އިންސާނީ ހައްގުތަކަށް އަރައިގަންނަމުންދާ ފަރާތްތަކާއި ދެކޮޅަށް ފިޔަވަޅު އެޅުމަށް ރައީސް ނަޝީދު ގޮވާލައްވައިފި
ސަރުކާރުގެ އޮފިޝަލުންނާއި ދެކޮޅަށް ފިޔަވަޅު އެޅުމަށް ވަނީ ގޮވާލައްވާފައި
ކުރީގެ ރައީސް މުހައްމަދު ނަޝީދު
ރާއްޖޭގައި އިންސާނީ ހައްގުތަކަށް އަރައިގަންނަމުން އަންނަ ފަރާތްތަކާއި ދެކޮޅަށް ފިޔަވަޅު އެޅުމަށް ކުރީގެ ރައީސް މުހައްމަދު ނަޝީދު ޔޫރަޕިއަން ޔޫނިއަންއަށް ގޮވާލައްވައިފިއެވެ.
ރައީސް ނަޝީދު ކުރެއްވި ޓްވީޓެއްގައި ވިދާޅުވެފައިވަނީ ރާއްޖޭގައި މިހާރު ހިނގަމުންދާ ކަންކަން ކުށްވެރިކުރުމުގެ ބަދަލުގައި އިންސާނީ ހައްގުތައް ނިގުޅައިގަންނަމުން އަންނަ މީހުންނާއި ދެކޮޅަށް ޔޫރަޕިއަން ޔޫނިއަންއިން ފިޔަވަޅު އެޅުމަށް ގޮވާލައްވާ ކަމަށެވެ. ރައީސް ނަޝީދުގެ މި ޓްވީޓުގައި އެމަނިކުފާނު ވަނީ އެމަނިކުފާނުގެ ބައިނަލްއަގްވާމީ ގާނޫނީ ވަކީލުންގެ ޓީމުގައި ހިމެނިވަޑައިގަންނަވާ މަޝްހޫރު ގާނޫނީ ވަކީލު ޖެރެޑް ގެންސާ މި މައްސަލައާ ގުޅިގެން އީޔޫއަށް ހުށަހެޅުމަށް ތައްޔާރުކޮށްފައިވާ ހާއްސަ ކަރުދާހެއް އެޓޭޗް ކުރައްވާފައެވެ.
"ޕާސަސް ސްޓެރެޖީސް" އިން ތައްޔާރުކޮށްފައިވާ މި ކަރުދާހަކީ 63 ސަފްހާގެ ކަރުދާހަކަށްވާއިރު މި ކަރުދާހުގައި ވަނީ ރާއްޖޭގައި އިންސާނީ ހައްގުތަކަށް އަރައިގަތުމަށް ކުރެވިފައިވާ ކަންކަން ވަރަށް ތަފްސީލު ގޮތެއްގައި ހިމަނާފައެވެ. އެގޮތުން ގަސްތުގައި މީހުން ގެއްލުވާލުމާއި ނުހައްގުން މީހުން ހައްޔަރުކުރުމާއި ހައްޔަރުކުރެވޭ ވަގުތާއި ހައްޔަރު ކުރުމަށްފަހު ހައްޔަރުކުރެވޭ ފަރާތްތަކަށް ތަފާތު އެކި އަނިޔާ ކުރެވޭ ކަމަށާއި އެފަދަ ފަރާތްތަކުގެ މައްޗަށް ސާބިތުނުކުރެވޭ ތުހުމަތުތަކެއް ކުރެވިފައިވާ ކަމަށެވެ.
ހަމައެހެންމެ އދ ގެ ހިއުމަން ރައިޓްސް ކައުންސިލްގެ ގޮވާލުންތަކަށް ފުރަގަސްދީ ޑިއު ޕްރޮސެސްއަށް އަމަލުނުކޮށް މިނިވަން ޖުޑީޝިއަރީއެއް ނެތް ކަމަށް ގިނަ ބަޔަކު ބުނަމުންދާ އިރުވެސް ސަރުކާރުން މަރުގެ ހުކުމް ތަންފީޒުކުރުމަށް މަސައްކަތްކުރަމުންދާ ކަމަށް މި ކަރުދާހުގައިވެއެވެ. މީގެއިތުރުން ގާނޫނު އަސާސީއިން ރައްޔިތުންނަށް ކަށަވަރުކޮށްދޭ އެއްވެ އުޅުމުގެ މިނިވަންކަމާއި ހިޔާލު ފާޅުކުރުމުގެ މިނިވަންކަމާއި މައުލޫމާތު ހޯދައި ލިބިގަތުމަށް ހުރަސް އަޅަމުންދާ ކަމަށް ވެސް މި ކަރުދާހުގައިވެއެވެ.
