ސަރުކާރުގެ ދަޢުވަތަށް މިތިބީ އައިސް، ސަރުކާރުގެ ވެރިން ބައްދަލެއް ނުކުރެއްވި: އީޔޫ ވަފުދު
8 ފެބުރުއަރީ 2018 | ބުރާސްފަތި 10:22ދަތިކުރުމުގެ ފިޔަވަޅު އެޅުމާ ގުޅޭ ގޮތުން އެއްޗެއް ބުނާކަށް ބޭނުމެއް ނުވި
ރާއްޖެއަށް ޒިޔާރަތްކުރި ވިލާތުގެ އިއްތިހާދުގެ ވަފުދު
ދިވެހިރާއްޖޭގެ ތަރައްޤީގެ ބައިވެރިންނާއި ބައިނަލްއަގްވާމީ ޖަމިއްޔާތަކުން ރާއްޖެ އައިސް ޤައުމުގެ ހާލަތު އަމިއްލައަށް ބަލާލުމަށް ސަރުކާރުން ދެއްވި ދައުވަތު ޤަބޫލުކޮށް، ރާއްޖެ އައުމުން، ރައީސުލްޖުމްހޫރިއްޔާ ޢަބްދުލްޤައްޔޫމާއި، ސަރުކާރުގެ އިސް އެއްވެސް ބޭފުޅެއް ވެސް ބައްދަލުކުރައްވަން ފުރުޞަތު ނުދެއްވި ކަމަށް، ވިލާތުގެ އިއްތިހާދުގެ ވަފުދުން ބުނެފިއެވެ.
ރާއްޖެއަށް މިހާރު ވަޑައިގެން އުޅުއްވާ ވިލާތުގެ އިއްތިހާދުގެ ވަފުދު ބުރާސްފަތި ދުވަހު އިދިކޮޅު ފަރާތްތަކާއި ބައްދަލުކުރެއްވުމަށް ފަހު ނުކުމެވަޑައިގަތް ވަގުތު މީޑިއާ އިން ކުރި ސުވާލަކަށް ޖަވާބު ދެއްވަމުން، އެ ވަފުދުގައި އެންމެ އިސްކޮށް ހުންނެވި، ވިލާތުގެ އިއްތިހާދުގެ އެމްބެސެޑަރ، ޓުންގ ލައި މާގް ވިދާޅުވީ، ވިލާތުގެ އިއްތިހާދުން ރާއްޖެ އައީ، ރާއްޖޭގައި ކުއްލި ނުރައްކަލުގެ ހާލަތު އިޢުލާނުކުރަން ޖެހުނު ސަބަބު އިތުރަށް ބަލައި، އެކަމުގައި ސަރުކާރުގެ ވިސްނުން ހުރި ގޮތް ބެލުމަށް ކަމަށެވެ. ނަމަވެސް އެ ވަފުދުން، ރައީސް ޔާމީން ވެސް ހިމެނިވަޑައިގަންނަވާ ގޮތަށް ސަރުކާރުގެ އިސް ފަރާތްތަކާއި ބައްދަލުކުރުމަށް އެދުނު އެދުމަށް އެއްވެސް ވަރަކަށް އިޖާބަދީފައި ނުވާ ކަމަށެވެ.
"ފުރަތަމަ ކަމަކަށް، އަހަރުމެން މިތިބީ ވަރަށް ހިތްހަމަ ނުޖެހިފަ. އަހަރުމެން ރާއްޖެއަށް އައީ ހެޔޮ ހިތުން، ސަރުކާރާއި އެކު މަޝްވަރާތައް ކުރިއަށް ގެންދިއުމަށް. ހިތާމަޔާއެކު ދަންނަވަން ޖެހެނީ، އަޅުގަނޑުމެންނާ އެއްވެސް ފަރާތަކުން ބައްދަލެއް ނުކުރި. ސަރުކާރުން ކުއްލި ހާލަތާ ގުޅިގެން ދެއްކެވި ބައެއް ވާހަކަތަކާއި ގުޅޭގޮތުން އަޅުގަނޑުމެން ސީދާ ސަރުކާރުގެ ފަރާތުން ސާފުކޮށް، އެނގެން ބޭނުންވާ ބައެއް އިތުރު ކަންކަން އެބަހުރި. އެ ފުރުޞަތު ނުލިބުމުން މިތިބީ ކުޑަކޮށް ހިތްހަމަނުޖެހިފަ" އެމްބެސެޑަރ ޓުންގ ލައި ވިދާޅުވިއެވެ.
