ބަންދުގައިވާ ފަރާތްތަކަށް ވަކީލުންގެ ފުރުސަތު ނުދޭ ކަމަށް ބުނެ ފަތުރަމުންދަނީ ހަގީގަތާ ހިލާފު ޚަބަރެއް: ފުލުހުން
13 ފެބުރުއަރީ 2018 | އަންގާރަ 11:00ތަހުގީގު ކުރާ ވަގުތުތައް ފިޔަވާ އެހެން ވަގުތުތަކުގައި ވަކީލުންނާއި ބައްދަލުކުރުމަށް ދުވާލަކު 30 މިނިޓަށްވުރެ ދިގު ނުވާނެ ގޮތަށް ފުރުސަތު ލިބޭނެ
ފުލުހުންގެ މައި އިދާރާ ޝަހީދު ހުސެން އާދަމް ބިލްޑިންގ
ފުލުހުންގެ ބަންދުގައިވާ ފަރާތްތަކަށް ވަކީލުންގެ ފުރުސަތު ނުދޭ ކަމަށް ބުނެ ފަތުރަމުންދަނީ ހަގީގަތާ ހިލާފު ޚަބަރުތަކެއް ކަމަށް މޯލްޑިވްސް ޕޮލިސް ސަރވިސް އިން ބުނެފިއެވެ.
ފުލުހުންގެ ރަސްމީ ޓުވިޓަރ އެކައުންޓް މެދުވެރިކޮށް އަންގާރަ ދުވަހު ކުރި ޓުވީޓްތަކެއްގައި ބުނެފައިވަނީ ކުއްލި ނުރައްކަލުގެ ހާލަތު ނިމުމަކަށް އަންނަންދެން މޯލްޑިވްސް ޕޮލިސް ސަރވިސް އިން ތަހުގީގު ކުރަމުންދާ މައްސަލަތަކުގައި، ތަހުގީގު ކުރާ ވަގުތުތައް ފިޔަވާ އެހެން ވަގުތުތަކުގައި ވަކީލުންނާއި ބައްދަލުކުރުމަށް ދުވާލަކު 30 މިނިޓަށް ވުރެ ދިގު ނުވާނެ ގޮތަށް ފުރުސަތު ދިނުމަށް ހަމަޖެހިފައިވާ ކަމަށެވެ.
މީގެ އިތުރުން 30 މިނެޓްގެ ފުރުސަތު ދެވޭނީ ކުށުގެ ތުހުމަތުގައިވާ ފަރާތުން އެމީހެއްގެ ވަކީލާ ބައްދަލުކުރަން އެދެފިނަމަ، ބަންދުގައިވާ ފަރާތްތަކާ ތަހުގީގަށް ސުވާލު ނުކުރާ ދުވަސްތަކުގައި ކަމަށް ފުލުހުން ވަނީ ބުނެފައެވެ.