ރައީސް ޔާމީންގެ ސަރުކާރުން ކުށްކުރާ މީހުންނަށް ހިމާޔަތްދެމުންދާ ކަމަށް ވެސް މި ކަރުދާހުގައި ފާހަގަކޮށްފައިވެއެވެ. އެގޮތުން ގޭންގުތަކާއި ފުލުހުންގެ ފަރާތުން ނޫސްވެރިންނަށާއި އިދިކޮޅު ސިޔާސީ ފަރާތްތަކަށާއި އެކްޓިވިސްޓުންނާއި ދެކޮޅަށް ދެމުންދާ ހަމަލާތައް ތަހުގީގު ކުރެވިފައި ނުވާކަމަށް ވެސް މި ކަރުދާހުގައިވެއެވެ.
ރައީސް ޔާމީން ސަރުކާރާ ހިންގެވުމާ ހަވާލުވުމަށްފަހު ދައުލަތް ހިންގުމުގެ ހުރިހާ ބާރެއް މުށުތެރެއަށް ލައްވާފައިވާކަން ވެސް ފާހަގަކޮށްފައިވެއެވެ. އެގޮތުން ޖުޑީޝިއަރީއަށް ނުފޫޒު ފޯރުވައި ރައްޔިތުންގެ މަޖިލީހަށް ވެސް އަތްގަދަކޮށްފައިވާކަމަށް މި ކަރުދާހުގައިވެއެވެ. ހަމައެހެންމެ އެމަނިކުފާނުގެ ނިންމުންތަކާއި ދެކޮޅަށް މަސައްކަތް ކުރައްވާ ބޭފުޅުން ނުފޫޒާއި ބާރުގެ ބޭނުން ނަހަމަގޮތުގައި ކުރައްވައިގެން އެ މަގާމުތަކުން ދުރުކޮށްފައިވާކަން ވެސް ފާހަގަކޮށްފައިވެއެވެ.
ރައީސް ޔާމީން 2013 ވަނަ އަހަރު ވެރިކަމާއި ހަވާލުވެޑައިގެންނެވި ފަހުން އީޔޫއިން އެމަނިކުފާނުގެ މިފަދަ އަމަލުތައް ކުށްވެރިކުރި ނަމަވެސް އެއްވެސް ފިޔަވަޅެއް މިހާތަނަށް އަޅާފައިނުވެއެވެ.
މި ކަރުދާހުގައި ވަނީ އީޔޫއިން އިންސާނީ ހައްގުތަށް ފޯރުކޮށްދިނުމުގައި އިހުމާލުވެފައިވާ ގައުމުތަކުގެ ތެރެއިން ބެލާރޫސް، ބުރުންޑީ އަދި ވެނެޒުއޭލާގެ އިތުރުން ޒިމްބާބުވޭއާ ދެކޮޅަށް ފިޔަވަޅު އަޅާފައިވާކަން ފާހަގަކޮށް، ރާއްޖެ ވެސް މިއަދު އޮތީ އެފަދަ ހާލަތެއްގައި ކަން ފާހަގަކޮށްފައިވެއެވެ. އެގޮތުން ރާއްޖޭގެ ސަރުކާރުން ރައްޔިތުންނަށް ބިރު ދައްކަމުންދާ ކަމަށާއި އިންޓެލިޖެންސް އަދި ސަލާމަތީ ހިދުމަތްތައް މިފަދަ ކަންކަން ކުރުމުގައި ސަރުކާރުން ބޭނުންކުރަމުންދާ ކަމަށް ވެސް މި ކަރުދާހުގައިވެއެވެ. ހަމައެހެންމެ މިފަދަ ކަންކަމުގެ ސަބަބުން ރާއްޖޭގެ ހާލަތު ދުވަހެއް ދުވަހަކަށް ގޯސްވެފައިވާ ކަމަށާއި ރައްޔިތުންގެ ސަލާމަތާއި ރައްކާތެރިކަން މިވަގުތު ވަނީ ބިރުވެރިކަމެއްގެ ތެރޭގައިކަން ވެސް ފާހަގަކޮށްފައިވެއެވެ. ރާއްޖެއަކީ އާބާދީގެ ނިސްބަތުން އިސްލާމިކް ސްޓޭޓްއަށް ނިސްބަތްވާ މީހުން އެންމެ ގިނަ ގައުމު ކަމަށާއި މިކަމުގެ ސަބަބުން ސަރަހައްދީ ގައުމުތަކަށް ވެސް ނުރައްކާ އޮތްކަން ފާހަގަކޮށްފައިވެއެވެ.
