މެންޗެސްޓަރ ޔުނައިޓެޑަށް ކުޅޭ އިނގިރޭސި ފޯވާޑް މާކަސް ރަޝްފޯޑަށް އެކްލަބުގެ ފުރަތަމަ 11 އިން ޖާގަ ނުލިބުމަކީ، ފީފާ ވޯލްޑް ކަޕްގައި އިނގިރޭސި ގައުމީ ޓީމުން ޖާގަ ގެއްލެންޖެހޭ ސަބަބެއް ނޫން ކަމަށް ޔުނައިޓެޑްގެ ކޯޗު ހޯސޭ މޮރީނިއޯ ބުނެފި އެވެ.

އުމުރުން 20 އަހަރުގެ ޒުވާން ފޯވާޑް، މިދިޔަ ޑިސެމްބަރު މަހުގެ 26 ވަނަ ދުވަހުގެ ފަހުން އިނގިރޭސި ޕްރިމިއަރ ލީގުގައި ޔުނައިޓެޑް ކުޅުނު އެއްވެސް މެޗެއްގެ ފުރަތަމަ 11 ގައި ހިމެނިފައެއްނުވެއެވެ.

އެހެންނަމަވެސް މޮރީނިއޯ ބުނީ، ފުރަތަމަ 11 ގައި ހިމެނިގެން ދަނޑަށް ނިކުތަސް، ނުވަތަ ބަދަލު ކުޅުންތެރިޔެއްގެ ގޮތުގައި ކުޅެން ނިކުތަސް ރަޝްފޯޑް އަކީ ޔުނައިޓެޑަށް އަބަދުވެސް މުހިންމު ކުޅުންތެރިޔެއް ކަމަށެވެ.

އަދި ގައުމީ ޓީމުގެ ކޯޗު ރަޝްފޯޑް އަށް އިތުބާރު ކުރާނަމަ، އޭނާ ގައުމީ ޓީމަށް ނަގާނެ ކަމަށާއި، ކްލަބުގައި ކުޅުމުގެ ފުރުޞަތު ނުލިބުނަސް އެކަމުގައި މައްސަލައެއް ނެތް ކަމަށް މޮރީނިއޯ ބުންޏެވެ.

2016 ވަނަ އަހަރުގެ މެއި މަހު ގައުމީ ޓީމަށް ކުޅެން ފެށި ރަޝްފޯޑް ވަނީ، އިނގިރޭސި ގައުމީ ޓީމަށް 15 މެޗު ކުޅެ، 2 ލަނޑު ޖަހައިދީފައެވެ.

ކްލަބުގެ ފުރަތަމަ 11 އިން އާއްމުކޮށް ޖާގަ ނުލިބުނު ނަމަވެސް، ރަޝްފޯޑް ވަނީ މިސީޒަނުގައި ޔުނައިޓެޑް ކުޅުނު ހުރިހާ މުބާރާތެއްގައި 38 މެޗު ކުޅެ, 10 ލަނޑު ޖަހައިދީފައެވެ.

ޔުނައިޓެޑްގެ ފުރަތަމަ 11 އިން ޖާގަ ނުލިބުމާއި ގުޅިގެން މިއަހަރު ރަޝިއާގައި ބާއްވާ ފީފާ ވޯލްޑް ކަޕްގައި ވާދަކުރާ އިނގިރޭސި ޓީމުން ރަޝްފޯޑަށް ޖާގަ ގެއްލިދާނެ ކަމުގެ ބިރު ހީވި ނަމަވެސް، މޮރީނިއޯ ވަނީ އެކަމުގެ ކަންބޮޑުވުމެއް ނެތް ކަމަށް ބުނެފައެވެ.

އަދި ކްލަބުގައި އަބަދުވެސް ރަޝްފޯޑް އަށް ފުރުޞަތު އޮންނަކަން އޭނާ އަށް އިނގޭނެ ކަމަށާއި، ފުރަތަމަ 11 ގައި ނުހިމެނޭނަމަ، ބަދަލު ކުޅުންތެރިޔެއްގެ ގޮތުގައި ނަމަވެސް ޔުނައިޓެޑްގެ ކޮންމެ މެޗެއްގައި ރަޝްފޯޑް އަށް ފުރުޞަތު ދީފައިވާކަން މޮރީނިއޯ ފާހަގަ ކުރިއެވެ.

މޮރީނިއޯ އިތުރަށް ބުނީ، ކްލަބުގައި ކުޅެން ފުރުޞަތު ނުލިބޭ ކިތަންމެ ކުޅުންތެރިޔަކަށް ގައުމީ ޓީމުން ފުރުޞަތު ލިބޭ ކަމަށާއި، ޔުނައިޓެޑްގައިވެސް އެފަދަ ކުޅުންތެރިން އެބަތިބި ކަމަށެވެ.

އެގޮތުން ޔުނައިޓެޑްގެ ބަދަލު ކީޕަރު ސާޖިއޯ ރޮމޭރޯ އަށް ކްލަބުން ފުރުޞަތު ނުލިބުނު ނަމަވެސް، އޭނާ އަކީ އާޖެންޓީނާގެ ގައުމީ ފުޓްބޯޅަ ޓީމުގެ އެއްވަނަ ކީޕަރުކަން މޮރީނިއޯ ފާހަގަ ކުރިއެވެ.

އަދި ރަޝްފޯޑަށް އިނގިރޭސި ގައުމީ ޓީމުން ފުރުޞަތު ދިނުމާއި ނުދިނުން އޮތީ ގައުމީ ކޯޗު ގެރެތު ސައުތުގޭޓްގެ އަތްމަތީގައި ކަމަށާއި، ޔުނައިޓެޑަށް ކުޅުނަސް އަދި ނުކުޅުނަސް ރަޝްފޯޑަށް އިތުބާރު ކުރާނަމަ ގައުމީ ޓީމުން ފުރުޞަތު ދޭނެ ކަމަށް މޮރީނިއޯ ބުންޏެވެ.