ސަރުކާރު ވެއްޓޭނެ، ފޭހުނު އިލޮށި އަޅުގަނޑުމެން ލޮލަށް ހެރޭނެ: ރައީސް ޔާމީން
30 ޖެނުއަރީ 2018 | އަންގާރަ 04:20ކޮންމެ ސިޔާސީ ލީޑަރަކީ ވެސް ވެރިކަން ބޭނުންވާނެ ބޭފުޅެއް ކަމަށް ވިދާޅުވި
ރައީސް ޔާމީން
ގާނޫނީ ސަރުކާރު މަގުމަތިން ވައްޓާލައިފި ނަމަ "އަޅުގަނޑުމެން ފޭހުނު އިލޮށިގަނޑު އަޅުގަނޑުމެން ލޮލަށް ހެރި" ދެން ގާއިމްވާ ސަރުކާރެއް ވެސް މަގު މަތިން ވެއްޓޭނެ ކަމަށް ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.
ހޯމަ ދުވަހުގެ ރޭ ރުމާލު 2 ޖަގަހައިގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ ކޮންމެ ސިޔާސީ ލީޑަރަކީ ވެސް ވެރިކަން ކުރައްވަން ބޭނުންފުޅުވާނެ ބޭފުޅެއް ކަމަށެވެ. ގާނޫނީ ގޮތުން އުފެދިފައިވާ ސަރުކާރެއް މަގުމަތިން ވައްޓާލައިފި ނަމަ އެކަމުގެ ދެރަ ލިބާނީ ވަކި ކޮން ބޭފުޅަކަށްތޯ ރައީސް ޔާމީން ވަނީ ސުވާލު އުފައްދަވާ ފައެވެ.
"ހިނގަ ހިނގާ އޮންނަ ސަރުކާރެއް ވައްޓާލީމަ ކާކަށްތޯ ދެރަވަނީ. ހިނގަ ހިނގާ އޮންނަ ސަރުކާރެއް ވައްޓާލީމަ. ސިޔާސީ ލީޑަރުން ޚިޔާލަށް ގެންނަވާ، މިއިން ކޮންމެ ބޭފުޅަކީ ރާއްޖޭގައި ވެރިކަން ކުރައްވަން ބޭނުންފުޅުވާ ބޭފުޅެއް. ނޫނީ ވެރިކަމަށް އެ ބޭފުޅުންގެ ގާތް ކޮންމެވެސް މީހަކު ދެއްކުމުގެ ވިސްނުމުގައި ހުންނެވި ބޭފުޅެއް. އެއް ސަރުކާރު މަގުމަތިން ވެއްޓިއްޖެ ކަމަށް ވަންޏާ، އަޅުގަނޑުމެން ހިޔާލަށް ގެންނަވާ ހަމަ އަޅުގަނޑުމެން ފޭހުނު އިލޮށި އަޅުގަނޑުމެން ލޮލަށް ހެރޭނެކަން، އަނެއް ސަރުކާރު ވެސް ހަމަ އެ ގޮތަށް ވެއްޓޭނެ. އޭގެ ފަހުން ދެން އަންނަ ސަރުކާރެއް ވެސް ވެއްޓޭނެ،" ރައީސް ޔާމީން ވިދާޅުވިއެވެ.
ރައީސް ޔާމީން މިހެން ވިދާޅުވި އިރު 2012 ވަނަ އަހަރު އެމްޑީޕީގެ ސަރުކާރު ބަދަލުވެގެން ދިޔައީ މަގުމަތިން ހިންގި ހަރަކާތްތަކާ ގުޅިގެންނެވެ. ރައީސް ނަޝީދުގެ ވެރިކަން ބަދަލުވީ ރައީސް ޔާމީން ވެސް އިސްކޮށް ހުންނަވައި މަގުމަތީގައި ކުރި މުޒާހަރާތަކާ ގުޅިގެން ސިފައިންނާއި ފުލުހުންގެ ތެރެއިން ބަޔަކު ސަރުކާރާ ދެކޮޅަށް ނުކުތުމުންނެވެ. އެއީ ބަޣާވާތެއް ކަމަށް ރައީސް ނަޝީދު ވަނީ ވިދާޅުވެފަ އެވެ.
ރައީސުލްޖުމްހޫރިއްޔާއާ ދެކޮޅު ހަރަކާތެއް ސިފައިން ހިންގުމަކީ ސިފައިންގެ ގާނޫނުގައި ބުނާ ގޮތުން ބަޣާވާތެކެވެ.