ރައީސް ޔާމީނާއެ އެމަނިކުފާނުގެ ސަރުކާރާއި ދެކޮޅަށް އީޔޫއިން ފިޔަވަޅު އަޅަންޖެހޭ މައިގަނޑު ތިން ސަބަބެއް މި ކަރުދާހުގައި ފާހަގަކޮށްފައިވެއެވެ. އެގޮތުން ރާއްޖެއަކީ އިސްލާމިކް ސްޓޭޓްއަށް ނިސްބަތްވާ ގިނަ ހަނގުރާމަވެރިންގެ ގައުމަކަށްވުމާއެކު މިއީ ދުނިޔޭގެ ސަލަމާތަށް ވެސް ހުރި ނުރައްކަލެއްގެ ގޮތުގައި ފާހަގަކޮށްފައިވެއެވެ. ދެވަނަ ކަމަކަށް ފާހަގަކޮށްފައިވަނީ ރައީސް ޔާމީންގެ ފަލްސަފާއާއި އެމަނިކުފާނުގެ ސަރުކާރުގެ އޮފިޝަލުންނަކީ ރާއްޖޭގައި ޑިމޮކްރެސީގެ ރިވެތި އުސޫލުތައް ނައްތާލައި އިންސާނީ ހައްގުތަކަށް އަރައިގަންނަމުންދާ ބަޔަކަށްވުމެވެ. ހަމައެހެންމެ ތިންވަނަ ކަމެއްގެ ގޮތުގައި ފާހަގަކޮށްފައިވަނީ ރާއްޖެ އޮންނަ ސަރަހައްދަކީ ވަރަށް މުހިންމު ސަރަހައްދަކަށް ވުމާއެކު ރާއްޖޭގެ ހާލަތު ދުވަހެއް ދުވަހަކަށް ގޯސްވުމަކީ އީޔޫއަށް ވެސް ހުރި ނުރައްކަލެއް ކަމަށެވެ.
އީޔޫއަކީ ބައިނަލްއަގްވާމީ ގޮތުން އިންސާނީ ހައްގުތައް ހޯދައިދިނުމަށް މަސައްކަތްކުރާ އިއްތިހާދައަކަށް ވުމާއެކު ރާއްޖޭގައި މިހާރު ހިނގަމުންދާ ކަންކަމާއި ގުޅޭގޮތުން އެ އިއްތިހާދުގެ ކައުންސިލްގައި ގޮތެއް ނިންމުމަށް މި ކަރުދާހުގައި ވަނީ އެދިފައެވެ. ހަމައެހެންމެ ރައީސް ޔާމީގެ ސަރުކާރުގެ އޮފިޝަލުންނާއި އެ އޮފިޝަލުންގެ އަރިސް ބޭފުޅުންނާއި ދެކޮޅަށް ވަގުތުން ވަގުތަށް ފިޔަވަޅު އަޅައިދިނުމަށް ވެސް ވަނީ އެދިފައެވެ.
މިފަދަ ކަރުދާހެއް އީޔޫއަށް ހުށަހެޅިފައިވާއިރު ހޯމަ ދުވަހު އޮންނަ އީޔޫ ކައުންސިލްގެ ބައްދަލުވުމުގައި ރާއްޖެއާ މެދު ގޮތެއް ނިންމުމަށް ވަނީ ކަނޑައަޅާފައެވެ. ހަމައެހެންމެ ރާއްޖެއާ މެދު ގޮތެއް ނިންމާނީ އެއްވެސް ބަހުސްކުރުމަކާއި ނުލައިކަން ވެސް ވަނީ ކަށަވަރުވެފައެވެ.
