ޒުވާނުންގެ މުޒާހަރާއިން ހައްޔަރުކުރި އެންމެން ދޫކޮށްލައިފި
ރައްޔާން އާއި އަނިލް ބަންދުން މިނިވަންވީ ދޫނިދޫގައި 8 ދުވަހު ބަންދުގައި ބެހެއްޓުމަށް ފަހު
ޒުވާނުންގެ މުޒާހަރާގެ ތެރެއިން ހައްޔަރުކުރި ފަސް މީހުން
ފެބްރުއަރީ މަހުގެ އެއްވަނަ ދުވަހު ދިވެހި ރާއްޖޭގެ ސްޕްރީމް ކޯޓުން ނެރުނު އަމުރު ތަންފީޒު ކުރުމަށް ގޮވާލައި އެމްޑީޕީގެ ޒުވާނުން ކުރި މުޒާހަރާގެ ތެރެއިން ހައްޔަރު ކުރި 5 މީހުން ބަންދުން މިނިވަން ކޮށްފިއެވެ.
ފެބްރުއަރީ މަހުގެ 10 ވަނަ ދުވަހު ހައްޔަރު ކުރި ފަސް މީހުން ބަންދުން މިނިވަން ކޮށްފައި ވަނީ ހޯމަ ދުވަހުގައެވެ. ފުލުހުންގެ ބަންދުން ދޫކޮށްލި މީހުންގެ ތެރޭގައި ގައްދޫ ކައުންސިލް މެމްބަރު ރައްޔާން ޖަމާލު އާއި ރަސްދޫ ކައުންސިލް މެމްބަރު އަހުމަދު އަނިލް، ގާނޫނީ ވަކީލް ޝީނާ މުހައްމަދު ގެ އިތުރުން އެމްޑީޕީ ޒުވާނުންގެ ގޮފީގެ ރައިސް މީކާއިލް ނަސީމް އަދި ޒުވާނުންގެ ގޮފީގެ މެމްބަރު ސަފާއަތު އަހުމަދު ހިމެނެއެވެ.
ރައްޔާން އާއި އަނިލް ބަންދުން މިނިވަން ކުރީ އަށް ދުވަހު ދޫނިދޫގައި ބަންދުގައި ބެހެއްޓުމަށް ކްރިމިނަލް ކޯޓުން ދެފަރު މަތިން އިތުރު ކުރި ބަންދުގެ މުއްދަތު ހަމަވުމުންނެވެ. މީކާއިލް ، ޝީނާ، އަދި ސަފާއަތު ބަންދުން މިނިވަންވީ ގޭބަންދުގައި ބެހެއްޓުމަށް ކްރިމިނަލް ކޯޓުން ކުރި އަމުރު ހަމަވުމުންނެވެ.
