ކަނޑިތީމުގައި ހުރި އެމްޑީޕީގެ ބޮޑު ދިދަ ބިންދާލައިގެން ފުލުހުން ގެންގޮސްފި
ދިދަ ހުންނަނީ އެރަށު ބަނދަރު ސަރަހައްދުގައި
އެމްޑީޕީ ބޮޑު ދިދަ ފުލުހުން ތިރިކޮށްފައި
ށ ކަނޑިތީމުގައި ނަގާފައި ހުންނަ އެމްޑީޕީ ބޮޑު ދިދަ ބިންދާލައިގެން ފުލުހުން ގެންގޮސްފިއެވެ.
ރާއްޖެ އެމްވީއަށް މައުލޫމާތު ލިބިފައިވާ ގޮތުގައި އެރަށު ބަނދަރު ސަރަހައްދުގައި ނަގާފައި ހުންނަ އެ ދިދަ ތިރިކޮށްގެން ގެންގޮސްފައިވަނީ އެރަށުގައި ތިބޭ ފުލުހުންނެވެ.
ސޯޝަލް މީޑިއާގައި ދައުރުވާ ވީޑިއޯ އަކާއި ފޮޓޯތަކަކުން ފެންނަ ގޮތުގައި ފުލުހުންގޮސް އެދިދަ ތިރިކުރަނީ ދިދަ ދަނޑީގައި ޖަހާފައިވާ ވަލަކަށް ދަމައިގެންނެވެ. މައުލޫމާތު ލިބިފައިވާ ގޮތުގައި އެދިދަ ގެންގޮސްފައިވަނީ ދިދަދަނޑި ވައްޓާލައިގެންނެވެ
މިކަމާ ގުޅޭގޮތުން މައުލޫމާތެއް ސާފުކޮށްލަން އެރަށު ކައުންސިލްގެ ރައީސަށް ގުޅާލުމުން ފޯނަށް ޖަވާބު ދެއްވާފައެއް ނުވެއެވެ. އަދި ކައުންސިލްގެ ނައިބު ރައީސް ވިދާޅުވީ ރަށުން ބޭރުގައި ހުންނެވުމަށް ފަހު ރަށަށް އާދެވުނީ ވަރަށް ފަހުން ކަމަށާއި އެކަމާ ގުޅޭ މައުލޫމާތެއް ސާފުވެފައި ނުވާ ކަމަށެވެ. މީގެ އިތުރުން ކައުންސިލްގެ މެންބަރަކާ ގުޅުމުން އެބޭފުޅާ ވެސް ވިދާޅުވީ އެފަދަ ކަމެއް ނޭނގޭ ކަމަށެވެ.
ކުއްލި ނުރައްކަލުގެ ހާލަތު އިއުލާން ކޮށްފައިވާތީ ފުލުހުންގެ ބަހެއް ނުލިބެއެވެ.
