ހެކިތައް ހުރި ކަމަށް ބުނާ އިރު އެކަމާ ގުޅޭ ގޮތުން އުއްތަމަ ފަނޑިޔާރާ ސުވާލެއް އަދި ނުކުރޭ: ވަކީލު
14 ފެބުރުއަރީ 2018 | ބުދަ 12:46ހޭބިއަސްކޯޕަސްގެ މައްސަލައެއް ކްރިމިނަލް ކޯޓަށް ވަނީ ހުށަހަޅާފައި
އުއްތަމަ ފަނޑިޔާރު އަބްދުﷲ ސައީދުގެ ގާނޫނީ ޓީމުގެ ފަރާތުން ބޭއްވި ނޫސްވެރިންގެ ބައްދަލުވުމުގައި ހިސާން އާއި މާރިޔާ މައުލޫމާތު ދެއްވަނީ: ފޮޓޯ-ރާއްޖެއެމްވީ
އުއްތަމަ ފަނޑިޔާރު އަބްދުﷲ ސައީދުގެ މައްޗަށް ތުހްމަތުކުރާ މައްސަލާގައި ގިނަ ހެކިތަކެއް އެބަހުރި ކަމަށް ފުލުހުން މީޑިޔާ މެދުވެރިކޮށް ބުނަމުން ދިޔަ ނަމަވެސް އެއިން އެއްވެސް ކަމަކާ ގުޅޭ ގޮތުން ފުލުހުންގެ ތަހްގީގުގައި މިހާތަނަށް ސުވާލެއް ކޮށްފައިނުވާ ކަމަށް އެމަނިކުފާނުގެ ގާނޫނީ ވަކީލު ހިސާން ހުސެއިން ވިދާޅުވެއްޖެއެވެ.
އުއްތަމަ ފަނޑިޔާރު އަބްދުﷲ ސައީދުގެ ގާނޫނީ ޓީމުގެ ފަރާތުން ބޭއްވި ނޫސްވެރިންގެ ބައްދަލުވުމުގައި ހިސާން ވިދާޅުވީ އެމަނިކުފާނުގެ މައްޗަށް ކުރެވޭ ތުހްމަތުތަކަށް އެމަނިކުފާނު އިންކާރު ކުރައްވާ ކަމަށެވެ. ހިސާން ވިދާޅުވީ ތުހްމަތުކުރެވޭ މައްސަލަތަކާ ހަވާލާދޭ ގާނޫނީ މާއްދާތައް އުއްތަމަ ފަނޑިޔާރަށް ފުލުހުން އިއްވުމުން އެއީ އެއްވެސް އަސާސެއްގެ މައްޗަށް ބިނާކޮށްގެން ކޮށްފައިވާ ތުހްމަތުތަކެއް ނޫން ކަމަށް އެމަނިކުފާނު ވިދާޅުވި ކަމަށެވެ.
ނަމަވެސް އުއްތަމަ ފަނޑިޔާރުގެ ދެއްވި ޖަވާބާ ގުޅިގެން އެ ތުހްމަތުތަކަކީ އަސާސެއް ނެތް ތުހްމަތުތަކެއް ކަމަށް އެއްވެސް ތާކުން ކަނޑައަޅާފައިނުވާ ކަމަށް ފުލުހުން ބުނެފައިވާ ކަމަށް ހިސާން ވިދާޅުވިއެވެ. އަދި ކުށެއްގެ ތުހްމަތު ކުރެވުމުން އެ ކުށަކަށް އިންކާރު ކުރުމަކީ ކޮންމެ މީހަކަށް ވެސް ލިބިފައިވާ ހައްގެއް ކަމަށްވާއިރު އެ ހައްގު ވެސް އުއްތަމަ ފަނޑިޔާރަށް ލިބިގެން ނުވަނީތޯ ހިސާން ސުވާލު އުފެއްދެވިއެވެ.
"ހަނު ހުރުމުގެ ހައްގު ބޭނުން ކުރުމާއި ނުކުރުމާ ހިސާބަށް ވެސް ދާނީ އެމަނިކުފާނުގެ މައްޗަށް ތުހްމަތު ކުރެވޭ މައްސަލައިގައި ސުވާލެއް ކުރުމުން. އަދި ތަހްގީގަށް އެއްބާރުލުން ދިނުމާއި ނުދިނުން ބިނާވާނީ ސުވާލެއް ކުރުމުން، އަދި އެ ވިދާޅުވާ ތުހްމަތުތަކާ ގުޅޭ ގޮތުން ސުވާލެއް ނުކުރޭ،" ހިސާން ވިދާޅުވިއެވެ.
އަދި ތަހްގީގަށް އެއްބާރުލުން ދިނުން ފުލުހުން މާނަކުރަނީ ކިހިނެތްކަން ސާފުނުވާ ކަމަށް ވެސް ހިސާން ފާހަގަ ކުރެއްވިއެވެ.
"އަޅުގަނޑުމެނަކަށް ނުވިސްނޭ ފުލުހުން އެބުނާ އެއްބާރުލުން ދިނުމަކީ ކޮބައި ކަމެއް. އެއްބާރުލުން ދިނުމަކީ އެ ބޭފުޅުން އެ ކުރާ ތުހްމަތެއް ކުރީމަ އިއުތިރާފުގެ ބަޔާނެއް ދިނުންތޯ. އެ ބޭފުޅުން ގެންނަވާ ކޮންމެ އެއްޗެއްގައި ސޮއި ކުރުންތޯ،" ހިސާން ވިދާޅުވިއެވެ.
ހިސާން ވިދާޅުވީ ފުލުހުންގެ ބަންދަށް ގެނެވޭ މީހާގެ ބަންދާ މެދު ގޮތެއް ކަނޑައެޅުމަށް 24 ގަޑިއިރުގެ ތެރޭގައި ކޯޓަށް ހާޒިރުކުރަން ޖެހޭނެ ކަމަށް ގާނޫނު އަސާސީގައި ބުނެފައިވާ މާއްދާ ސަސްޕެންޑް ކުރީ ވެސް އުއްތަމަ ފަނޑިޔާރު ހައްޔަރުކުރުމަށް ފަހު ކަމަށްވާއިރު އެމަނިކުފާނު ކޯޓަށް ހާޒިރުކުރަން ޖެހޭނެ ކަމަށެވެ. އަދި އެމަނިކުފާނު އެ ހުންނެވީ ގައިރު ގާނޫނީ ބަންދެއްގައިކަން ފާހަގަ ކުރައްވައި، ހިސާން ވިދާޅުވީ ހޭބިއަސްކޯޕަސްގެ މައްސަލައެއް ކްރިމިނަލް ކޯޓަށް ވެސް ހުށަހަޅާފައިވާ ކަމަށެވެ.
ހަމަ އެހެންމެ އުއްތަމަ ފަނޑިޔާރު ސަސްޕެންޑް ކުރުމަށް ޖުޑިޝަލް ސާވިސް ކޮމިޝަނުން ނިންމާފައި ވަނީ ފަނޑިޔާރުންގެ ގާނޫނީ ޖުޑިޝަލް ސާވީސްގެ ގާނޫނާ ހިލާފަށް ކަމަށެވެ. އަދި އެ ނިންމުމާ ގުޅިގެން ޖުޑިޝަލް ސާވީސް ކޮމިޝަން ޖަވާބުދާރީކުރުވުމަށް ރައްޔިތުންގެ މަޖިލީހަށް ހުށަހަޅުއްވާނެ ކަމަށެވެ.
