ހުކުމް ތަންފީޒު ކުރުމަށް ހުރަސް އަޅާނަމަ، ބައިނަލްއަގުވާމީ ހަމަތަކުން ފިޔަވަޅު އަޅައިފާނެ: ރައީސް ނަޝީދު
މުޅި ދުނިޔެ ގޮވާލަމުންދަނީ ބުރާސްފަތި ދުވަހުގެ ރޭ ސުޕްރީމް ކޯޓުން ކޮށްފައިވާ ހުކުމް ތަންފީޒުކުރުމަށް
ކުރީގެ ރައީސް މުހައއްމަދު ނަޝީދު ބޭރުގެ ބައެއް ޑިޕްލޮމެޓުންނާއި އެކު
ކޯޓްގެ ހުކުމް ތަންފީޒު ކުރުމަށް ހުރަސްއަޅާ މީހުންނާމެދު، ބައިނަލްއަގުވާމީ ހަމަތަކުން ފިޔަވަޅު އެޅުން ގާތްކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު ހޮނިހިރު ދުވަހު ކުރައްވާފައިވާ ޓްވީޓެއްގައި ވިދާޅުވީ، މުޅި ދުނިޔެ ގޮވާލަމުންދަނީ ބުރާސްފަތި ދުވަހުގެ ރޭ ސުޕްރީމް ކޯޓުން ކޮށްފައިވާ ހުކުމް ތަންފީޒު ކުރުމަށް ކަމަށެވެ.
އަދި އެ ހުކުމް ތަންފީޒު ނުކޮށްފިނަމަ ނުވަތަ އެކަމަށް ހުރަސްއަޅުއްވާ، ޗީފް އޮފް ޑިފެންސް ފޯސް ޖެނެރަލް އަހުމަދު ޝިޔާމް އަށާއި އެންމެ ބޭފުޅުންގެ މައްޗަށް ބައިނަލްއަގުވާމީ ހަމަތަކުން ފިޔަވަޅު އެޅުން ގާތްކަމަށް ވެސް ރައީސް ނަޝީދު ވިދާޅުވިއެވެ.
ސުޕްރީމް ކޯޓުގެ އަމުރުގައިވާ ގޮތުން ސިޔާސީ ފަރާތްތައް ޖަލުން މިނިވަން ކުރަންޖެހެ އެވެ. އެ އަމުރަށް ހުރަސް އަޅާ ފަރާތްތަކަށް ފިޔަވަޅު އަޅާނެ ކަމަށް ވެސް ބުނެފައިވެ އެވެ. އެހެންނަމަވެސް ސަރުކާރުން ތަފާތު ބަހަނާތައް ދައްކަމުންގޮސް ސުޕްރީމް ކޯޓްގެ ހުކުމް ތަންފީޒު ކުރުން ލަސް ކުރަމުންދާ ކަމަށް އިދިކޮޅު ފަރާތްތަކުން ދަނީ ތުހުމަތު ކުރަމުންނެވެ.
