ރިލްވާން ވަގަށް ނެގި މައްސަލާގައި ކުރާ ދައުވާގެ އަޑުއެހުން އަނެއްކާ ވެސް ކެންސަލް
15 ފެބުރުއަރީ 2018 | ބުރާސްފަތި 14:24މިއީ މައްސަލަ ކެންސަލްވި ތިން ވަނަ ފަހަރު
ރިލްވާން ގެއްލުނު ރޭގެ ވީޑިއޯ ފުޓޭޖްތަކެއް -- ރާއްޖެއެމްވީ ފޮޓޯ : އަޒުމޫން އަހުމަދު
މިނިވަން ނިއުސްގެ ނޫސްވެރިޔާ އަހުމަދު ރިލްވާން އަބްދުﷲ ގަދަކަމުން ފޮރުވި ކަމަށް ބުނެ ތިން މީހެއްގެ މައްޗަށް އުފުލާފައިވާ ޓެރަރިޒަމްގެ ދައުވާގެ އަޑުއެހުން އަނެއްކާ ވެސް ކެންސަލް ކޮށްފި އެވެ.
ބުރާސްފަތި ދުވަހުގެ މެންދުރު ފަހު 3.00ގައި ބާއްވަން އޮތް އަޑުއެހުން ކެންސަލް ކޮށްފައިވާއިރު މިއީ މި މައްސަލައިގެ އަޑުއެހުމެއް ބޭއްވުމަށް ތާވަލްކުރުމަށް ފަހު ޖެހި ޖެހިގެން ކެންސަލް ކުރި ތިން ވަނަ ފަހަރެވެ. މި އަޑުއެހުންތައް ކެންސަލް ކުރި ސަބަބެއް ކްރިމިނަލް ކޯޓުން ނުބުނެވެ.
ރިލްވާން ފޮރުވި ކަމަށް ތުހުމަތުކޮށް ޓެރަރިޒަމްގެ ދައުވާ އުފުލާފައިވަނީ ގ. ހިލްޓަން، އާލިފް ރައޫފާއި ގދ. ވާދޫ، ކަރަންކާގޭ، މުހައްމަދު ނޫރައްދީނާއި ސ. ހުޅުދޫ އަތިރިއާގެ، މުހައްމަދު ސުއައިދުގެ މައްޗަށެވެ. އޭގެ ތެރެއިން ސުއައިދު ރާއްޖެއިން ބޭރުގައި ހުރުމުން އޭނާގެ ބައި ކުރިއަކަށް ނުގެންދެ އެވެ.
މި މައްސަލާގައި އެންމެ ފަހުން އަޑުއެހުމެއް ބޭއްވީ މި މަހުގެ 12 ވަނަ ދުވަހު އެވެ. އެ ދުވަހު ދައުލަތުން ހެކިންގެ ގޮތުގައި ހުށަހެޅި މީހުންގެ ތެރެއިން ހަތަރު މީހެއްގެ ހެކިބަސް ވަނީ ނަގާފަ އެވެ. އެމީހުންގެ މައްޗަށް ކުށް ސާބިތު ކުރުމަށް ދައުލަތުން ގިނަ ބައެއްގެ ނަން ހެކީގެ ގޮތުގައި ހުށަހަޅާފައިވާއިރު ދެން އޮންނާނީ ބާކީ ތިބި މީހުންގެ ތެރެއިން މީހުންގެ ހެކިބަސްނެގުމެވެ.
ދައުލަތުން އެ މީހުންގެ މައްޗަށް ކޮށްފައިވާ ދައުވާގައި ބުނެފައިވަނީ، 2014 ވަނަ އަހަރުގެ އޯގަސްޓް މަހުގެ އަށްވަނަ ދުވަހުގެ ރޭ އަހުމަދު ރިލްވާން ދިރިއުޅޭ ފްލެޓް ކުރިމަތިން، ގަދަކަމުން ކާރަކަށް އަރުވައިގެން އޭނާ ފޮރުވާފައިވާ ކަމަށެވެ. އަދި އެކަން ކުރީ ދައުވާ ލިބޭ ތިން މީހުން ކަމަށް ދައުލަތުން ވަނީ ބުނެފައެވެ