ވިލާތުގެ އިއްތިހާދުގެ ވަފުދު ރާއްޖެއަށް ޒިޔާރަތްކުރީ އެކުވެރިންގެ ގޮތުގައިކަން ފާހަގަކުރައްވައި، ވަގުދުގައި ހިމެނިވަޑައިގަންނަވާ، އިނގިރޭސިވިލާތުގެ އެމްބެސެޑަރު ޖޭމްސް ޑޯރިސް ވިދާޅުވީ، އަސާސީ ޙައްޤުތަކެއް ހިފެހެއްޓިދާނެ ނާދިރު ދަނޑިވަޅުތަކެއް އައިސްދާނެ ކަމަށް ޤަބޫލުކުރައްވާ ކަމަށާއި، ނަމަވެސް ރާއްޖޭގައި އޮތް ހާލަތާ މެދު ކަންބޮޑުވެވަޑައިގަންނަވާ ކަމަށެވެ.
ވަފުދުގައި ހިމެނިވަޑައިގަންނަވާ ޖަރުމަނުގެ އެމްބެސެޑަރު ޔޯން ރޯޑް ވިދާޅުވީ، ބައިނަލްއަޤުވާމީ އެކި ފާރަތްތަކުން ނެރުނު ބަޔާންތަކުގައި ކުއްލި ނުރައްކަލުގެ ހާލަތު އުވާލައި، ސުޕްރީމް ކޯޓަށް އިޚުތިރާމް ކުރުމަށް ގޮވާލާފައިވާއިރު، އެ ކަންކަމާ އަޅައިނުލައި، ވަފުދުން ބައްދަލުކުރަން އެދުމުން އެކަމާ ވެސް އަޅައިނުލުމުން ހިތާމަކުރައްވާ ކަމަށެވެ. އެމްބެސެޑަރު ޔޯން ވިދާޅުވީ، ވޭތުވެދިޔަ އަހަރެއްހާ ދުވަސްތެރޭގައި ހަތަރު ފަހަރެއްގެ މަތިން ރާއްޖެ ވަޑައިގެން ރައީސް ޔާމީނާ ބައްދަލުކުރެއްވުމަށް އެދިވަޑައިގެން ކަމަށާއި، ނަމަވެސް އެ ފުރުޞަތު ލިބިފައި ނުވާ ކަމަށެވެ. އެމްބެސެޑަރު ވިދާޅުވީ އެއީ ކުރިއަށް ދެވޭނެ މަގު ނޫން ކަމަށެވެ.
މިހާރު ރާއްޖޭގައި ހިނގަމުން މިދާ ކަންކަމުގެ ސަބަބުން ރާއްޖެއާ ދެކޮޅަށް ނުވަތަ ދިވެހި ސަރުކާރުގެ އިސް ފަރާތްތަކާއި ދެކޮޅަށް ވިލާތުގެ އިއްތިހާދުން ދަތިކުރުމުގެ ފިޔަވަޅުތަކެއް އަޅާފާނެތޯ ރާއްޖެޓީވީ އިން ސުވާލުކުރުމުން، ވަފުދުގައި އިސްކޮށް ހުންނެވި އެމްބެސެޑަރ ޓުންގ ލައި ވިދާޅުވީ، އެކަމާ ގުޅޭ ގޮތުން މިވަގުތު ވަކި އެއްޗެއް ވިދާޅުވާން ބޭނުން ނުވާ ކަމަށެވެ.
ދަތުކުރުމުގެ ފިޔަވަޅު ނޭޅި ނަމަވެސް، މިހާރު ރާއްޖޭގެ ހާލަތު އޮތް ގޮތުން، ރާއްޖެއަށް އިޤުތިޞަދީ ގޮތުން ގެއްލުންތަކެއް ވަމުންދާކަން ފާހަގަކުރައްވައި ޖަރުމަނުގެ އެމްބެސެޑަރު ވިދާޅުވީ، އެކަން އެގޮތަށް ހިންގަން ބޭނުން ނުވާ ކަމަށެވެ.
ވިލާތުގެ އިއްތިހާދުގެ ވަފުދާއި ބައްދަލުކުރަން ސަރުކާރުން ދެކޮޅު ހެދި ނަމަވެސް، އެ ވަފުދުން ވަނީ ރާއްޖޭގެ ސިޔާސީ ބައެއް ޕާޓީތަކާއި، އަދިވެސް އެހެން ބައެއް ފަރާތްތަކާއި ބައްދަލުކޮށްފައެވެ.
