ކުއްލި ނުރައްކަލުގެ ހާލަތުގައި ހައްޔަރުކުރި އެސްޕީޖީގެ ދެ އޮފިސަރަކު ދޫކޮށްލައިފިއެވެ.
މީގެ ހަފުތާއެއްހާ ދުވަސްކުރިން ހައްޔަރުކުރި އެ ދެ އޮފިސަރުން ސެކިއުރިޓީ ބަލަހައްޓަމުން ދިޔައީ ރައްޔިތުންގެ މަޖިލީހުގައެވެ. އެ މީހުން ދޫކޮށްލީ ކީއްވެގެން ކަމެއް ނޭނގެއެވެ.
ރާއްޖެއެމްވީއަށް އެނގިފައިވާ ގޮތުގައި ފެބްރުއަރީ 5 ގައި ކުއްލި ނުރައްކަލުގެ ހާލަތު އިއުލާނުކުރުމަށް ފަހު އެމްއެންޑީއެފްގެ އެތެރޭގައި "ހައްޔަރުކޮށްފައިވާ" ސިފައިންގެ މައްޗަށް ކޮށްފައިވަނީ "ފިތުނަފަސާދަ އުފެއްދުމާއި ސިފައިންގެ ސަފުތައް ބައިބައިކުރުމާއި ސަރުކާރާ ދެކޮޅަށް ނުކުތުމަށް މަސައްކަތް ކުރުމުގެ" ތުޙުމަތެވެ.
ކުއްލި ނުރައްކަލުގެ ހާލަތު އިއުލާނުކުރިފަހުން ގިނަ އަދަދެއްގެ ސިފައިން ހައްޔަރުކޮށްފައިވާއިރު، އެކަމާ ގުޅޭ ގޮތުން އެންއެންޑީއެފުން އެއްވެސް އެއްޗެއް ހާމައެއް ނުކުރެއެވެ.
ސިފައިންގެ ބައެއް ބޭކަލުން ހައްޔަރުކޮށްފައިވާއިރު، ބައެއް އިސްވެރިން ޒިންމާތަކުން އެކަހެރިކޮށްފައިވާ ކަމުގެ އަޑުތައްވެސް ވަނީ ފެތުރިފައެވެ. މިވާހަކަތައް މިހާތަނަށް އެމްއެންޑީއެފުން ދޮގެއް ނުކުރެއެވެ.
ސިޔާސީ މަގުސަދުގައި ހައްޔަރުކޮށް ހުކުމްކޮށްފައިވާ ނުވަ ބޭފުޅަކު ދޫކޮށްލުމަށާއި ރައްޔިތުންގެ މަޖިލީހުގެ 12 މެމްބަރުންގެ ގޮނޑި ނުގެއްލޭ ކަމަށް ކުރި ހުރުމަކީ، ބަޣާވާތެއްކަމަށް ރައީސް އަބްދުﷲ ޔާމީން ވަނީ ސިފަކުރައްވާފައެވެ. މިހާރު ރާއްޖެއަށް ކުރިމަތިވެފައިވާ ހާލަތަކީ "ހަނގުރާމަވެރި ހާލަތެއް"ގެ ގޮތުގައި ރައީސް ޔާމީން ސިފަކުރައްވާފައިވާއިރު، މިފަދަ ހާލަތުގައި ސިފައިންނާއި ފުލުހުން އަމަލުކުރަންޖެހޭނީ ކޮމާންޑަރު އަންގާ ގޮތަށް ކަމަށާއި ކޮމާންޑާރު ދެނީ ގާނޫނީ އޯޑަރެއްތޯ ބަލަން ނުޖެހޭނެ ކަމަށް އެ މަނިކުފާނު ވިދާޅުވިއެވެ.
ނަމަވެސް ސިފައިންނާއި ފުލުހުން ގާނޫނާ ޚީލާފު އަމުރަށް ތަބާވެގެން ނުވާނެކަމަށް ގާނޫނު އަސާސީ އާއި ޤާނޫނުތަކުގައި ބުނެފައިވެއެވެ.
