ހައްޔަރުކޮށްފައިވާ ސުޕްރީމްކޯޓުގެ ދެ ފަނޑިޔާރުން ދޫކޮށްލުމަަށް އެމްނެސްޓީ އިންޓަރނޭޝަނަލް އިން ގޮވާލައިފި
7 ފެބުރުއަރީ 2018 | ބުދަ 13:53ރާއްޖޭގެ ހާލަތު ވަރަށް ކައިރިން ދަނީ ބަލަމުން
އުއްތަމަ ފަނޑިޔާރު އަބްދުﷲ ސައީދު
ހައްޔަރު ކޮށްފައިވާ ސުޕްރީމް ކޯޓުގެ ދެ ފަނޑިޔާރުން ދޫކޮށްލުމަަށް އެމްނެސްޓީ އިންޓަރނޭޝަނަލް އިން ގޮވާލައްވައިފި އެވެ.
އެމްނެސްޓީ އިންޓަރނޭޝަނަލް އިން ހާމަކޮށްފައިވާ ގޮތުގައި ރާއްޖޭގެ ސިޔާސީ މަސްރަހުގައި ހިނގަމުންދާ ކަންކަން ވަރަށް ސާފުކޮށް ކަންކަންވަމުންދާ ގޮތް ބަލަމުންދާ ކަމަށާއި ހުރިހާ ފަރާތްތަކެއްގެ އިންސާނީ ހައްގުތައް މިފަދަ ހާލަތްތަކުގައިވެސް ރައްކާ ކުރެވެންޖެހޭނެ ކަމަށެވެ.
ކުއްލި ނުރައްކަލުގެ ހާލަތު އިއުލާނު ކޮށްފައިވަނީ ހައްގުތަކަށް އަރައިގަނެ އެކަމުން ރެކުމަށް ކަމަށާއި މިފަދަ ގޮތަކަށް ސަރުކާރުން އަމަލު ނުކުރުމަށް އެމްނެސްޓީ އިންޓަނޭޝަނަލް އިން ވަނީ ދިވެހި ސަރުކާރަށް ގޮވާލައްވާފަ އެވެ.
އެމްނެސްޓީ އިންޓަނޭޝަނަލް އިން މިގޮތަށް ހާމަކޮށްފައިވާ އިރު ސަރުކާރުން ވަނީ މިދިޔަ ހޯމަ ދުވަހުގެ ރޭ ރާއްޖޭގައި ކުއްލި ނުރައްކަލުގެ ހާލަތު އިއުލާނުކޮށްފަ އެވެ. އެއަށް ފަހު ހޯމަ ދުވަހުގެ ރޭ ދަންވަރުގެ ވަގުތެއްގައި ފުލުހުން ވަނީ މައުމޫން އަބްދުލްގައްޔޫމް ހައްޔަރުކޮށްފައެވެ. މީގެ އިތުރުން އުއްތަމަ ފަނޑިޔާރު އަބްދުﷲ ސައީދާއި ފަނޑިޔާރު އަލީ ހަމީދުގެ އިތުރުން ޑިޕާޓްމެންޓް އޮފް ޖުޑިޝަލް އެޑްމިނިސްޓްރޭޝަންގެ އެޑްމިނިސްޓްރޭޓަރ ހަސަން ސައީދު ހުސައިން ވެސް ވަނީ ހައްޔަރުކޮށްފަ އެވެ.
