ތުހުމަތެއް ނުކުރެވުނަސް އަންހެނުންނާއި އެހެން މީހުން ދަނީ ރަހީނުކުރަމުން: ޑރ. މަޖީދު
13 ފެބުރުއަރީ 2018 | އަންގާރަ 03:33މިއަދު ނުހިންގާ ޖަރީމާއެއް ނެތް: މަޖީދު
ޑރ. މަޖީދު: ފުލުހުންގެ މައްޗަށް ތުހުމަތުތަކެއް ކުރެއްވި
ކުށެއްގެ ތުހުމަތެއް ނުކުރެވުނަސް އަންހެނުންނާއި އެހެން މީހުން ވެސް އޮޅުވާލައިގެން ރަހީނު ކުރަމުންދާ ކަމަށް ކުރީގެ އިސްލާމިކް މިނިސްޓަރު ޑރ. އަބްދުލް މަޖީދު އަބްދުލް ބާރީ ވިދާޅުވެއްޖެ އެވެ.
ފުލުހުން ކުރަމުންދާ ތަހުގީގުތަކަށް އިޝާރާތް ކުރައްވައި ހޯމަ ދުވަހު މަޖީދު ކުރެއްވި ޓްވީޓެއްގައި ވިދާޅުވީ މީހުން ރަހީނު ކުރަމުންދަނީ އޮޅުވާލައިގެން އެކިއެކި އިލްޒާމުތައް އަޅުވައިގެން ކަމަށެވެ. ރާއްޖޭގައި މިއަދު ނުހިންގާ ޖަރީމާއެއް ނެތް ކަމަށް ވިދާޅުވެ، މަޖީދުގެ ޓްވީޓުގައި ވަނީ އެ އަނިޔާވެރިކަމުން ރާއްޖެ ސަލާމަތް ކުރެއްވުމަށް އެދި ދުއާ ކުރައްވާފައެވެ.
މަޖީދު އެހެން ވިދާޅުވިއިރު، ނުވަ މަހުގެ ތުއްތު ކުއްޖެއްގެ މަންމައަކު ވަނީ ވެރިކަން ވައްޓާލުމުގެ ތުހުމަތުގައި ހައްޔަރުކޮށް، ގޭ ބަންދަށް ބަދަލުކޮށްފައެވެ. އަދި ދަނގެތި ދާއިރާގެ މެމްބަރު އިލްހާމް އަހުމަދު ހޯދައި ފެނިފައިނުވާ ކަމަށް ބުނެ، އޭނާގެ އަނބިކަނބަލުން ފުލުސް އޮފީހަށް ގެންގޮސް، އެތައް ގަޑިއިރެއް ވަންދެން އެތަނުގެ ތެރޭގައި ވަނީ ބަންދު ކޮށްފައެވެ.
