފައިވާ ތަނެއް

ކެންޑީގައި ހިނގި ދީނީ ހަމަނުޖެހުންތަކާ ގުޅިގެން ލަންކާގައި 10 ދުވަހަށް ކުއްލި ނުރައްކަލުގެ ޙާލަތު އިއުލާންކޮށް، ހަމަނުޖެހުން ހިނގަމުންދާ ސަރަހައްދުތަކުގައި ބުދަ ދުވަހުގެ ހެނދުނާ ހަމަޔަށް ވަނީ ކާފިއު އިއުލާންކޮށްފައެވެ. ކިރިއެއްލާ ވިދާޅުވީ މުސްލިމުންނާއި ބުޑިސްޓުންގެ ދީނީ ލީޑަރުން ވާހަކަ ދައްކައިގެން މިހާރު މައްސަލަ ހައްލުވެފައި ވާކަމަށާއި، ގެއްލުން ލިބުނު ފަރާތްތަކަށް ބަދަލު ދިނުމަށް ދެ ދީނުގެ ވިޔަފާރިވެރިން ވެސް އެއްބަސްވެފައި ވާކަމަށެވެ.

ހަމަނުޖެހުންތަކުގެ ސަބަބުން ލިބުނު ގެއްލުންތައް ދިރާސާކުރަނީ

ހަމަނުޖެހުންތަކާ ގުޅިގެން ލަންކާގެ ކެބިނެޓްގެ އެންމެ ބާރު ގަދަ އެއް ވަޒީރު ކަމަށްވާ މެގަޕޮލިސް އެންޑް ވެސްޓަރން ޑިވެލޮޕްމަންޓް މިނިސްޓަރ ޗަމްޕިކަ ރަނަވަކަ ވިދާޅުވީ ހަމަނުޖެހުންތައް އިތުރުވެ، ގެދޮރާއި މުދަލަށް ގެއްލުންދޭ ހިސާބަށް ކަންތައް ދިޔައީ ޤާނޫނު ތަންފީޒުކުރުމަށް ކަމާ ގުޅުން ހުރި އިދާރާތައް ލަސްވުމުން ކަމަށެވެ. އެގޮތުން އެންމެ ފުރަތަމަވެސް ދީނީ ހަމަނުޖެހުންތައް ހިނގަން ފެށިކަމުގެ ޚަބަރުތައް ފެތުރި، ސޯޝަލް މީޑިއާގައި އެވާހަކަތައް އާއްމުވުން ފިޔަވަޅު އެޅި ނަމަ ކަންތައް ގޯސް ނުވީސް ކަމަށް އޭނާ ފާހަގަކުރެއްވިއެވެ. ރަނަވަކަ ވިދާޅުވީ މުސްލިމުންނާ މެދު އެހެން ދީންތަކުގެ މެދުގައި ނަފްރަތާއި ބިރުވެރިކަން އުފެއްދުމަށް ކުރާ ކަންތައްތަކުގެ ސަބަބުން ސިންގަޅަ ބުޑިސްޓުން ވެސް މުސްލިމުން ދެކެ ބައެއް ފަހަރު ބިރު ގަންނަ ކަމަށާއި، އެކަން އެހެން ވެގެން ނުވާނެ ކަމަށެވެ. އަދި ހައްދު ފަހަނައަޅާފައިވާ މުސްލިމުންނަކީ މަދު ބައެއް ކަމަށާއި، އެހެންކަމުން ލަންކާ އެކަތި ގަނޑެއްގެ ގޮތުގައި އޮންނާނީ ހުރިހާ ދީންތަކެއް އެކުވެގެން މަސައްކަތްކުރުމުން ކަމަށް ރަނަވަކަ ވިދާޅުވިއެވެ.

ހަމަނުޖެހުންތަކާއި ގުޅިގެން ކެންޑީގައި ސްޕެޝަލް ޓާސްކް ފޯސް ވަނީ ޑިޕްލޯއި ކޮށްފައި

އާބާދީގައި 21 މިލިއަން މީހުން ދިރިއުޅޭ ލަންކާގައި ގިނައީ ބުޑިސްޓް ސިންގަޅައިންނެވެ. އެއީ އާބާދީގެ ގާތްގަނޑަކަށް 75 އިންސައްތައެވެ. ބައި މަދު މުސްލިމުންނަކީ އެޤައުމުގެ އާބާދީގެ ގާތްގަނޑަކަށް 10 އިންސައްތައެވެ. އަދި 13 އިންސައްތަ ހިންދޫއިން އުޅޭއިރު، 7 އިންސައްތަ އަކީ ނަޞާރާއިންނެވެ.

ލަންކާގައި ހިނގަމުންދާ ހަމަނުޖެހުންތަކުގެ ސަބަބުން އިދިކޮޅު ފަރާތްތަކުން ބޮޑުވަޒީރު ރަނިލް ވިކްރަމަސިންހަގެ އިތުބާރު ނެތްކަމުގެ މައްސަލަ ޤާނޫނު ހަދާ މަޖިލީހަށް އަންގާރަ ދުވަހު ވައްދަން ތާވަލުކުރުމަށް ފަހު އެކަން ވަނީ ފަސްކޮށްފައެވެ.